1Teipa Booz yajqui mosehuito nechca hueyi caltemit ipan nopa tepamit campa nochi quisaj huan calaquij pampa nopona momajtoyaj mosentilíaj tacame. Teipa Booz quiitac huala iteixmatca cati quiilhuijtoya Rut para más quipixtoya tanahuatili quimocuitahuis. Huajca Booz quiilhui: ―Xihuala nica, ximosehuiqui. Huan iteixmatca yajqui huan mosehui.
2Huan Booz quinnotzqui majtacti huehue tacame cati tayacanayayaj ipan nopa altepet huan nojquiya quinilhui ma mosehuica ihuaya pampa quej nopa momatque quisencahuaj se camanali ipan nopa tonali. Huan quema mosehuijtoyaj,
3Booz quiilhui iteixmatca: ―Tiquixmati Noemí cati mocuectoc ten tali Moab. Yaya quinamaca nopa tali cati eliyaya iaxca toteixmatca Elimelec.
4Nijnequi xijmati pampa huelis tijnequis tijcohuas. Huan sinta tijnequi tijcohuas, xiquijto ama iniixpa ni huehue tacame cati mosehuíaj nica para nochi quimatise. Pampa ta tiiteixmatca cati más nechca huan yeca achtohui tijpiya tanahuatili para tijcohuilis ital sinta tijnequi. Pero sinta amo tijnequi tijcohuas, techilhui ama, pampa teipa quinamiqui para na nijcohuas. Huan iteixmatca tananquili huan quiilhui Booz: ―Nijnequi nijcohuas.
5Huajca Booz quiilhui: ―Nojquiya xiquelnamiqui sinta tijcohuas nopa tali, monequi timocuilis Rut, nopa cahualtzi cati huala ten tali Moab. Quej nopa ne tali noja mocahuas ica itoca nopa mijcatzi huan quema anquipiyase se conet, quihuicas itoca nopa mijcatzi huan quiselis ital.
6Huan quema iteixmatca quicajqui ni tamanti, tananquili: ―Sinta quej nopa, amo huelis nijcohuas yon amo hueli nimocuilis Rut, pampa monequisquía niquinquixtilis cati elisquía iniaxca nonelconehua para niquincahuilis coneme cati tacatise. Pero sinta ta tijnequi tijcohuas, nimitzpanoltilía nopa tanahuatili para xijcohua.
7Ipan nopa tonali ipan tali Israel momajtoyaj quema se quinamacayaya se tali o se quimacayaya seyoc tanahuatili para quicohuas se tali, huajca nopa tanamacaquet moquixtiliyaya se itecac huan quimacayaya ne seyoc. Huan yeca,
8iteixmatca Booz moquixtili itecac huan quimactili Booz, huan quiilhui: ―Ta xijcohua nopa tali.
9Huajca Booz quinilhui nopa tayacanani huan nochi cati mosentilijtoyaj nopona: ―Ama nochi antestigos para nijcohuilía Noemí nopa tali cati elqui iniaxca Elimelec, Quelión huan Mahlón.
10Nojquiya antestigos para nimocuilía Rut cati huala tali Moab para elis nosihua, yaya cati icahual Mahlón. Quej nopa yaya hueli quipiyas se oquichpil cati quihuicas itoca ihuehue cati mijqui huan quiselis ital nica. Ama antestigos.
11Huan nopa huehue tacame huan nochi cati nopona itztoyaj tananquilijque: ―Quena, tojuanti titestigos. ¡TOTECO ma quichihuas nopa sihuat cati calaquis ipan mochaj ma eli quej tohuejcapan nanahua Raquel huan Lea, pampa nochi tiisraelitame tihualajque ten inijuanti! Huan ta xieli se hueyi tacat ipan altepet Belén huan nochi ma camanaltica para mitztepanitase.
12TOTECO ma mitzmaca miyac moconehua ica nopa sihuat para anquinpiyase miyac amoixhuihua quej quinpixqui Fares cati elqui icone Tamar huan Judá.
13Huajca quej nopa elqui quema Booz mocuili Rut para elis isihua. Huan teipa Booz ihuaya mocajqui Rut, huan TOTECO quintiochijqui, huan Rut quitacatilti se piloquichpiltzi.
14Huan sihuame ipan nopa altepet quiilhuiyayaj Noemí: ―¡Ma tijhueyichihuaca TOTECO pampa ama mitzmacatoc se moixhui para mitzmocuitahuis! ¡Moixhui ma eli se hueyi tacat ipan tali Israel!
15Moyex Rut mitzicnelía huan mitzpalehuijtoc más huan amo quej miyac telpocame. Mitzmacatoc se moixhui cati mitzchicahualismacas huan mitzpalehuis quema ya tielis tinanatzi.
16Huan Noemí quimocuitahui nopa piloquichpiltzi ica paquilisti quej elisquía icone.
17Huan quema icalnechcahua Noemí quiitaque, quiijtojque: ―¡Tacajtoc se icone Noemí! Huan quitocaxtalijque Obed. Huan Obed moscalti huan elqui itata Isaí huan ihueyi tata David.
18Ya ni inintoca iteipan ixhuihua Fares cati itztoya huejcajquiya huan cati elqui ihuejcapan tata Booz. Fares quipixqui icone itoca Hezrón,
19huan teipa Hezrón quipixqui icone cati itoca Ram. Ram moscalti huan quipixqui icone cati itoca Aminadab.
20Teipa Aminadab moscalti huan quipixqui icone cati itoca Naasón.
21Teipa Naasón quipixqui icone cati itoca Salmón. Huan Salmón motacachijqui huan quipixqui icone cati itoca Booz. Huan Booz moscalti huan quipixqui nopa conet cati itoca Obed.
22Huan teipa Obed motacachijqui huan quipixqui icone cati itoca Isaí. Huan Isaí motacachijqui huan quipixqui icone cati itoca David.
