1Boasi'a ana kumate mrerino kasante umani'ne. Anante Boasi'a keana, Rutima asmino kva huntegahie hu'nea ne' egeno, anage hu'ne, Nenfuga amare enka emnio, higeno anante emani'ne.
2Boasi'a 10ni'a ranra kuma kva vahe, zamare atru huno anage hu'ne, Amare emniho, hige'za zamagra emani'naze.
3Anante Boasi amanage huno ana nera asmi'ne, Naomi Moabu mopareti e'neno, tagri vahe'mofo Elimeleki mopa mizante atrenaku nehige'na negasmue.
4Hige'na nagra tmage kazigati kasami fatgo hunaku nagesa nentahue. Amama mani'naza vahe'ene, ranra kva vahenimokizmi zamufi, kagrama miza sena aza hugahue hanunka, amne ana huo, hagi ana osugahue hanunka, nasmige'na antahi'neno. Na'ankure kagra kagota hanke'na, nagra kagri kamage hu'noe. Ana ne'mo kenona huno, nagra mizase'na aza hugahue huno hu'ne.
5Boasi'a anage hu'ne, Ana mopa Naomi azampinti miza sesana zupa, Moabu fri'nemofo kento, Rutina nfa'aza hugahane, fri'nea ne'mofo naga zamagima erifore hnanke'za, ana naga'mo'za ana mopa erigahaze.
6Kvama huntega ne'mo'a anage hu'ne, Nagra mizase'na azahuga osu'noe, na'ankure e'ina hanu'na nenfama namige'na erisanti hare'noa zana eri haviza hugahue. E'ina hu'negu nagrama huga'zana kagra huo. Na'ankure nagra mizase'na azahuga osu'noe.
7Amanahu avu'avara, korapa knafi'na Israeli vahepi me'neane. Mago'zama mizasekuro, azahu'kura, mago ne'mo agia ano zafino mago'mofo nemia zane. Higeno amanahu antahi'zamo'a mani'zamofo kankamu erifore huno Israelia vahera aza nehia zane.
8Ana higeno, Naomima kegva huntega ne'mo'a, Boasinku anage hu'ne, Kagraka'a suza miza'so, nehuno aga nona zafi'ne.
9Anante Boasi'a ranra vaheku'ene, mika vaheku anage hu'ne, tamagra negesage'na tamagri tamufi menina Naomi azampintira, Elimelekima, Kilioni'ma, Maloni zantami'ma me'neana, nagra miza segahue.
10Nagra ana zanke hu'na, Moaputi a' Rutina azeri nfa'a nehue, Maloni kento a'mo nagri a' mani'neno, fri'nea ne'mofo agi fnane hu'zanku zamagia erifore hanige'za ana mopare ene, vahe'afine, kuma'afinena fanane osugahie. Mika vahe'mota menina amazana tamufinti negaze,
11huno higeno ana kumamofo kasante mani'naza vahe'ene, kumate ranra vahe'ene mika'moza hu'za, Tagra negone, Ra Anumzamo azeri so'e hanigeno nonka'afima esnia a'mo'a, Resoli'ene, Liakema, Israeli vahe kse hakare huna'a kna hugahie. Hanigenka kagra Efrati naga nofipi ra kagi erinka Betrehemia feno ne' manigahane.
12Mago'ene nagakamo'a, Peresi naga kna huno, Judanteti Tamari'ma ksente'nea ne'mofo nagapinti, Ra Anumzamo ama a'pinti mofavre zga kmigahie.
13Higeno Boasi'a, Ruti a' avregeno nenaro'za higeno, anteno mse'ne. Ramo azeri knare huntegeno agra amu'ene huno ne'mofavre ksente'ne.
14Anante a'nemo'za Naominku anage hu'naze, Ra Anumzamofo agi'a erisga hanune, na'ankure meni ama knafina kzahu vahera omni'ne huno onkatre'ne. Ama mofavremo Israeli vahe motafina ragi erigahie.
15Agra nomni zanka'a kzeri muse nehuno tvava'ma resankeno'a knare huno kegva hugantegahie, na'ankure neganofero'a, seveni'a ne'mofavre zga zamagatere'no, agra avesi kantega'hie!
16Anante Naomi'a ana mofavre avreno, agra'a asumpi anu'kino kegva hu'ne.
17Magopi nemniza a'nemo'za, anage hu'naze, Mago ne'mofavre Naomi'na fore humie! Obeti'e hu'za agi'a antemi'naze. Obeti'a raseno Jesi ksentegeno, Jesi'a, Deviti nefaza hu'ne!
18Ama'ne e'i Peresi naga'nofimokizmi zamagi'e, Peresi'a, Hesroni ksente'ne,
19Hesroni'a, Rami ksentegeno, Rami'a, Aminadabu ksente'ne.
20Aminadabu'a, Nasoni ksentegeno, Nasoni'a, Salmoni ksente'ne.
21Salmoni'a, Boasi ksentegeno Boasi'a, Obeti ksente'ne.
22Obeti'a, Jesi ksentegeno, Jesi'a, Deviti ksente'ne.
