LUKA 21:9-32

⁹Ndipo mukadzabva kuti kuna nkhondo na masandulikidwe ya bzinthu, lekani kudzabva mantha. Thangwe bzin'funika kuti bzicitike bzimwezo. Tsono kumala kwa dziko kundzakhaliratu lini panthawe imweyo.

¹⁰Na tenepo iye adawawuza pomwe kuti: “Dziko na Dziko yan'dzapindukirana, umambo na umambo bun'dzapindukiranambo.

¹¹Pantsi pan'dzatekenyeka, ndipo kun'dzawoneka nthenda, njala mu mbuto zakusiyana-siyana, na malengwa yanango. Ndipo kun'dzawoneka bzinthu bzinango bzakupasa mantha kwene-kwene na bzizindikiro bzinango bzikulu bzakudzulu.

¹²Bzikanati kucitika bzinthu bzentsenebzi iwo an'dzakumangani, an'dzakulondani acidzakuperekani m'manyumba zakupembera, an'dzakuperekani pomwe kuna azimambo na kuna atongi na thangwe ra dzina langu.

¹³Ndipo bzimwebzo bzin'dzakucitirani kuti imwepo mudzakhale mboni.

¹⁴Na tenepo kondzekerani nthaweyo ikanati kufika. Ndipo lekani kudzakahala na thupo kuti mun'dzatawira ciani.

¹⁵Nakuti Ine-pano nin'dzakupasani ndzeru na mafala yakudzalewa-lewa ndipo iwo an'dzakwanisa lini kutawira ayai kukugazani cinthu.

¹⁶Ndipo imwepo mun'dzaperekedwa na azibabanu, na abale wanu na anantsi na azixamwali wanu. Ndipo iwo an'dzakuphani winangomwe.

¹⁷Ndipo wanthu wentse an'dzakuwengani na thangwe rangu.

¹⁸Tsono palibe tsisi na libodziro lomwe lin'dzadoda mumsolo mwanumu.

¹⁹Na tenepo limbikirani kuti mudzapulumusiridwe moyo wanu.

²⁰Ndipo imwepo mukadzawona Jeruzalema wapaniriridwa na nthithi wa acikunda, dzadziweni kuti nthawe yafika yakupfudzidwa kwace.

²¹Na tenepo wanthu omwe an'dzakhala ali muJudeya mbadzathawire m'mapiri. Ndipo wale omwe an'dzakhala ali mumzindamo mba'dzacoke. Na wale omwe an'dzakhalambo ali m'minda mbaadzaleke kupita mumzindamo.

²²Thangwe ntsiku zimwezo zin'dzakhala za nyathwa, kuti bzidzatewekeze bzentse bzomwe bzidanembedwa.

²³Tsisi kuna akazi anyamimba ayai an'dzakhala ali kumamisa pantsiku zimwezo! Thangwe pantsi pano pan'dzawoneka matsautso makulu kwene-kwene, na ciya cikulu kuna wanthu omwewo.

²⁴Ndipo wanthu azinji an'dzagwatidwa makhosi na mbadzo, winango adzayesedwa akapolo kumadziko yanango. Ndipo Jeruzalema un'dzapondedwa na wanthu anyakunja, mpaka kudzakwana nthawe yawo.

²⁵Ndipo kun'dzawoneka bzizindikiro kudzuwa, kumwezi, na kunyenyezi. Ndipo pantsi pano, madziko yentse ya pantsi yan'dzadandaula na mantha thangwe ra kuunga kwa madzi ya nyandza na maimbi yace.

²⁶Na tenepo wanthu an'dzafumphira na mantha na nkhumbukira ya bzinthu bzomwe bzindzawoneka padziko la pantsibzo. Thangwe mphambvu zentse zakudzulu zin'dzagwededzeka.

²⁷Pamwepo ndipo pan'dzawoneka Mwana wa Munthu ali kubwera mumtambo, na mphambvu na mbiri ya Mulungu.

²⁸Ndipo bzingadzacitika bzinthu bzintsenebzi dzalamukeni mucidzakondzekera. Nakuti cipulumuso cakufikirani.

²⁹Ndipo Jezu adawatsikira matere aciti: “Nyang'anani mtowe na miti yentse.

³⁰Nakuti ikayamba kufundira masamba mumbadziwa kuti maindza yafika.

³¹Na tenepo mukadzawonambo bzinthu bzimwebzi bzicicitika dzadziweni kuti umambo bwa Mulungu bwafika.

³²Ndiri kukuuzani cadidi kuti mtundu omweyu wa wanthu un'dzamala lini uko bzimwebzi bzikanati kucitaka.