Luka 21:9-32

⁹Ma embe aŋô siŋ to lau sêli tauŋ sa ŋawae, naŋ atakê atom, gebe gêŋ samob tonaŋ mêŋêsa êmuŋ, mago noc nom ŋatêku êsuŋa oc êsa sebeŋ atom.”

¹⁰Go kêsôm gêdêŋ êsêac gebe “Laum teŋ sêndi sênac siŋ êndêŋ laum teŋ, ma gamêŋ teŋ êndêŋ gamêŋ teŋ.

¹¹Ôjô oc ênam kapôêŋ-kapôêŋ ma tôbôm to gêmac sec êsa êtôm gamêŋgeŋ ma gêŋsêga têtakê ŋamalacŋa to gêŋtalô kapôêŋ aŋga undambê oc mêŋsêsa.

¹²Gêŋ tonaŋ ŋai samob êsa atomgeŋ ma sêu lemeŋ êpi amac ma sêjanda amac to sêkêŋ amac asô lôm malacŋa to andu kapoacwalôŋa ma sêwê amac akô kiŋ to gôliŋwaga laŋôŋnêm êtu aêŋoc ŋaêŋa.

¹³Ŋasawa tonaŋ amacnêm noc awa Anôtônê mêtê saŋa.

¹⁴Taêm ênam êtu tôŋ gebe amansaŋ biŋ ajô êsêac aweŋŋa kwanaŋ-kwanaŋ atom,

¹⁵gebe aê jansuŋ biŋ to kauc êndêŋ amac êwac ma nêm ŋacjo samob sêkŋ auc to senseŋ nêm biŋ nê sêŋgôm êtôm atom.

¹⁶Tenemi to tamemi, ma tewemi to lasimi, ma nêm tawaŋ to nêm lau ŋagêdô oc sêkêŋ amac nasênac amacnêm ŋagêdô êndu,

¹⁷ma lau samob têntac endec amac êtu ŋoc ŋaêŋa.

¹⁸Mago môkêmlauŋ tageŋ oc ênaŋa aŋga môkêmapac atom.

¹⁹Apuc taôm tôŋ ma atap aŋgôŋ matem jali sa.

²⁰“Amac embe alic siŋwaga topomtopom sêwa Jerusalem auc, naŋ ajala êndêŋ tonaŋ gebe kêdabiŋ gebe malac tau oc êtu gasaŋ.

²¹Êndêŋ tonaŋ lau, taŋ sêŋgôŋ Judaia naŋ, sêc sêpi lôc sêna, ma êsêac taŋ sêmoa malaclêlôm tau naŋ, sêc sêsa sêna, ma êsêac taŋ sêmoa malacmagê naŋ, sêsô malac sêna atom,

²²gebe ‘bêc Anôtô êkêŋ ŋagêjôŋa tau tônê,’ gebe biŋ samob, taŋ teto gêc naŋ, ŋanô êsa.

²³Ojae lauo, taŋ sêmoa teŋ to ônaŋ sêkêŋ su ŋapalê sêmoa naŋmêŋ, gebe gêŋwapac ŋanô êtap gamêŋ tonaŋ sa ma Anôtônê têtac ŋandaŋ êtap laum tonaŋ sa.

²⁴Oc sênac êsêac ŋa siŋ ma sêkôc êsêac tôŋ sêwê êsêac nasêsêp tenteŋlatu samob ŋalêlôm. Ma lau samuc sêka Jerusalem popoc sêmoa e lau samuc nêŋ noc ênac pep.

²⁵“Oc to ajôŋ ma utitalata kaiŋteŋkaiŋteŋ êsa ma gwêc ŋadembom êŋgasim ŋakicsêa e ŋamalac samob, taŋ sêmoa nom naŋ, nêŋ meloco êsa ma nêŋ ŋalêlôm ŋatutuc ŋanô.

²⁶Ŋamalac têtêc tauŋ to gêŋ, taŋ mêŋêsa aŋga nom naŋ, ŋawêc êŋgôm ŋamalac mateŋ êIô gebe gêŋ ŋaclai undambêŋa kôtêŋ-kôtêŋgeŋ.

²⁷Ma êndêŋ tonaŋ oc sêlic Ŋamalacnê Latu toŋaclai ma toŋawasi ŋanô êŋgôŋ tao teŋ ŋalêlôm êmêŋ.

²⁸Ma gêŋ tonaŋ embe êndambiŋ gebe ŋanô êsa, naŋ matem teŋteŋgeŋ to aôc laŋôm sa, gebe bêc Anôtô ênam amac kêsiŋa kêdabiŋ.”

²⁹Ma Jesu kêsôm biŋgôliŋ teŋ gêdêŋ êsêac gebe “Alic kaleloŋ to ka ŋagêdô samob.

³⁰Embe alic êlêc, go taôm ajala gebe ockêsa kêdabiŋgac.

³¹Amac amboac tonaŋ. Êndêŋ taŋ alic gêŋ samob tonaŋ mêŋêsa naŋ, amac ajala gebe Anôtônê gamêŋ kêdabiŋ.

³²Biŋŋanô, aê jasôm êndêŋ amac gebe Gôlôac tonec oc sênaŋa atom e gêŋ tonaŋ ŋai samob ŋanô êsa acgom.