Luka 21:9-32

⁹Ambo tu miki ma kaloŋo ŋgua ŋananzi lawea pinde siveta paraŋa ŋalae, ande miki ma karuru ndimo. Ŋana tu vetâŋa ŋinde ma ipâŋga muŋga lâ ŋga, andeta zo ŋana tâno ŋine ne zo marumbu kâ ma ipâŋga walele tia.”

¹⁰Yesu iporo ŋgua ŋine lâ, ŋineŋga ipainzi tu, “Kinzi tamâta lâ lawea pinde ma simandi sikai kazâŋa panzi tamâta lâ lawea pinde. Aŋga kinzi ŋgu pinde ma simandi sikai kazâŋa panzi ŋgu pinde.

¹¹Ogigi ŋalaŋala ma siveta tâno ririŋo, aku putole ŋalae tava pukoŋa sakamao ŋalaŋala ma sipâŋga lâ lawea rârâ. Kinzi tamâta ma simora mâsi ŋalaŋala kie-kie ipâŋga lâ samba tini, aku ŋinde ma ivetanzi siruru ŋalae tina.

¹²Andeta vetâŋa rârâni ŋinde ma ipâŋga tia yo, ande kinzi ma sikai miki kaika, ku ma siveta malia pami. Miki uru kalomi tawana naŋa, aku ŋana duvi ŋine kâ kinzi ma siomi lâ ŋgua nia lâ luma ŋana pasauŋa kâ ilo. Ŋineŋga ma siomi kalâ luma sakamao ilo, ku ma sikaimi siŋgunumi kamandi lâ kinzi koipu ŋalaŋala wa tamâta mbâna-mbâna naonzi.

¹³Andeta vetâŋa ŋinde nde itogo miki nemi nzâla ŋana kaporo katula pâri ara panzi tamâta ŋalaŋala ŋinde kâ.

¹⁴Andeta miki ma kalomi loko muŋga ŋana ŋgua ndia miki ma kaporo taulo panzi, mine ndimo.

¹⁵Ŋana tu naŋa warakâŋgu ma ao ŋgua lâ miki kawami ŋana kaporo katula panzi, aku naŋa ma ilo-kalo ara alami. Mine kala nemi kazâŋa tamâta ŋinde ma sikura tu sileleami ku sitawa nemi ŋgua ŋinde ndue, ande tia ndo.

¹⁶Andeta ŋandai kinzi tamâta ŋinde simbonzi nâ ma sio miki kalâ kazâŋa tamâta mbaunzi ilo ŋga. Miki tinami-tamami wa taimi-tuami wa seemi taitu wa nimi-nambwe wa, kinzi ŋinde kala ma siomi lâ kazâŋa tamâta mbaunzi ilo. Ŋineŋga kinzi kazâŋa tamâta ma sipu miki pinde pâta kamâte.

¹⁷Mao nâ, kinzi tamâta rârâni ma wisinzi nâna ŋalae tina ŋanami, ŋana tu nemi kalo-tawana ikeno pa naŋa.

¹⁸Andeta kinzi ma sikura tu sitapa miki piti lâ Maro Kindeni mbau ilo, ande tia ndo.

¹⁹Ambo miki nemi kalo-tawana ma ikeno kaika, ande Maro Kindeni ma via mao ilami, ma kamo viami mine ku kamo nâ.”

²⁰Yesu iporo kilo mine tu, “Lâ zo ŋana miki kamoranzi kazâŋa tamâta simâ simandi siŋge Jerusalem lawea, ŋineŋga ma kasama tu zo laiti ŋana sizavaru lawea ŋinde kâ.

²¹Lâ zo ŋinde, ande ara ŋana kinzi tamâta simo lâ Judia tâno ma sikâwa silâ pa nia tuu. Aku ara ŋana kinzi tamâta simo Jerusalem lawea ilo ŋinde ma sipile lawea ku siyâti silâ pa nia pinde. Aŋga tamâta ea simo tâno ilo, ande kinzi ŋinde ma sitaulo silâ lawea ilo ndimo.

²²Ŋana tu zo ŋinde nde zo ŋana Maro Kindeni ma ipare nia panzi tamâta kâ. Mine kala i kawa ŋgua rârâni ŋinde muŋga siŋgere lâ pepa tini, ande ma ipâŋga kanaŋo.

²³Aku lâ zo ŋinde, kalo-sukâŋa ŋalae ma ilâ panzi taine kâpwa-kâpwa wa kinzi taine ŋinde natunzi simo suu tini yo, ŋana tu malia ŋalae ndo ma ipâŋga lâ tâno ŋine, aku Maro Kindeni ne wisi-nâna ŋalae ma ipâŋga panzi tamâta ŋgu ŋine.

²⁴Kinzi kazâŋa tamâta ma sipunzi tamâta pinde pâta simâte. Aŋga pinde nde ma sikainzi silâ simo sugorai tamâta panzi tinikoa ŋgu lâ tâno ndoni. Aku kinzi tinikoa ŋgu ma siveta kenzi sakamao panzi tamâta simo Jerusalem lawea lee, ikura lâ zo ndia Maro Kindeni ma itoto nenzi zo ŋana siveta mine kâ.”

²⁵Yesu iporo ŋgua kilo tu, “Lâ zo muli, ande mâsi kilala kie-kie ma ipâŋga lâ kari wa nzimona wa pitu wa tininzi. Kinzi tâno tamâta ma simora tâi ilâ wa imâ wa, ne nduŋeŋani ŋalae tina, aku ma siruru pâta ku ma ilonzi rârâ tona.

²⁶Kinzi tamâta ma ilonzi putuka ŋalae tina tu, ‘Kala ŋine mâsi ndia ma ipâŋga lâ tâno kulu!’ Kinzi ma ilonzi ruruŋa kala ma naonzi lâma, ŋana tu samba tini ne siŋgâra ma iyoka marumbuni.

²⁷Ŋineŋga kinzi tamâta ma simora naŋa Tamâta Natu amo take-take toŋge ŋgini amâ tava walo ŋalae, aku ma simora kilalâŋgu pwataki tu naŋa nde Maro Ŋalae.

²⁸Mine nde lâ zo ŋana vetâŋa ŋinde ma imâ ipâŋga kâ, ande miki ma kamandi kaika, ŋana tu Maro Kindeni ne zo ŋana iyautemi piti lâ kazâŋa ŋinde ilo, ande imâ laiti lâ.”

²⁹Ŋineŋga Yesu iporo ŋgua tambirâŋa panzi tu, “Miki kalomi ŋgere ŋana kâi pâla-pâla wa kâi rârâni wa.

³⁰Lâ zo ŋana kâi rârâni sirumba ku lau wasaseki ipâŋga, ande miki warakami kakura tu kamora wa kasama tu kari ne zo ŋga imâ ipâŋga laiti lâ.

³¹Aku mine nâ, ambo miki ma kamora vetâŋa rârâni ŋinde imâ ipâŋga lâ, ŋineŋga miki ma kasama tu Maro Kindeni ne zo ŋana ikai maro panzi tamâta kâ nde imâ ipâŋga laiti lâ.

³²Naŋa aporo mao nâ pami; kinzi tamâta lâ zo ŋine ma simâte tia yo, ŋineŋga mâsi rârâni ŋinde ma imâ ipâŋga.