Luke 21:9-32

⁹Mi lopu matagutu pana avosia gamu sa inavosona sa vinaripera, meke sa vinaripaqahi pude turu eke si keke popoa. Sari na tiṉitoṉa gugua arini si kaqu ta evaṉa kekenu, ba lopu asa sa vinabetona,” gua.

¹⁰Meke zama pule si Asa, “Kote varipera sari na butubutu, meke sari na butubutu baṉara;

¹¹meke kaqu raza sari na niu nomanomadi, meke na soṉe, na oza pa soku vasina; meke kaqu ta dogoro sari na vina gilagila variva matamatagutudi pa maṉauru.

¹²Ba sipu lopu ele ta evaṉa saripu gua hire, si kote ta tuqe vagi, meke ta ṉoṉovala si gamu koari na tie pa ginuaqu Rau. Kote ta vala si gamu pude ta pitu koari na sinaqoqi, meke ta veko pa vetu varipusi, meke kote ta turaṉa la si gamu pa kenudi ri na baṉara, na ṉati hiniva pa ginuaqu Rau.

¹³Ba asa si keke totoso leana tamugamu pude tozia koarini sa Inavoso Leana.

¹⁴Mi koa ṉoṉo pa bulomia, mamu lopu balabala mamata nia, sapu gua leana pude kote olaṉa la nia koari na tinazutu mia.

¹⁵Ura Arau tu kote poni gamu sari na zinama, na ginilagilana pu kaqu zama ni gamu, sapu lopu keke rina mia kana kote boka olaṉi, babe va kari pani.

¹⁶Meke sari na tiatamamia, na tasimia koreo, na turaṉamia, na mia baere pu lopu va hinokara, kote turaṉa lani gamu tugo pa vinaripitui, meke kaiqa gamu si kote tava mate.

¹⁷Pa ginuaqu Rau si kaqu ta kukitae si gamu koari doduru tie,

¹⁸ba lopu keke kalu pa batu mia si kote ta vagi palae.

¹⁹Mi turu va nabu, meke kaqu vagia gamu sa tinoa hola!

²⁰Pana dogoria gamu sapu mae varidikue nia rina kana sa popoa Zerusalema, si kaqu gilania gamu sapu tata sa tinahuara tanisa.

²¹Ke arini sapu koadi pa pinaqaha popoa Ziudia, si madi govete la koari na toqere vasina. Meke arini pa korapana sa vasileana sana si madi govete taloa, meke arini pu koa koari na popoa pa sadana Zerusalema, si madi lopu nuquru la pa korapana.

²²Ura arini sari na rane vina kilasa, pude tava gorevura sari doduru sapu gua ele ta kubere pa Kinubekubere Hope.

²³Kote na rane tinalotaṉa nomadi si arini koari na barikaleqe pu ari tiadi, meke arini pu tago haha! Ura na tinasuna nomana si kaqu kamo koasa popoa, meke na vina kilasa te Tamasa si kaqu raza koari na tie hire!

²⁴Kote tava mate pa vinaripera si arini, meke kaiqa rini si kote ta raovo d la koari soku popoa. Kaqu mae koa, na neti va konekone ia rina Zenitailo sa popoa Zerusalema, osolae hokoto sa totoso tadi na tie huporo hire.

²⁵Na vina gilagila si kote ta evaṉa koasa rimata, na sidara, meke koari na pinopino. Kote tarazuzu sari na tie pa kasia popoa, kote matagutu nia rini sa ovaṉana sa lamana, meke sari na tovovo lavalavata.

²⁶Kote mabubulu pa tinarazuzu sari na tiena sa pepeso, totoso korapa aqa dogoria rini sapu gua kote ta evaṉa pa doduruna sa kasia popoa, ura sari na pinopino pa maṉauru si kote tava rizu pa dia siraṉa.

²⁷Pa totoso asa kote dogoria rini maena sa Tuna na Tie pa korapadi ri na lei, somania na ṉiniraṉira lavata, na ṉinedala.

²⁸Pana podalae ta evaṉa saripu gua hire, si mi gasa turu mamu doṉo sage, sina tata vura mae sa mia tinarupaha,” gua se Zisu.

²⁹Beto asa si tozia Zisu koarini sa parabolo hie: “Mi doṉo la koasa huda piqi, meke sari kaiqa huda pule.

³⁰Pana dogori gamu sapu podalae liho si arini, si gilania gamu sapu tata sa totoso maṉini.

³¹Gua tugo sapu pana dogori gamu ta evaṉa sari na ginugua hire, si kaqu gilania gamu sapu tata mae sa Binaṉara te Tamasa.

³²Maqu tozi va hinokarani gamu sapu sari doduru pu gua hire, si kaqu ta evaṉa sipu lopu ele mate beto sari na tie pa sinage hie.