Luka 21:9-32

⁹A kana šunen zako maripe thaj pobune, ma daran. Golese so sa gova trubul te avol, al gova naj sig krajo.

¹⁰Tegani vačarda lenđe: “Ka maren pe e manuša e manušencar thaj o carstvo po carstvo ka uštol.

¹¹Thaj i phuv ka tresil pe, thaj ka avol bukhalipe thaj nasvalipe ki sa i phuv. Ka avol dar thaj bare znakura ko nebo.

¹²A angleder sa golestar ka dolen tumen, thaj ka traden tumen, thaj ka den tumen e phurederenđe ane sinagoge ke sudura thaj ano phanglipe. Ka inđaren tumen angle carura thaj angle vladara golese so sen me sikade.

¹³A gova ka avol tumenđe te bi vačarena lenđe mandar.

¹⁴Ma daran so ka phenen kana ka trubul te branin tumen.

¹⁵Golese so ka davtumen lafura thaj mudrost savače nakašti te protivil pe nijekh manuš.

¹⁶A ka izden tumen i tumare dada, tumare deja thaj phrala thaj rođakura thaj amala. Nesave tumendar ka mudaren.

¹⁷Thaj savore ni ka manđen tumen golese so sen me sikade.

¹⁸Al o bal tumare šorestar ni ka perol.

¹⁹Ako ni ačhon te pačan an mande, ka avol tumen đuvdipe bizo meripe.

²⁰A kana dičhen kaj o Jerusalim opkolimo e vojskasa te đanen kaj avilo o vreme te avol pusto.

²¹Tegani e manuša save si tari Judeja nek našen ke bregura. Thaj e manuša save si taro Jerusalim nek ikljen avral, thaj save si avral ma te irin pe an leste.

²²Golese kaj gola đivesa ka aven e Devlesi kazna, savasa ka pherdol sa okova so si pisimo ano Sveto Lil.

²³Al pharo e khamnjenđe thaj kolenđe save den čuči ane gola đivesa! Golese kaj ka avol baro bilačhipe ki phuv, thaj bari holi pe kala manuša.

²⁴Ka aven mudarde taro oštro mačo, thaj ka inđaren len ano phanglipe maškare sa e manuša ki phuv. Thaj o Jerusalim ka uštaven e manuša save ni đanen e Devlese sa dok ni načhol o vreme lengo.

²⁵Thaj ka aven e znakura ano kham thaj ano čhon thaj ane čerenja, a ki phuv e manuša ni ka đanen so te čeren tari dar golese so o more ka šundol but thaj e talasura.

²⁶E manuša ka meren tari dar thaj taro ađučaripe so ka avol e svetosa, golese kaj e neboso zuralipe ka tresil pe.

²⁷Tegani ka dičhen e Čhave e Manušeso sar avol pe oblakura e zuralimasa thaj ani bari slava.

²⁸A kana ka lol te avol gova, ušten thaj vazden tumare šore, golese kaj tumaro Osloboditelji avol tumende.

²⁹Thaj o Isus vačarda lenđe i paramič: “Dičhen pi smokva thaj sa e kašta.

³⁰Kana dičhen kaj ikljen e luluđa lenđe đanen kaj paše si o milaj.

³¹Gijate tumen kana dičhen kaj sa avol gija sar so phendem, đanen kaj si paše o carstvo e Devleso.

³²Čače vačarav tumenđe, kaj kaja generacija ni ka načhol dok sa kava ni avol.