Luuka 21:9-32

⁹Amana mwisiilaka viittha ama nzuuzu mwihoove, maana epo zaya zina yoorettikhana khapula, ila wakathi aya opo khahiyo wiisha w'oolumwenku.”

¹⁰Yinsa khulupa theenya yoori: “Khapila moote enlawa yoomanane na khapila kiina, na ofwalume woomanane ofwalume nzaaya.

¹¹Phantte za waatta za miti zinlawa zapuwe visikinyaatthi khulu-khulu, jala, marati, vitthu zootikinisa na theenya alama khulu-khulu zoolankha pinkuuni.

¹²Khapula zihinarettikhane vitthu zaya epo, mwinlawa mwalupatthiwe, mwilawaniwe mmakhono wa afwalume na mahaakhimu, mwiphukiwe nnyupa woosifwiwamo Nnyizinku, mwifukeliwe mwaasa wookilotta miiyo.

¹³Enttela orettikhana yoori wiiye oshaahiti enu.

¹⁴Mwiiye awiitthaaza rooho zenu, mwihishukulikhele etthu mwinttelaaye ojipu mmana ofiya wakathi aya opo.

¹⁵Maana miiyo kinlawa kawinkheni mattakhuzi na ojuwa nanna yoowaajipu maatuwi enu, ahinttelaaye owahi ozukulisa wala okheeti.

¹⁶Mwinlawa mwafukisiwe wa afwalume pi apapazenu, attwiizenu, ajamaazenu na ashirikha enu, akinoko a mweeyo anlawa ooliiwe.

¹⁷Atthu awaatta anttela wiiya awiiphiiriwa ti mweyo mwaasa wa nzina laka.

¹⁸Ila hatha nyuuli yenu moote khinlawa waashikha.

¹⁹Mwiiye woovilela, toowo mwintta wuusurukha.”

²⁰Yinsa khulupa theenya yoori: “Amana moona sitati ya Yeruzaleemu ezukuleliwe pi anajanka, mwijuwe yoori wafiya wakathi woopwechiwa.

²¹Aphano apale anttelaaye wiiya nti wa Yudeya atthirele omwaako, apale anttelaaye wiiya nsitati atthiremo na apale anttelaaye wiiya ntthuttu ahirutele ositati.

²²Maana siikhu zaya epo enttela wiiya siikhu za hukhumu khuluyeene yoori erettikhane zooshi epile zaatikhiweezo nkatthi wa nttakhuzi la Nnyizinku.

²³Atakhaliwa muukha otule anttelaaye osikaniwa ari wa wiimittha ama eettaka waamwisa siikhu zaya epo, maana vatuniya anlawa apuwevo mashakha mawulweene na hukhumu vakatthi wa anaatamu ooshi.

²⁴Awaatta anttela wuuliiwa na phanka, akinoko athuuliwe nkhama anapherezu eettettisiwaka miti zooshi z'oolumwenku. Yeruzaleemu enlawa yakurumuliwe pi amalapo mpakha yenzi ya amalapo wiisha.”

²⁵Yinsa khuvira awoozaka theenya yoori: “Zinlawa zeeyevo alama vanjuwa, vamweezi na vamatthottowa. Atthu a voolumwenku anteela wiiyana huzuni na woova nwulweene mwaasa woottitthima na otapanyeya wa pahari.

²⁶Anlawa azirikhe atthu a waatta mwaasa wa woova vitthu zinttelaaye orettikhana voolumwenku, maana owahi wa pinkuuni onttela osakhinyeya.

²⁷Aphano phi anttelaavo wooneya Mwaana wa Pinaatamu ataaka enakatthi-nakatthi ya mawiku na owahi na nuuru khuluyeene.

²⁸Mmana zaazaka vitthu zaya epo, mwilankhe mwiinuwe mweekese otulu, maana wuusurukha wenu ori kharipu na-mweyo.”

²⁹Elottelanaka Yinsa khulupa nlikaniso mmote araka: “Moone mfikeera na miitthi zooshi.

³⁰Amana aazaka ophutuwela mathapa aya, mwinoona na mwinjuwa yoori wasaleela ofiya mwiita.

³¹Wa nanna etthiipo, amana moona zirettikhanaka vitthu epo, mwijuwe yoori Ofwalume wa Nnyizinku wasaleela ofiya.

³²Miiyo kiniwuuzani khweele yoori atthu apa aleelo khanlawa ofwa ooshi vitthu epi zihirettikhaneeni.