Luk 21:9-32

⁹Kɔ nəndene teta kəwan, k’afum a dɔtɔf ŋayeŋkər abɛ aŋan bəkəc-ɛ, ta nənesɛ; bawo mɛnɛ tatɔkɔ toŋnuŋkɛnɛ teder kərɛsna, mba bafɔ ndɛkəl doru dandɛ dendelip.»

¹⁰K’oloku ŋa sɔ: «Afum alɔma ŋandeyɛfərɛnɛ kɔ afum alɔma, atɔf ŋɔlɔma ŋayɛfərɛnɛ kɔ atɔf ŋɔlɔma;

¹¹antɔf ŋendeyikcɛ mofo mɔlɔma, dor kɔ docu yendeyi mofo mɛlarəm; mes mɛwɛy-wɛy mendeyi, kɔ mɛgbɛkərɛ mɔpɔŋ mmɛ mendeyɛfɛ nde Kanu Kəyi mɔ.

¹²Mba mamɔkɔ mendebəp, pasumpər’un, patɔrəs’un, pasɔŋ’un kəkɔ-kiti dəkəcəpəs a padebɛr’un dəbili. Abɛ a dɔtɔf ŋandekit’un teta tewe tem.

¹³Tatɔkɔ tendemar’un kəloku ka tɔkɔ nəŋcərɛ tetem mɔ.

¹⁴Ta tɔyɔ nu kəcɛm-cɛmnɛ tɔkɔ nəndeyɔ a nəyacnɛ mɔ.

¹⁵Ina wəkawɛ yati ina endesɔŋ’un temer kɔ kəcərɛ ka kətɔt nkɛ ater anu, nwɛ o nwɛ ɔntɔdetam kəgbɛkəl mɔ.

¹⁶Akomɛnɛ, awɛŋc aŋa, anapa, kɔ abɔt anu yati ŋandesɔŋ nu, ŋasɔŋɛ alarəm kəfi nu dacɔ.

¹⁷Fəp fəndeter’un, teta tewe tem.

¹⁸Mba ali kəfon konu ka dəromp kin kəfɔdesɔlɛ;

¹⁹Kɔ nəmbɛrɛnɛ kəsumpər bel-bel-ɛ, nəndeyacnɛ nəyi doru.»

²⁰«Kɔ nəndenəŋk asɔdar ŋakɛl Yerusalɛm-ɛ, nəcərɛ tɛm tatɔkɔ a kələsər ka di kəlɔtərnɛ.

²¹Tɛm tatɔkɔ akɔ ŋayi Yude mɔ, ŋac-yɛksɛ kəpɛrnɛ ka dəmɔrɔ; akɔ ŋayi Yerusalɛm dacɔ mɔ, ŋac-wur; akɔ ŋayi dəkulum mɔ, ta ŋabɛrɛ sɔ dare-ɛ.

²²Bawo dɔsɔk dadɔkɔ d’ andeboc kiti, ntɛ tɔŋsɔŋɛ mes mmɛ anacic mɔ fəp meyi.

²³Pəlɛc peyi dɔsɔk dadɔkɔ aran aŋɛ ŋambɛkəs, kɔ akɔ ŋaŋmɛsər mɔ! Bawo pəyeŋki pɔpɔŋ pendeyi dɔsɔk dadɔkɔ dɔtɔf, kɔ mɛtɛlɛ mɔpɔŋ ma Kanu nnɔ afum akakɔ ŋayi mɔ.

²⁴Sakma sɔ andedifətɛ ŋa, tɔf fəp yosumpər-sumpər ŋa yekekərɛ ŋa pəbɔlɛ; tɛm tatɔkɔ afum acuru ŋabaŋ Yerusalɛm, haŋ tɛm ntɛ asɔŋ ŋa mɔ tec-lip.»

²⁵«Mɔyɔ mɛgbɛkərɛ mmɛ mɛyɛfɛ nde Kanu kəyi mɔ mendeyi dədec, dəŋof kɔ dəcɔs; dəntɔf, bəkəc yendelɛcɛ-lɛcɛ afum teta pukulɛ-kulɛ pa dəkəba kɔ yam ya ki.

²⁶Afum ŋandefinɛ kənesɛ ka kəcɛm-cɛmnɛ ka tɔkɔ tendeder dəntɔf mɔ, bawo fənɔntər fa kɔm fəndeyikcɛ.

²⁷Tɛm tatɔkɔ tɔ andenəŋk Wan ka fum kəder dəkəp; dəfənɔntər, kɔ dəpəmot pa pəlel pa dɛbɛ dɔn disrɛ d’ ender.

²⁸Kɔ mɔyɔ mamɔkɔ mendecop kəder-ɛ, nəlomp, nəyekti səbomp, bawo kəsɔŋ konu kəway kəlɔtərnɛ.»

²⁹Kɔ Yesu oloku ŋa capafɔ cin: «Nənəŋk kətɔk kəkom kɔ tɔk yɛləpəs nyɛ.

³⁰Nəŋc-kɔna-nəŋk yi yopoŋ bɔpər, nəcərɛ katin a kətəŋ kəlɔtərnɛ.

³¹Itɔ nəna nəndesɔ-yɔ, kɔ nəndenəŋk mes mamɔkɔ mec-der-ɛ, nəcərɛ fɔ dɛbɛ da Kanu dɔlɔtərnɛ.

³²Ic-lok’un kaŋce: Afum a tɛm tantɛ ŋafɔdelip kəfi fəp, a ta teyi-ɛ.