Lucas 21:9-32

⁹Aw domineg kaw te doen gira aw menge samok, ikà niyo egkelemitan. Keilangan onà iyan meinang, meneng kenà pa niyan se temanan te keneyonan.”

¹⁰Minikagi heman sikandin, “Medita se otaw meggira, so doen pongan megbolaw diyà te doma pongan, aw doen heman menge sakop te sebad selotan megbolaw diyà te menge sakop te doma selotan.

¹¹Doen heman linog ontò medaet, aw megelà se otaw te medita ogpeanan tandà te bayil aw mesakit domateng diyà kandan. Ipekità heman te Timanem se kepelahan mekelelamit kidoen te langit.

¹²Meneng te eked pa iyan ketoman, dekepen kaw, aw pemilangen kaw. Okomen kaw doton te menge simbahan te Judiyo, aw kelebosowen kaw heman. Ipeibing kaw doton te menge selotan aw gobirnador tandà te pegpesakop niyo diyà kanak,

¹³amon meg-indan kaw te kebenalan tepad kanak.

¹⁴Ikà niyo egketetana aw megpeketagad kaw tomaba kandan,

¹⁵so dalem te aldaw sìyan, ibegay ko kenyo se kebiyasa amon meketaba kaw kandan. Yan se doun te wedad poon niyo mekedaeg te kenyo kagi.

¹⁶Pengkey amay niyo, aw inay niyo, aw kedowa niyo, pengkey doma gaked niyo aw sigalak niyo, doen heman diyà kandan megtolok kenyo. Doen heman kenyo ipeimatay dan.

¹⁷Kebensihan kaw te keditaan te otaw tandà te pegpesakop niyo diyà kanak.

¹⁸Meneng wedad megkedaet kenyo pengkey sebad.

¹⁹Pineokit te pegtayod niyo te kedita te kelimahan, metoman kaw kominawà te kaling pedowan wedad temanan.”

²⁰“Aw komità kaw te nelibedan te medita sondalo se lonsod te Jerusalem, yan ketegahan niyo te pegbàtan iyan te eked kenamay.

²¹Keilangan komadas se kedita te otaw lekat te Judiya pesalo doton te bontod. Keilangan komadas se kedita te otaw lekat te Jerusalem. Keilangan eked doton te Jerusalem se otaw doton te lowà.

²²Metoman ipelumun te Timanem se otaw medaet, aw tomanen din se kedita te pakang din insolat.

²³Mekelelayò se menge bayi mebedes aw egsosowan te aldaw sìyan. Ontò medaet se kelimahan domateng dini te keneyonan, aw ontò ipelumun te Timanem se menge sakop te Judiya.

²⁴Medita se otaw megelà tigbasen. Medita heman se doma dekepen aw ibingen doton te kedita te doma lonsod mediyò. Ontò pegbàtan te menge otaw kenà Judiyo se lonsod te Jerusalem lamig mepenga se peglowan dan.”

²⁵“Doen pengilala ipekità te Timanem kidoen te aldaw aw bolan aw menge bitoen. Dini heman te tanà, metetana aw melemitan se kedita te otaw, so ontò megbalud aw domaging se dagat.

²⁶Megketetapì se medita otaw tandà te lamit dan, so eked dan ketaga-taga aw eden se domateng dini te keneyonan. Pengkey menge bitoen kidoen te langit, mebilit se kedita dan.

²⁷Penga niyan, kitaen te kedita te otaw se pegdateng ko, so lomikò a Timanem Migpekeotaw tekingan te labon. Komità dan te metolos a aw ontò a melangkaw.

²⁸Na, aw kitaen niyo se pegketoman niyan, keilangan meluba kaw, so ipelowà kaw te Timanem te eked kenamay.”

²⁹Nayan, mig-indan si Jesus te tegdeyanan seini, kagi din, “Tengtengi niyo se kayo igira aw menge doma kayo heman.

³⁰Aw kitaen niyo se kayo tomobed aw domawen, ketegahan niyo te agpet den domateng se aldaw te pegpemongo niyan.

³¹Iling heman kenyan, aw kitaen niyo te metoman se inikagi ko diyà kenyo, yan ketegahan niyo te agpet den lomowan se Timanem.

³²“Eneng-enengi niyo se kagi ko seini. Doen menge otaw komità te pengilala sìyan eked kematay singed aw metoman se kedita niyan.