LUKA 18:11-24

¹¹Ndipo mfalizeuyo akhapemba adaima acimbati: 'Mulungu, ndiri kukutendani thangwe ine-pano ndiribe kukhala ninga wanthu winango, omwe ni wanthu wa umbava, wakusaya kulungama na wa upombo ayai ninga nyakupimisa mtsonkhoyu.'

¹²Ndipo ndinimbabzimana kudya kawiri pamdzinga, ndicipereka cacikhumi ca bzinthu bzangu bzentse bzomwe ndinimbatambira.”

¹³Tsono nyakupimisa mtsonkho ule akhadaima kutali, ndipo iye akhajiguma lini kudzulu. Na tenepo akhambabzimenya pacifuwa aciti: “Mulungu, ndibverembo ntsisi ine-pano, thangwe ndine nyakuphonya!”

¹⁴Na tenepo ndiri kukuwuzani kuti omweyu adabwerera kumui wakulungama kuna Mulungu kuposa mfalizeuyo. Nakuti ule omwe an'bzitumbiza, iye an'dzanyozedwa. Na ule omwe an'bzicesva, iye an'dzakuzidwa.

¹⁵Ndipo wanthu akhabweresa wana kuti Jezu adzawasanjike manja. Tsono pomwe ateweri wace adawona bzimwebzo adawatsimula.

¹⁶Tsono Jezu adacemera wanawo kuti abwere pana iyepo, aciwawuza ateweri wacewo kuti: “Alekeni wanawo abwere kuno, lekani kuwaletsa. Nakuti umambo bwa Mulungu n'bwa wanthu ninga wanawa.

¹⁷Na tenepo ndiri kukuwuzani cadidi kuti munthu omwe an'saya kutambira umambo bwa Mulungu ninga mwana ndipo iye an'dzamupita lini.

¹⁸Pakhana munthu m'bodzi wakulemekezeka ndipo iye adabvundza Jezu kuti: “Misiri wabwino! Kodi ningacite tani kuti ndidzakhale na moyo wakusaya kumala?”

¹⁹Ndipo Jezu adamutawira kuti: “Kodi thangwe ranyi uli kundicemera wabwino? Nakuti palibe munthu wabwino kuposa Mulungu.”

²⁰Ndipo iwepo umbaidziwa mitemo yomwe imbatii: “Leka upombo, leka kupha munthu, leka kuba, leka kunamizira mwandzako, lemekeza babako na mamako.”

²¹Na tenepo iye adatawira kuti: “Ine ndinimbabzicita kale bzentsenebzo kucokera paubwana bwangu.”

²²Pomwe Jezu adabva bzimwebzo adamuwuza kuti: “Casala cinthu cibodzi kuti ucite: Gulisa bzinthu bzako bzentse bzomwe unabzobzo, kobirizo ugawire anyakusauka. Na tenepo un'dzakhala na moyo wakusaya kumala. Ndipo ukamala unditewere.”

²³Tsono, pomwe iye adabva mafala yamweyo adasunama, nakuti akhadadala kwene-kwene.

²⁴Pomwe Jezu adawona kuti iye akhadasunama ndipo adalewa kuti: “N'bzakunesa kwene-kwene kuti wanthu anyakudala adzapite mu umambo bwa Mulungu!