Luk 18:11-24

¹¹A Parisi i tur ma i wararing suri ut lenri, ‘God, a watung wakak torom ui, uni ka elar nam ara taro kai, a kum tene wolong, det ra ka det tokodos, ma det ra det pam a sakino nam tu ino anun taio o nam tu musano anun taio, ma ka elar kai nama tene los takis iri i.

¹²A ser wewel aru bung un ara wik, ma a ser pitar arara utna tagun ara noino utna ra a pam pat pasi.’

¹³Ikut a tene los takis i tur gisen taru, ke tatado usapat netes una langit, uni i maimai. I raprapusi kut a romrobono nama tupunuk, ma i watungi lena, ‘God, un maris iau, a tene sakino iau.’

¹⁴A watungi tamot, a musano ri, ra i milet melet sur anun a rumu, i sa tokodos umatan o God, ma ara pasander awu. Uni det rop ra det ulabo pas det, din unatino det. Ma osi ra i unatino pasi, din ulabo pasi.”

¹⁵A taro det los a kum nat liklik torom o Iesu sur in ubek aru lamano sapat netes un det. Ra a kum nat na ususer det tama i lenra, det turbat det.

¹⁶Ikut o Iesu i kabo pas a kum nat liklik toromi, ra i watungi lena, “Mot in madek ru a kum nat liklik sur det in nan torom iau. Gong mot turbat det, uni a matanitu anun o God anundet ra det lenri.

¹⁷A inanos mot nama lingmulus, osi ra ken ruk una matanitu anun o God elar nama natlik, ken ruk lar pas.”

¹⁸Ara mugumugu i ting o Iesu lena, “Wakak na Tene Ususer, asau ra an pami sur an rakon a nilaun tukum?”

¹⁹O Iesu i balu i lena, “Sur asau ra u watung iau a wakak? Katutaio i wakak, o God sot kut.

²⁰U tasman a kum Warkurai: ‘Gong u pam a sakino nam tu ino anun taio o nam tu musano anun taio, gong u um doko taio, gong u wolong, gong u etakun torotoro, un ru o tamam ma o nam.’”

²¹A musano ra i balu i lena, “Turpasi ra a natlik utmakai tuk uniri, a ser mur a kum Warkurai rop ri.”

²²Ra o Iesu i longoro i, i watungi tano lena, “Ara utna mukut ra kabaut u pami. Un siuru ru anum a kum utna rop, ra a mani taguni, un tabor a kum sibo na taro nami. Ra un pami lenra, anum a wakak na ululeng kusapat una langit. Numur un nan urin ma un mur iau.”

²³Ra i longoro a wasiso ri i tupunuk doko, uni i a tene gongon sakit.

²⁴O Iesu i tama i, ra i watungi lena, “I ngangitin doko torom a kum tene gongon sur det in ruk una matanitu anun o God.