Luku 18:11-24

¹¹Mo Pa꞉tisi halita꞉ wanda꞉hali na hayeke pa꞉ta꞉ leke yola꞉ moneao hata꞉ yeni dupa piekeme. Koda꞉ neke pa꞉ta꞉ I̱ma꞉ keiyae alome. I̱ta꞉ mandane wanda꞉halima꞉ piteleme tupa꞉ pasa꞉tei na pu o yayapiki pi na lo o suseke na hao halome. I̱ta꞉ mo koto dakisi mu hala꞉ hali tupa꞉ dia꞉me.

¹²I̱ta꞉ pula homeke homeke tukiki pa꞉ta꞉ hoto yaapoma꞉ nee pi wiaata꞉ kutupa I̱ma꞉ yaka mu halo ala꞉ta꞉manu paeyao putupa kiki yaapona꞉ homeketa꞉ neke ku halome.

¹³Koto leekepate mo dakisi mu hayeke halima꞉ta꞉ ipika꞉ siki mo pate leke hata꞉ta꞉ oli ya nane kone na handa꞉liake panda꞉ puniao hata꞉ ipika꞉ hakokona꞉ litolo hata꞉ alota꞉ Koda꞉o. I̱ta꞉ hoke hau polo somema꞉ I̱ a꞉ta꞉ma꞉ homa꞉e leekeme.

¹⁴Yesuma꞉ alota꞉ I̱ma꞉ iki pa꞉ta꞉ dupa la kitolome. Mo hande Pa꞉tisi halita꞉ da la꞉ka꞉la peeketa꞉ Koda꞉ yaapo halepe ekita꞉ tikitiki na pa꞉la꞉pate pa mo dakisi mu hala꞉ halita꞉ tikitiki pa꞉la꞉me. Pa ekipeke. Ma꞉nda꞉ epima꞉ ipikita꞉ aneke hali au lea꞉ka꞉na꞉ta꞉ kota꞉ Koda꞉ma꞉ ipikita꞉ mina꞉nialieke. Kutupa ma꞉nda꞉ epima꞉ ipika꞉ kone panda꞉ puniaya꞉ka꞉na꞉ta꞉ kota꞉ koto someta꞉ Koda꞉ma꞉ tieke au lalieke leekeme.

¹⁵Mandane wanda꞉halima꞉ ika꞉ hosiki wekiwandiki sunu Yesuna꞉ kikima꞉ wataena꞉ yeke hatuku epemekeme. Kutu pimikieki handolo hata꞉ ipika꞉ disaipolo haliwekima꞉ mo wanda꞉hali hando lemekeme.

¹⁶Koto lemekepate Yesuma꞉ mo wekiwandiki wi la꞉ mea alota꞉ Mo wekiwandiki sunuma꞉ I̱ pa꞉ta꞉ epena꞉ma꞉ sa꞉sa꞉ na pea꞉pa꞉peke. Pa ekipeke. Do wekiwandikima꞉ handeke wanda꞉halita꞉ mo Koda꞉na꞉ Kilu Tombuao Hala꞉ ekita꞉ ika꞉ ekie.

¹⁷Doeki hone wopu u hapa꞉peke. Wekiwandiki sunuma꞉ Koda꞉na꞉ Kilu Tombuao Hala꞉eki minolo piteleme tupa꞉ na mimika꞉na꞉ta꞉ kota꞉ ikita꞉ koto pa꞉ta꞉ ana꞉na꞉ na hondo pambilimikie leekeme.

¹⁸Mo Diu wanda꞉halina꞉ you hali homekema꞉ Yesu pa꞉ta꞉ lota꞉ pitolo hata꞉ alota꞉ Epeke Disao. I̱ma꞉ deto hala꞉eki muluekema꞉ta꞉ eki hau peonope laa lota꞉ piekeme.

¹⁹Yesuma꞉ ipika꞉ pi hombo peaaso alota꞉ I̱ta꞉ epeke halie pita꞉ ekipeke alo alepe. Ma꞉nda꞉ hali a꞉nda꞉ epeke tupa꞉ na hala꞉pate Koda꞉ homeke epeke tupa꞉ hala꞉me.

²⁰Hande Lo Pi Ula꞉eki paeyao hone wilime. Hali ma꞉nda꞉ ota꞉ homena꞉ na lia꞉peke. Hali ma꞉nda꞉na꞉ wanda꞉na꞉ hakopu na tunkula꞉peke. Pake na napeke. Yayapiki pi na lapeke. Makeaaso kone ma꞉nda꞉ ma̱leke na lia꞉peke. Naka꞉ ama꞉ apa꞉ yaapona꞉ pi opua꞉peke la꞉la꞉eki hone wilime leekeme.

²¹Mo halima꞉ Yesuna꞉ pi hombo peaaso alota꞉ I̱ hosiki weki siki hatia a꞉paata꞉ koto ale pi ula꞉eki paeyaota꞉ homeke a꞉nda꞉ na tunkuliki opua telia pu halome leekeme.

²²Yesuma꞉ do pi opuaata꞉ mo hali pa꞉ta꞉ alota꞉ Nakana꞉ma꞉ pulu pele hau ma꞉nda꞉ pa ula꞉me. Naka꞉ wia hale ala꞉ta꞉ ala꞉ta꞉ paeyao mandane wanda꞉halima꞉ hambena꞉ laa mo milipi manita꞉ mandane natehali wanda꞉hali pa꞉ta꞉ hale hale pea꞉peke. Kutu pikina꞉ta꞉ nakana꞉ma꞉ oli hepeni da tukiki pa꞉ta꞉ta꞉ mo epeke epeke ale wopu mu halipikie. Koto ekina꞉ta꞉ yaka hoki nane telia꞉peke leekeme.

²³Hande halima꞉ koto leekeeki opitolota꞉ ipika꞉ pukima꞉ ka꞉nda꞉ma꞉ homeekeme. Pa ekipeke ipikita꞉ hamoko tieke hayeke ekima꞉ piekeme.

²⁴Yesuma꞉ mo halina꞉ puki ka꞉nda꞉ma꞉ homeekeeki handa alota꞉ Mo hamoko wanda꞉halima꞉ Koda꞉na꞉ Kilu Tombuao Hala꞉eki pa꞉ta꞉ honda꞉ pamba꞉peketa꞉ tanda wopu pa꞉la꞉me.