Lucas 1:31-77

³¹Meglaman ka, aw tebawan ka te batà meama. Ingedanan no se batà ki Jesus.

³²Melangkaw sikandin, aw doen gulal din Batà te Timanem Melangkaw. Ipelowan sikandin te Timanem iling te peglowan te kemonaan din si David gebii.

³³Lomowan sikandin diyà te kedita te bowad-bowad i Jacob te wedad temanan. Wedad palos temanan te peglowan din.”

³⁴Minikagi si Maria, “Menonen lay iyan? So wedà a pa lumun layok te meama.”

³⁵Timaba se anghil, “Domateng se Espiritu Santo kamno, aw ketebangan ka te tolos te Timanem. Yan se doun te menimanem se batà tomebaw kamno, aw sikandin se Batà te Timanem.

³⁶Nayan, se inayen no si Elisabet, pengkey wedà sikandin pegbatà aw lokes den, meneng miglaman den te enem pa se bolan.

³⁷Wedad palos eked kebatog te Timanem.”

³⁸Minikagi si Maria, “Na, gayed a egtolò te Timanem. Mepakay aw meinang diyà kanak se inikagi nikaw.” Penga niyan, nesayo se anghil.

³⁹Penga niyan te wedà kenamay, nesayo si Maria aw mig-ayas doton te bontod taman te sebad lonsod sakop te probinsya te Judiya.

⁴⁰Pegdateng din doton, nenayit te balay te emayen din si Zacarias aw timawal ki Elisabet.

⁴¹Pegdineg i Elisabet te tawal din, miniwal se batà kidoen te getek din, aw dimateng se Espiritu Santo diyà ki Elisabet.

⁴²Timawal sikandin te dakel se kagi din, “Diyà te kedita te bayi, sikona se binegayan te Timanem te ontò dakel keluba. Begayan din heman te keluba se batà tomebaw diyà kamno.

⁴³Nepela a so pengkey sikona se inay te Pengolo ko, meneng limaoy ka kanak.

⁴⁴Pegdineg ko te kagi no, miniwal se batà kidoen te getek ko tandà te luba din.

⁴⁵Doen den keluba nikaw, so nemenal ka te metoman se kagi ingkeliwat diyà kamno lekat te Pengolo.”

⁴⁶Penga niyan, minikagi si Maria, “Ipegduyun ko se Pengolo,

⁴⁷aw ontò neluba se pedowan ko tandà te Timanem egpelowà kanak,

⁴⁸so pengkey ontò a medanà diyà kandin, meneng neeneng-enengan a din. Yan se doun te mikagi se kedita te otaw te binegayan a te Timanem te ontò dakel keluba,

⁴⁹so ontò mèpiya se ininang te Timanem metolos diyà kanak. Ontò sikandin metòlid.

⁵⁰Lekat te ketebò te keneyonan lamig te temanan, gayed din egkeidowan se kedita te otaw egsagman aw egtolò kandin.

⁵¹Ipetaga-taga din te metolos sikandin pineokit te eg-inangen din. Ipekadas din se menge otaw eg-aneng-aneng te melangkaw dan.

⁵²Ebaten din se melangkaw selotan lekat te onsedanan dan te peglowan, aw inangen din melangkaw se menge otaw medanà.

⁵³Begayan din se otaw sagkep te mèpiya tabang, meneng ipekesayo din se otaw meyaman te wedad ibegay kandan.

⁵⁴Tebangan din kidon menge bowad-bowad i Israel pinemallì din, so eked din palos kelibeli se pakang din diyà te menge kemonaan tadon te gayed din keidowan si Abraham aw menge bowad-bowad din te wedad temanan.”

⁵⁶Nayan, mig-ogpà si Maria diyà ki Elisabet taman te menge telo se bolan, aw penga niyan minolì.

⁵⁷Nayan, pegdateng te aldaw te pegpetebaw i Elisabet, timebaw se batà din meama.

⁵⁸Pegdineg te menge kedomaan din aw menge simbalay din kenyan, neluba dan heman so ontò sikandin neidowan te Timanem.

⁵⁹Pegdateng te ikewalo te aldaw lekat te pegtebaw din, netipon dan amon tolien aw ingedanan se batà. Ibeg dan ingedanan heman sikandin ki Zacarias, onawa te ngadan te amay din.

⁶⁰Meneng minikagi si Elisabet, “Eked iyan kepakay, so ingedanan sikandin ki Juan.”

⁶¹Minikagi dan, “Meneng wedad palos kedomaan no iningedanan kenyan.”

⁶²Penga niyan, siminyas dan diyà ki Zacarias bingelen pa aw eden se ibeg din iingadan.

⁶³Siminyas heman sikandin aw nemoyò te solatan, aw insolat din se kagi, “Ingedanan sikandin ki Juan.” Ontò nepela se kedita dan.

⁶⁴Pegketà negolian se pegkeomo din aw nekeikagi aw dimuyun sikandin te Timanem.

⁶⁵Nelemitan se kedita te simbalay dan. Ontò iyan nedengeg kidoen te menge bontod doton te Judiya, so yan se pigsempetanen dan.

⁶⁶Neeneng-enengan dan se dinineg dan, aw netegahan dan te meinang medengeg se batà sìyan, so egdomaan sikandin te Pengolo metolos.

⁶⁷Nayan, dimateng se Espiritu Santo diyà ki Zacarias, aw ingkeliwat din se kagi te Timanem, kagi din,

⁶⁸“Iduyun se Pengolo tadon Timanem egseligan te kedita tadon menge bowad-bowad i Israel, so doen isogò din megpelowà kenitadon menge sakop din, aw imetayan sikandin iselilin kenitadon.

⁶⁹Doen isogò te Timanem metolos megpelowà kenitadon, sìyan bowad-bowad i David egtolò te Timanem gebii.

⁷⁰Yan se impakang te Timanem gebii pineokit te menge telekeliwat te kagi din, so minikagi sikandin

⁷¹te tebangan kidon din amon mekelowà kidon lekat te belad te poon tadon.

⁷²Metoman kidon din keidowan, so yan se impakang din diyà te menge kemonaan tadon. Eked din kelibeli se impakang din gebii,

⁷³so ontò migpakang diyà te kemonaan tadon si Abraham

⁷⁴te ipelowà kidon din lekat te belad te menge poon tadon, amon mekesimba kidon diyà kandin te wedad kelemitanan.

⁷⁵Ibeg din menimanem kidon aw metòlid se inangen tadon diyà kandin dalem te peg-ogpà tadon dini te keneyonan.

⁷⁶Nayan, sikona batà ko, meinang ka telekeliwat te kagi te Timanem melangkaw. Mekeonà ka doton te menge otaw amon meketagad dan te pegdateng te Pengolo,

⁷⁷so sikona se megpetaga-taga diyà te menge Judiyo te ipelowà din se menge sakop din lekat te pelumun aw pegwedaden din se salà tadon.