Lucas 1:31-77

³¹Su ogkabodos ka aw og-anak ka to yukos. Jesus to ihingadan nu kandin.

³²Yabow yagboy sikandin aw ogkatawag no Anak to Diyus no Yabow to Tibo. Igbogoy kandin to Ginuu no Diyus to pagkahari ni David no minuna din.

³³Ogmanduan din to kaliwatan ni Jacob hangtod to wada katapusan. Wada pagkatapus to paghari din.”

³⁴Mig-usip si Maria, “Og-amonuhon man to pagkatuman to sikan no daega a pad man yagboy?”

³⁵Migtabak sikan anghil, “Ogkonsadan ka to Ispiritu Santu aw oggahoman ka to Diyus no Yabow to Tibo. Kaling man sikan balaan no bata ogkatawag no Anak to Diyus.

³⁶Aw ngani man si Elisabet no parenti nu no nabujag on no wada panganak, di ikaonom on no buyan to pagkabodos din.

³⁷Su wada malisod no kona ogkahimuan to Diyus.”

³⁸Kagi ni Maria, “Suguonon a to Ginuu ku. Matuman podom sikan pig-ikagi nu kanay.” Dajun likat sikan anghil.

³⁹Wada kayugoy migdali si Maria to pag-andiya ki Elisabet no mig-ugpa diya to songo yunsud duon to kabubunganan no sakup to Judea.

⁴⁰Pagtidow din duon to bayoy onni Zacarias, pigpangumusta din si Elisabet.

⁴¹Pagdinog ni Elisabet to pangumusta ni Maria, mighisu to maagbot sikan bata duon to sed to gotok din. Dajun piggahoman si Elisabet to Ispiritu Santu

⁴²aw makaikagi sikandin to maagbot, “To tibo mgo bohi, sikuna to pigmadojawan to Diyus. Ogmadojawan din isab sikan bata no ig-anak nu.

⁴³Hintawa a man no pig-andinihan nu no inoy to Ginuu ku?

⁴⁴Su pagdinog ku to pangumusta nu, mighisu to maagbot seini bata kani to sed to gotok ku tongod to kalipay.

⁴⁵Madojow ka su migtuu ka man no ogkatuman to diya kagi to Ginuu ikow.”

⁴⁶Dajun ikagi si Maria, “Ogsajaon ku to Ginuu ku.

⁴⁷Malipajon a tongod to Diyus no Manyuyuwas ku,

⁴⁸su pigkayuujan a din no obos no suguonon din. Sugud kuntoon, to tibo mgo otow og-iling no madojow a

⁴⁹su kabeynganan yagboy to pigpanghinang kanay to Gamhanan no Diyus. Balaan yagboy sikandin.

⁵⁰Ogkayuujan din to mgo otow no ogtahud yagboy kandin to diya una dow kuntoon aw hangtod to wada katapusan.

⁵¹Impakita din to pagkagamhanan din. Pigpagsuwoy-suwoy din to mgo otow no mapayabi-yabihon.

⁵²To mgo magmamandu pigpanggawangan din to katongod, di to mgo mapaobsanon pigpayabow din.

⁵³To pigpamontas pighantoy din, di to mgo sapian pigpanggawangan din.

⁵⁴Pigtabangan din to mgo kaliwat ni Israel no suguonon din. Wada din kalingawi to saad din to pagkayuuy ki Abraham dow to mgo kaliwat din hangtod to wada katapusan.”

⁵⁶Tatoyu no buyan to pag-ugpa ni Maria duon ki Elisabet ayha sikandin uli.

⁵⁷Na, pag-anak ni Elisabet, yukos iyan to ing-anak din.

⁵⁸Pagdinog to mgo sumbayoy dow kasuunan din no mig-anak on sikandin, migduyug sikandan to kalipay din, su pigkayuujan yagboy si Elisabet to Ginuu.

⁵⁹Anoy man no wayu on no aedow sikan bata, namanhimun sikandan su ogtulion aw oghingadanan sikandin. Igsangay podom sikandin ki Zacarias no amoy din,

⁶⁰di wada sugut si Elisabet. Kagi din, “Kona ogkahimu. Si Juan da to ighingadan to seini bata.”

⁶¹Kagi dan ki Elisabet, “Di wada pad parenti now no angod to sikan no ngadan.”

⁶²Pigsingyasan dan sikan amoy dow hintawa to ighingadan din to sikan bata.

⁶³Dajun pamuju si Zacarias to ogkasuyatan aw suyat, “Juan to ihingadan kandin.” Kaling yagboy natingaya sikan tibo mgo otow no nahimun duon.

⁶⁴Duon-dajun nakaikagi si Zacarias, aw pigsaja din to Diyus.

⁶⁵To mgo sumbayoy dan hilabi naboyong to sikan milagru no pighinang to Diyus, aw migtangkap to nawnangonon bahin to sikan diya to kabubunganan to prubinsya to Judea.

⁶⁶Sikan nadinog to mgo otow pighipidan duon to ginhawa dan. Kagi dan, “Nokoy man buwa to ogkadeygan to sikan no bataa?” Su mapajag no piggahoman sikandin to Diyus.

⁶⁷Na, si Zacarias no amoy to sikan bata piggahoman to Ispiritu Santu. Dajun din naikagi to impaikagi kandin to Diyus no pig-iling,

⁶⁸“Sajaon to Ginuu no Diyus ta no mgo kaliwat ni Israel, su mig-andini sikandin to pagyuwas to kaotawan din.

⁶⁹Igbogoy din ita to gamhanan no Manyuyuwas no kaliwat ni Hari David no suguonon din.

⁷⁰Impabaja to Diyus to kagi din to mgo otow no kibali ba-ba din to diya una

⁷¹no pig-iling no ogyuwason ki din to mgo kuntra ta.

⁷²Pigkayuujan din to mgo kaaw-apuan ta. Wada din kalingawi to kasabutan din kandan.

⁷³Insaad din ki Abraham no minuna ta duma to sapa

⁷⁴no ogtabangan ki din agun kona ki madaog-daog to mgo kuntra ta aw kona ki mahaedok to pagtuman kandin

⁷⁵no matarong ki kanunoy aw wada sae duon to atubangan din.

⁷⁶Na, sikuna no bata, og-ilingon ka to kibali ba-ba to Diyus no Yabow to Tibo, su og-una-una ka to Ginuu agun mahinaat nu to kaotawan to pagtidow din.

⁷⁷Ogmaanon nu to angod ta no mgo Hibru no ogkayuwas sikandan ko pasayluhon to mgo sae dan