Lucas 1:31-77

³¹Benómona úruereitɨo, íemona o jitó jócoitɨo. Afémɨe mámecɨ Jesuna jɨ́taitɨo.

³²Afémɨe ñúefuena ɨere jálleite. Afémɨe caifo monamo ite Juzíñamui Jitóite. Naui Juzíñamui bínɨe jaiáidɨgɨma David illáɨmana ória izói, bie Jesuna Juzíñamui illáɨmana óreite,

³³jaca nɨnomo Israel náɨraɨmo illáɨmana íllena. Ie illáɨmana íllana jaca nɨnomo fúiñeite, —daɨde.

³⁴Ie jira María Juzíñamui abɨ ímɨemo jɨcánote: —¿Nɨe izói bie mei ite, mei cue ɨima dɨga iñédɨcueza? —daɨde.

³⁵Juzíñamui abɨ ímɨe uai ote: —Juzíñamui Ñuera Joreño omo itábicaite. Iemo caifo monamo ite Juzíñamui ie rɨ́inodo ona ráiruite. Ie jira o jocolle jitó jaca Juzíñamui mamécamɨena ite. Iemona comɨnɨ íena Juzíñamui Jitó dáɨitiaɨoɨ.

³⁶‘Iemo jɨáɨ o onógango Elisabet úruereite, jamánomo ei rɨngo íadɨ. Ie jira úruenitɨngo íaɨoɨ daɨnango íadɨ, seis dɨga fɨui íllamona ja úruereacade.

³⁷Juzíñamuimona jaca fɨnónide raana iñede, —daɨde.

³⁸Ie jira María daɨde: —Juzíñamui ócuifɨregangodɨcue. Mai mei Juzíñamui cuena ie daɨna izói cuemo fɨ́noiteza, —daɨde. Afemona Juzíñamui abɨ ímɨe oni jaide.

³⁹Aféruillaɨdo María Judea íduaɨ cɨ́gɨri ite jófuemo raɨre jaide.

⁴⁰Dúcɨillano Zacarías jofomo jaide. Daɨí ñeta Elisabet uáidote.

⁴¹Elisabet daɨí uáidua cacáillano eromo ite úrue niráɨricaide. Afe llezica afengo Juzíñamui Ñuera Joréñodo úicaitaga.

⁴²Ie jira ɨere fɨcɨ́rede uaido úrite: —Nana jɨáɨngotɨaɨ baɨmo Juzíñamui ɨere caɨmare omo eroide, ñúefue omo fɨnóllena. Daje izói o jitomo ɨere caɨmare eroide.

⁴³Ɨere jamáingodɨcue, mei íadɨ cue Ocuíraɨma ei cue eróizaɨbite.

⁴⁴Mei ua, o cue uáidua cacáillano cue eromo ite jitó ɨere ióbillano niráɨricaide.

⁴⁵Juzíñamui ona daɨna o ɨ́ɨnuado ɨere ióbinangodɨo, mei Juzíñamui ona daɨna ñue zúiteza.

⁴⁶Ie jira María daɨde: —Cue joréñodo caɨ Ocuíraɨmamo ñúefue llotɨcue.

⁴⁷Cue Jíllotaraɨma Juzíñamuimo cue comecɨ ióbicaide.

⁴⁸Mei Juzíñamui ie dúerede ocuícaɨngona uibíoicaideza. Biruímona nana uire íite comɨnɨ “Ɨere Juzíñamui ióbitagangodɨo” cuena dáɨitiaɨoɨ.

⁴⁹Mei jamánomo rɨ́inorede Juzíñamui ɨere ñúefuiaɨ cuemo fɨnódeza. Afémɨe mámecɨ ñúefuiaɨdo jacɨ́ruiregacɨ.

⁵⁰Nana íena ñue jacɨ́ruitɨnona afémɨe jaca dúecaite.

⁵¹Fɨnónide ráfuiaɨ afémɨe fɨnode. Fɨénidena abɨ ɨ́ɨnotɨnona afémɨe jae anáfenode.

⁵²Rɨ́illaɨnɨna jamáimacɨna Juzíñamui fɨnode. Mei jɨáɨfodo comécɨna mánaɨdɨno illáɨnɨna orede.

⁵³Jufíruitɨnona afémɨe ñúefuiaɨdo imacɨ jeɨ́ritade. Mei jɨáɨfodo ráaredɨnona fia duere imácɨna orede.

⁵⁴Ie ócuifɨregamacɨ Israel naɨraɨ afémɨe canode. Iaɨoɨna duéruillena féitañede.

⁵⁵Naui caɨ móotɨaɨna daɨna izói jaca duéruifɨreite. Ua, Abrahana ie daɨna izói, íemo ie náɨraɨna daɨna izói afémɨe jaca caɨna duéruite. Bie izói María úrilla fuite.

⁵⁶María daámani dɨga fɨui Elisabet dɨga ite. Afe mei meine ie jofomo jaide.

⁵⁷Afe mei Elisabet úrue jocóllɨruimo dúcɨnamo, jitó jocode.

⁵⁸Juzíñamui ñue aféngomo érocaillano fɨdɨ́illano, afengo abɨ imacɨ naa onógamacɨri afengo uáiduaidiaɨoɨ.

⁵⁹Ocho dɨ́garui íllamona, judíuaɨ fɨ́nofɨrena izói, gaɨríracomo jáidiaɨoɨ úrue bacano ɨcoɨ quetállena. Afe llezica ie moo mámecɨna Zacaríasna jɨtáacadiaɨoɨ.

⁶⁰Mei íadɨ ie ei daɨde: —Ɨeñeite. Afémɨe mámecɨ Juaana jɨtalle, —daɨde.

⁶¹Aféngona daɨdíaɨoɨ: —¿Nɨbái mei? O comɨ́nɨmo afe bie mámecɨ iñede, —daɨdíaɨoɨ.

⁶²Ie jira onoɨ níraɨduado úrue moomo jɨcánotiaɨoɨ, nɨe izói mámecɨ jóoneacade.

⁶³Ie jira afémɨe daa cuerábɨcɨ jɨcade áfemo cúellena. Llɨ́ɨnuano cuete: “Ie mámecɨ Juan.” Aferi nana comɨnɨ jacɨ́naitiaɨoɨ.

⁶⁴Afe cuia llezica Zacarías meine nane úrirede. Jira raɨre Juzíñamuimo ñúefuiaɨ llote.

⁶⁵Bíeri nana abɨ imacɨ jacɨ́naioidiaɨoɨ. Iemo nana Judea íduaɨ énɨemo bifue llócadiaɨoɨ.

⁶⁶Nana áfena fɨdɨ́dɨno áfemo ɨere comécɨidiaɨoɨ. Danɨ íaɨoɨ nabáitɨaɨ jɨcánotiaɨoɨ. —¿Bie úrue mɨnɨ́camɨena jáite? Mei uafue, Juzíñamui afémɨemo ɨere caɨmare eróideza, —daɨdíaɨoɨ.

⁶⁷Iemo ie moo Zacarías Juzíñamui Ñuera Joreño úicaillamona úrite; Juzíñamui íemo lloga uaido afémɨe daɨde:

⁶⁸Israel naɨraɨ caɨ ócuifɨrede Juzíñamuimo ñúefue nitárede, mei afémɨe caɨmo éroizaɨbiteza. Ja ie comɨ́nɨdɨcaɨ, íemo afémɨe ja caɨ jíllotaɨbiteza.

⁶⁹Jaiai ie ocuífɨregamɨe David izíemona, daa rɨ́inorede caɨ Jíllotaraɨma caɨmo orede.

⁷⁰Jaiai ñúefuiaɨrede ie uai llóraɨnɨdo uícodo ie daɨna izói afémɨe caɨ Jíllotaraɨmana orede.

⁷¹Afémɨe caɨ faɨríconɨmona caɨna jíllotaite. Daje izói caɨ éoidɨmacɨmona caɨ jíllotaite.

⁷²Caɨ nánoramacɨna duéruite, afe izói ie íaɨoɨna ñúefuiaɨrede daɨna uai féitañede.

⁷³Jaiai caɨ uzuma Abrahana uícodo daɨna uai Juzíñamui uáfuena daɨna. Afe uai bie izói daɨde:

⁷⁴Juzíñamui caɨ faɨríconɨmona caɨna báɨroite, jacɨ́ruiñeno ie ócuifɨregamacɨna caɨ maméillena,

⁷⁵Iemo jɨáɨ ñúefuiaɨdo ie jaɨ́cɨnaidɨmacɨna caɨ íllena, íemo daje izói nana caɨ illáruillaɨdo afémɨemo ñue caɨ jaɨnáillena.

⁷⁶Ie mei cue duera jitó, caifo monamo ite Juzíñamui uai llóraɨmana o mámeitiaɨoɨ, mei Ocuíraɨma uícodo jáitɨoza, ñuera uai llocana uíllena, comɨnɨ íemo ɨ́ɨnollena.

⁷⁷Daje izói afémɨe bíllado ie comɨnɨ ɨ́aɨfuiaɨ féitallena fɨdɨ́taitɨo. Afémacɨ fɨénidɨfuiaɨ féitalledo afémacɨ jílloitiaɨoɨ.