Luk 1:31-77

³¹Wanukn, yon fanetn rhuruhann, yonr hiyaurahn. Nd yonrhu yufat wayutatwanr Jisasr.

³²Nd yonr sinya thombat be tu bro yufet yonr tohrahr. Yimam yuta hakurahmr ‘Tu yura myorhekwa Nkifrarhu Yonr.’ Turhu nkidom Defitr hatohmo bro yufat kindo tfit nd yonr Bro Nkifrar nd bro yufat hirahr.

³³Nd Jekof frikeft yutiwa Isrerm, rorn tohukatohrahrm. Rorn toh yukatoh hanyrahrm yiha yiham.”

³⁴Mariat inji wanyaf hanyhato kfo memot, “Na ndhtet ram duhat meta, to finji kanjone yon faneta rhurhoya?”

³⁵Tfit mounmotr kfo memort, “Bro Nkifrarhu Yafothar mithu nawohruharn, tu myorhekwarhu bbukeftpno toh hnkokn hmbriruharn, nd yonr thu hmbrirahrr. Bro Nkifrar thu hmbri-ruhatrr, to be ndnatn nd yonr yutarahmr Bro Nkifrarhu Yonr.

³⁶Wawanyn, ninhu tangiyem Elisabett nhai yon hiyaurmoat, futamoumt nmbit. Arihat ar bi tabou bugayett, to nhai, to bi tfit yon fanetet. Bi 6-pela yamm yimom.

³⁷Nhai wom tamoh nefthu finji naneft Bro Nkifrar mduka nhiyakkfot.”

³⁸Mariat inji wanyhato tawo kfo memotr, “Wawanyn, na Brorhu hingrnefroh hingrnayuk meta. Kangr nd ror kfiwa tng yuhatn finji anaya, na nhai mrokfom.” Be Mariat inji kfomott, nd mounmotr htanymortn yimor.

³⁹Mariat mounmotr htiyafohato kto rorhu mongkorn rot bmbri Judako yimot. Kminysofm muh wohne fnahhato mifnahmot nd Sekaraia sawohf rhumo kmitn.

⁴⁰Mifnahhato yimot Sekaraia sawohf rhumo kunysn. Kunys fkneni-hato Elisabett rhu hasettn rim kfo yindhoraknimott.

⁴¹Rim kfo yindhoraknimott, nd Elisabetthu yatit rhuyuk yonr ka nd yindhor mrokfot rim pthaknimott, ror riyindhorhato ridbuhatokmor yiro yatitn. Bro Nkifrarhu Yafothar yawihnamorn, Elisabettn mithu nawohmor.

⁴²Mithu nhombramotrt, yimat bro yindhor yima yuhur yakhato Mariat masat kfo ptha memott, “Metroh mkukort be ni Mariann Bro Nkifrar yak marnya bomarnyarahr. Yo nd yatit rhuyuk yonr, ror inji buga yak marnyarahrr. Rpat nimehetfn yak marnyarahrfn.

⁴³Na ndhtet met furapaya, to tamohmpno ar Brorhu mmemt tfit nanpno wanies?

⁴⁴Wawanyn, Maria, na ninhu yarim kfo yindhorakna tngt wanyhato nanhu yatit rhuyuk yonr, ror nd kfo yindhor tngt wanyhato ror rpat riyindhorhato yiro yatitn ridbuhatok yindhorrio.”

⁴⁵Elisabett sinyahato Mariat kfo memott, “Maria, Bror mikfo tanyuk mrokfom ni hifa wany yakiowonm. Ndnatn yak marnya bomarnyarahrn.”

⁴⁶Mariat wanyhato kfo memot, “Nanhu yima yuhur Brorparnko yindhorwor.

⁴⁷Nanhu yima yuhur na minrfa htiyekwa Nkifrarpar yindhorwor.

⁴⁸Na rorhu hingrnefm hingrniwa met furapaya. Nhai marimor met furayet. Nhai. Nanhu rhu nmbuhat htihato hti yuhuwafmora. Arihami kto bok met yindarim na nda Bro Nkifrar yak marnyewa nmbuhat htiruhamn, kfo yindhorrahmt nanhu yufat.

⁴⁹Bro bbuka nanyjaret Nkifrar be tu hifa fak htamora. Ndnatn nanhu yima yuhurio rorhu yufat be inji tahirhut rhuraht.

⁵⁰Arihat tohwa yimami kto tohruha yimam be rorparhu duka yanhowefrpar tohhato rorhu yinhit tohruhamn, rorhu yuhuwafneft be romn rhuraht.

⁵¹Nd yimam turoh yufam yura yura htamoam, rorhu bbuka nanyjaret tirm thu yukehato bi fak thumorm.

⁵²Nd king yufam tohet yimam bi wuyak thurakmotrm, tfit nd yufapa duha yimam bi mfrfnahnimom.

⁵³Yatinohetmn nd hifa hifa shrm bi thu rmonhemor, tfit nd bok wusketm brioh hti marsisafomorm. Nhai wom tamohm hiyafhato yakitohakrmom.

⁵⁴To be ndnettn nd kfo tahi mrokfot bi ruhettn niamor. Niahato turhu hingrna yimam, kutewumm Isrerm, yuhuwafmorm.

⁵⁵Bi bingot Bro Nkifrar Abrahamrpno rikfak memor, ‘Rorhu mongko sinyahato toh hanyuk yimam yiha yiham yuhuwaf hakuruhanm.’”

⁵⁶Mariat husfirpa yamm Elisabettpno toh tanyhato tfit tuthu kmiko yimot.

⁵⁷Elisabetthu yon fant hatoh hanymott, yon hiyau yiharn yon yindarir hiyaumot.

⁵⁸Rothu yifa mndarm inji htihato kfo yindhorhato kfo memom, “Bro Nkifrar hifa hti yuhuwafmort.”

⁵⁹Nd yonr mharhuhato namba 8 dei kfotn yonrhu tha puk thut niamom. Tha puk thunihato yufat memom, “Yifem Sekaraiarhu yufatn tfit hmbrenomr.”

⁶⁰Tfit tu yonrhu mmemtn warhuhato kfo memot, “Mirahko wom yufat ayutanomr. Jon yufatn wayutatwakomr.”

⁶¹Tfit rom kfo memomt, “Nd ni kfiwa Jon yufat nhai ninhu tangim yuta hnarmomt nd yufat.”

⁶²Be inji nna kfonihato memom, “Ka tu yon yifemrn yonrhu yufat yuta nuhasrahrnom.” Ror tng mmkrn btn tire yak nuhashato memoumr, “Yon yufat wayuta nuhasnnom.”

⁶³Sekariar memorm, “Slet mkut wahne hikma.” Slet mkut hnamotmt, Jon yufat wandfa nuhasmorm. Wom yimam inji htihato memom, “Mamai! Ndart tu be womhtet neft hrekrpa htitwonom.”

⁶⁴Yufat wandfani hanyhato ee tort rigrhakhato Bro Nkifrar rikfo ptha yindhor boyindhorakmor.

⁶⁵Sekaraiarhu kmi thofm nd ror namo neft wahtiyafo-mohat nhai wom yafothetm rhurmom. Nd Sekaraiarpno rhumo nefthu mrokfot nhai brbo wom warhu hasormot. Judiakorhof kminysofm rhuyuk kmi bugam wany bugamomt.

⁶⁶Nd yonrhu mrokfom wany hanyuk yimam wanyhato bok dukefm yakmoamn, duka memoum, “Nd yonre warhoni thofte nko finji kanjohot yimar tohruhar?” Rorhu sinya nmbuhat be Bro Nkifrarhu tirmn fak hta bohtamomr. Ndnatn inji duka nhtamom.

⁶⁷Be tfit nd yonrhu yifem Sekaraiar Bro Nkifrarhu Yafothar mithu nawohmotrr, Bro Nkifrarhu mrokfom pthamorm. Kfo ptha memorm,

⁶⁸“O Tunga Nkifrar, arnat bi turhu yon kunys yukatohwarn, be arihatn tfit yak marnyarahrnom.

⁶⁹Turhu hingrna yima Defitrhu frikef yuhathu yimar bi yak htarorn, nom be rorn minrfa htiyakrahrnom.

⁷⁰Bingot bi turhu dborioh profetmpno pthamo yuhatn yak hikhato kfo tkrurafmotrr, niamor.

⁷¹Bi rompno bi kfo hta memor, ‘Nanhu yon kunys yahr kmiroh buha yorhwamn, be hti srhasiwumm. Yirhoyann, miyak htiyakruhanm.’

⁷²Bingot tohmo nmoh nkifram ror yuhuwafmormn, fakmorm. Bingot ror kfo tahimo mrokfot yuhre duka hanitrt.

⁷³Bi bingot tunmoh nkifra Abrahamrpno kfo tahimo yuhatn hikwarn, kangr, ‘Aminrfa htiyakkahanm, tfit tukianhu hingrneft yak htaruhanm.

⁷⁴Tukianhu hingrneft tohruhamn be nhai wom yakrmiruhatm.

⁷⁵Be yiha yiham nanhu yufa yuhat tohruhamn toh marnya bomarnyarahm.’

⁷⁶Ni nda yonn, kto yutarahmn yura myorhekwa Nkifrarhu profetn. Ninn Brorhu nyinga yuhat tohak hanyruhann, rorhu nia yuhat bi ninn yak hta bohta hanyrahnt.

⁷⁷Bi ninn yiruhann, kfo mirahnm, ‘Bro Nkifrar nikmoh fasoh fasoh nefm yak thuhiruharko toh marnyarahko.’