San Lucas 1:31-77

³¹¡Khaway! Wijsallicuspa uj khari Wawata onkocunqui. Paytataj Jesusta sutichanqui.

³²Payka sumaj c'acha, curaj runataj canka, c'ata Diospa Wawan caskanraycu. Tucuy atiyniyoj Dioska payta unay tatan Davidtajina camachinanpaj churanka.

³³Wiñaypajtaj Israel llajtata camachenka. Camachiynintaj ni jayc'ajpis tucuconkachu, —nerka angel.

³⁴Mariataj angelta nerka: —Mana kharitaka rejsinichu. Chayraycu ¿imaynataj cayka cankarí?

³⁵Angeltaj payman cuticherka: —Santo Espíritu kanman uraycamusonka. C'ata Diospa atiynintaj kanta c'anchaycamusonka. Chayraycu wawayqueka mana juchayoj, c'acha rejsiska canka, Diospa cheka Wawan.

³⁶¡Khaway! Aylluyqui Elisabetpis uj khari wawata wijsallicorkaña ashqha watasniyojña cashaspapis. Cunantaj sojta quillaña wijsallicuskan cashan chay mana wawa rejsej niska warmeka.

³⁷Chekatapuni Diospa tucuy niskasnenka junt'aconka, —nispa.

³⁸Chanta María nerka: —Diospa camachin cani. Nokaman niwaskayquimanjina ruwaska cachun, —nispa. Angeltaj paymanta riporka.

³⁹Ajinata María uskhayta waquichicuspa chekanta riporka orko orko Judea jallp'api uj llajtaman.

⁴⁰Chay llajtaman chayaspataj Zacariaspa wasinman yaycorka. Elisabettataj napaycorka.

⁴¹Maríaj napaycuskanta Elisabet uyarejtin wijsanpi wawanka phinquirerka. Elisabetri Santo Espirituwan junt'aska carka.

⁴²Cusiywan khaparispataj Mariata nerka: —Tucuy warmismanta kan astawan curajpaj khawaska canqui Dios kanta ajllacususkanraycu. Wawayquipis may curajpaj khawaska canka.

⁴³Maytapuni cusicuni Señorniypa maman watucuwaskanmanta. Nokaka ni watucunawanpajjinapischu cani.

⁴⁴¡Khaway! Napaycuwaskayquita uyarisojtiy wijsaypi wawa cusiymanta phinquirerka.

⁴⁵May cusiska kanka Señor Dios willasuskanta jap'icuskayquiraycu. Chekamanta nisuskanka junt'aconka, —nispa.

⁴⁶Mariataj nerka: —Mayta jatunchani Diosta tucuy sonkoywan.

⁴⁷Mayta cusicushani juchamanta Cacharichiwajniy Diospi.

⁴⁸Payka camachillan cashajtiypis wajcha caskayta qhuyacuyninwan khawawaspa, nokata ajllacuwarka. Chekamanta cunanmantapacha tucuy runas may cusiska caskayta niwankancu.

⁴⁹Tucuy atiyniyoj cheka Diosmin may jatun imasta nokapaj ruwarka. Payka may c'acha, manapuni juchayojmin.

⁵⁰Unay tatasninchejmantapacha cunancama, Dioska wiñaypaj qhuyacunpuni payta yupaychajcunataka.

⁵¹Dios atiyninwan jatuchej ruwanasta ruwarka. Payka tucuy jatunchacojcunata atipaspa aykeracherka.

⁵²Sajra camachejcunata sumaj tiyanasnincumanta uraycucherka, pisipaj khawaskacunatataj okharerka.

⁵³Yarkhaska runasta allin imaswan sajsacherka. Khapaj runastarí mana imayojta ch'usajllata cachaporka.

⁵⁴Dios ñaupa tatasninchejman niskasninta junt'aspa camachin Israelta yanapaj jamunña. Ajinamanta yuyaricorka qhuyacuyta Abrahamman tucuy paypa mirayninmanpis wiñaypaj, —nerka María.

⁵⁶Payka quinsa quillata Elisabetwan cacuspa wasinman cutiporka.

⁵⁷Elisabetpa onkocunan quilla junt'acorka. Khari wawatataj onkocorka.

⁵⁸Llajta-masisnin ayllusninpiwan uyarerkancu Dios payta cayjinata sumajta qhuyaskanta. Chayraycu paywan cusicorkancu.

⁵⁹Wawaj nacecuskanmanta pusaj p'unchayninpi chay runas payta circuncidaj jamorkancu. Chay señalta cuerponpi churarkancu runas yachanancupaj israelcuna Diospa runasnin caskancuta. Tatan Zacariaspa sutinwantaj sutichayta munasharkancu.

⁶⁰Mamanrí nerka: —Ama. Juanmin sutenka canan tiyan, —nispa.

⁶¹Paycunataj payman cuticherkancu: —Ni pipis chay sutiyojka aylluyquipeka canchu, —nispa.

⁶²Maquisnincuwantaj tatanta tapurerkancu: “¿Ima sutiwantaj sutichayta munanqui?”

⁶³Kelkanata mañacuspa Zacarías kelkarka: “Juanmin sutenka”. Tucuy paycunataj t'ucorkancu.

⁶⁴Chay quiquinpachataj Zacarías ujtawan parlarispa Diosta yupaycharka.

⁶⁵Tucuy llajta-masisnincutaj t'ucorkancu. Judea orkosnintinpi chay ruwacuskanmanta tucuy runas parlanacusharkancu.

⁶⁶Sonkoncupi yuyaspataj uyariskancumanta ninacusharkancu: —Cay wawaka ¿imayna runapunitaj wiñaspa cankarí? —nispa. Imaraycuchus repararkancu Dios paywan cashaskanta yanapananpaj.

⁶⁷Tatan Zacarías Santo Espirituwan junt'a carka. Sut'incharkataj Diospa munayninmanta ruwaskasninmantapis cayjinata:

⁶⁸—Yupaychaska cachun Israelpa Señor Diosnin. Imaraycuchus runasninta qhuyacuspa jamun juchasnincumanta cacharichinanpaj.

⁶⁹Atiyniyoj Cacharichiwajninchejta kowarkanchej camachin Davidpa ayllunmanta.

⁷⁰Caytaka ajinatapuni Dios unayña payman t'akaska willajcunanejta nerka:

⁷¹“Enemigosniyquichejmanta cacharichiskayquichej tucuy chejnisojcunayquichejpa atiynincumanta”, nispa.

⁷²Ajinapi Dios unay tatasninchejta qhuyarka, paypa sumaj tratonta paycunaman junt'arkataj.

⁷³Dios unay tatanchej Abrahamman juraspa chekatapuni nerka:

⁷⁴“Enemigosniyquichejmanta cacharichiskayquichej paycunata mana manchachicuspa nokata yupaychanawayquichejpaj.

⁷⁵Ajinata cusichiwaspa chekanta ruwanquichej ñaupakeypi tucuy causayniyquichejpi”, nispa.

⁷⁶Kanrí, wawáy, c'ata Diospa willajnin niska canqui. Diospa ajllaskan jamunanpaj ñaupakenta rinqui runaspa sonkosnincuta waquichipuspa.

⁷⁷Diospa runasninta yachachinqui juchasnincuta khechuspa Dios paycunata cacharichinanta.