Luka 1:31-77

³¹Kogoga inda na kolela mwana wa kimbigalo, nayo komkema Yesu.

³²Kokuwa munhu mkulu, kokemigwa Mwana wa Mulungu yeli Uchanha Ng'hani. Mndewa Mulungu komgwaa kigoda cha undewa, kamba viyakalile Daudi muhenga wake.

³³Kokuwa mtawala wa lukolo lwa Yakobo siku zose, na undewa wake wokuwa wa mazuwa gose!”

³⁴Malia kamuuza msenga ija, “Niye na mhambe. Lelo mbuli ayo yokuwaze?”

³⁵Msenga ija kamwidika, “Loho Yang'alile kokwizila, na nguvu za Mulungu zokugubika. Avo Mwana yonda yavumbuke kokuwa Yang'alile na kokemigwa Mwana wa Mulungu.

³⁶Kumbuka ndugu yako Elizabeti. Wanhu wakala wolonga kakala mgumba, lakini sambi kana inda ya miezi sita, hamoja na uvele uyalinao.

³⁷Kwavija kuduhu kinhu kimulemela Mulungu.”

³⁸Malia kalonga, “Niye na msang'hanaji wa Mndewa, nailawilile kumwangu kamba viulongile.” Abaho msenga ija kasegela.

³⁹Kumwande kidogo Malia kafunga mwanza, kalopola kuchola kuna idibuga dili mvigongo va isi ya Yudea.

⁴⁰Kengila mng'anda ya Zakalia, kamulamusa Elizabeti.

⁴¹Elizabeti viyahulike Malia komulamusa, king'hele kili mna iinda yake kizumha. Nayo Elizabeti kamemezigwa Loho Yang'alile,

⁴²kalonga kwa sauti ng'hulu, “Gweye kunogeligwa kubanza watwanzi wose, na imwana yonda umulele konogeligwa!

⁴³Habali mbuli ino ng'hulu inilawilile niye, mbaka mama wa Mndewa wangu keza kunhembelela?

⁴⁴Vimhulike kondamusa, mwana king'hele yeli mna iinda yangu kazumha kwa kudeng'helela.

⁴⁵Kumweda gweye utogola usenga wa Mndewa, kwavija wolawilila kumwako!”

⁴⁶Malia kalonga, “Moyo wangu womgwaa nhogolwa Mndewa,

⁴⁷Loho yangu yomdeng'helela kwavija Mulungu Mkombola wangu,

⁴⁸kang'humbuka, niye msang'hanaji wake muhole! Kulawa sambi wanhu wose wong'hema munhu yamwedile,

⁴⁹kwavija Mulungu Mkulu kanhendela vinhu vikulu. Twaga jake ding'ala.

⁵⁰Kulawa lukolo na lukolo, kowonela bazi wanhu wose womtegeleza.

⁵¹Katenda mbuli ng'hulu kwa mkono wake. Kawapwililisa wanhu weli na magoda mmizoyo yao.

⁵²Kawahumulusa wandewa mna ivigoda vao va undewa, na kawenula wahole.

⁵³Weli na nzala kawatenda wegute kwa vinhu vinogile na kawawinga matajili makono gaiyeka.

⁵⁴Kasang'hana kija kiyalongile kwa wahenga zetu, keza kumtaza msang'hanaji wake Izilaeli.

⁵⁵Kakumbuka kumonela bazi Abulahamu, na lukolo lwake lose siku zose!”

⁵⁶Malia kakala kwa Elizabeti miezi midatu, abaho kabwela ukayake.

⁵⁷Kipindi cha kuifungula Elizabeti vikivikile, kaifungula mwana wa kimbigalo.

⁵⁸Wanhu weli behi nayo na ndugu zake viwahulike mbuli ng'hulu ziyatendeligwe na Mndewa, wadeng'helela hamoja nayo.

⁵⁹Imwana viyavikize siku nane, wamwingiza kumbi. Walonda kumkema Zakalia, twaga da tatake,

⁶⁰lakini mamake kalonga, “Bule, twaga jake Yohana.”

⁶¹Wamulongela, “Kuduhu munhu mulukolo lwenu yeli na twaga dijo!”

⁶²Abaho wamgwaa kilaguso tatake, wamuuza twaga gani diyalondile mwanage yakemigwe.

⁶³Zakalia kawapula kibao cha kwandikila, kandika vino, “Twaga jake Yohana.” Wanhu wose wakanganya!

⁶⁴Bahaja Zakalia kadaha kulonga, kamgwaa nhogolwa Mulungu.

⁶⁵Wanhu weli behi nayo wadumba ng'hani. Mbuli izo za unzonza zibwililika kila hanhu kuvigongo va isi ya Yudea.

⁶⁶Kila munhu yahulike mbuli ayo kaigelegeza, kauza, “Vino mwana ino kokuwa nani?” Kwavija udahi wa Mndewa ukala hamoja nayo.

⁶⁷Zakalia tatake Yohana kamemezigwa Loho Yang'alile, kalonga usenga wa Mulungu,

⁶⁸“Yatogoligwe Mndewa, Mulungu wa Izilaeli! Keza kuwataza wanhu zake na kuwagombola.

⁶⁹Katugwaa Mkombola yeli na udahi, mzukulu wa Daudi msang'hanaji wake.

⁷⁰Kamba viyalongile toka mwaka kubitila watula ndagu zake wang'alile,

⁷¹kamba kotukombola na wanhu wang'hobo, na kulawa mmakono ga wanhu watwihile.

⁷²Kalonga kowonela bazi wahenga zetu, na kokumbuka lagano jake ding'alile.

⁷³Kaiduila kwa muhenga wetu Abulahamu,

⁷⁴kutukombola mmakono ga wanhu watwihile, na kututenda tumsang'hanile bila kudumba,

⁷⁵tuwe wanhu wang'alile na wanhu wotenda goyolonda Mulungu, siku zose za ugima wetu.

⁷⁶Gweye mwanangu, kokemigwa mtula ndagu wa Mulungu yeli Uchanha Ng'hani. Komulongolela Mndewa, kuitanda nzila yake.

⁷⁷Kowalongela wanhu zake kamba wokomboligwa, na nzambi zao zogeligwa kumgongo.