Lucas 1:31-77

³¹Tsemi qeshyaq tucunqui. Y ollqum wamrequi canqa. Yuricuriptinmi, jutin churanqui “Jesusta”.

³²Pemi allapa puedeq canqa, y sielucho Diospa tsurin nishqam canqa. Pepa une awilitun Davidta mandacoq cananpaq churashqannollam, Jesusta Dios churanqa mandacunanpaq.

³³Israel nunacunapa mandacoqninmi canqa imecamayaqpis; y pepa mandaquinenqa manam ushacanqatsu.

³⁴Tsenam anjelta Maria taporqan: —¿Imanotaq tse nimanqequi canqa? Noqaqa donsellam cacü.

³⁵Anjelnam nerqan: —Santu Espiritu qamman shamurninmi, camanqa juc wamrata, sielucho quecaq Diospa poderninwan qeshyaq tucurinequipaq. Santu wawequinam Diospa tsurin canqa.

³⁶Musyë, primequi Isabelpis tsatsa queninchomi “mana wachacoq” nicayaptinpis joqta quillayoqna qeshyaq quecan.

³⁷Porqui Diospaqqa manam imapis sasatsu.

³⁸Tsenam Maria nerqan: —Noqaqa Diospa sirweqninmi cä. Qam nimanqequino callätsun. Tsenam anjel eucorqan.

³⁹Tsepeqnam Maria ajalla alistacurir, Judea marcapa jallqanman Isabel caqta eucorqan.

⁴⁰Zacariaspa wayinman yecurirnam, Isabelta taririr, saludarerqan.

⁴¹Maria tseno saludariptinnam, Isabelpa pachancho wamra cushicurnin cuyorqan. Isabelnam Santu Espiritupa poderninwan

⁴²fuertipa queno nerqan: —Waquin warmicunapitapis qamtam Dios bendisishorqonqui, y wawequipis benditum.

⁴³¿Pitaq noqallä cä, Dioslläpa mamänin watuquecamänequipaq!

⁴⁴Saludamanqequita wiyariptïmi, pachächo wamra cushicurnin cuyushqa.

⁴⁵Dios nishonqequi cumplicänanpaq caqta creyinqequirecurmi, bendisishqa canqui, nir.

⁴⁶Tsenam Maria queno nerqan: “Diostam noqa allapa alabecü.

⁴⁷Salbamaqnï Diospaqmi shonqullä allapa cushicun.

⁴⁸Qollmi shonqu sirweqnin canqätam, pe ricamashqa. Cananpita witsepanam llapan nunacuna willanacuyanqa Dios bendisimashqanta.

⁴⁹Diosmi puedeq queninwan, noqapaq allicunata rurashqa. Pëqa santu carmi, allapa alli.

⁵⁰Mandacushqancunata wiyacoqcunatam Dios ancupan; castancunatapis ancupanqam.

⁵¹Puedeq queninwanmi ima sasa caqcunatapis ruran. Alli tucoqcunatam mana baleqpaq churan.

⁵²Mandacoqcunatam mandacuyanqanpita qarqurerqa, qollmi shonquyoqcunatanam mandacuyänanpaq churarerqan.

⁵³Wactsacunatanam imecanpis qoycorqan. Ricucunapataqa llapannintam ushacäratserqan.

⁵⁴Sirweqnin israel nunacunatam ancuparnin,

⁵⁵une awiluntsic Abrahamta castancunatawan änerqan, imecamayaqpis ancupänanpaq” nir.

⁵⁶Tsecho Maria Isabelwan quima quilla täcurirnam, wayinman cuticorqan.

⁵⁷Isabelpa quillan tincuriptinnam, qeshpicurerqan juc ollqu wamrata.

⁵⁸Tseta besinuncuna castancunawan musyarirninnam, Isabelman ewar allapa cushicuyarqan, “Diosmi ancuparnin, wawan qoycushqa” nirnin.

⁵⁹Wamra semanayoq quecaptinnam, shayämorqan señalatseq. Tsechonam papänin Zacariaspa jutinta chureta munayarqan.

⁶⁰Peru mamäninnam queno nerqan: —¡Ama! ¡Jutenqa Juanmi canqa! —nir.

⁶¹Nunacunanam niyarqan: —¿Imanir? ¡Castequicunacho manataq pipis cantsu Juan jutiyoq!

⁶²Tseno nirninnam, Zacariasta señasllapa tapuyarqan: —Tsuriquipa jutin ¿imatataq churanqui? —nishpa.

⁶³Tsenam ichic tablata mañacurir, escribirerqan queno: “Jutenqa Juanmi canqa” nishpa. Tseta leyirirnam, nunacuna mantsacashqa quedariyarqan.

⁶⁴Tsellanam Zacarias parlar qallecorqan, Diosta alabarnin.

⁶⁵Jinantin Judea jirca marcacunachomi nunacuna mantsacashqa willacuyarqan tse llapan pasacushqanta.

⁶⁶Tseta wiyarirnam, yarpacacharnin queno ninacuyarqan: —Tse wamraqa ¿imano caqraq canqa, Diospa muneninwan quecarnin? —nir.

⁶⁷Papänin Zacariasnam Santu Espiritupa poderninwan queno nerqan:

⁶⁸“Israel marca mayicuna, llapantsic grasiasta qor, ¡alabashun Diosnintsicta! Pemi noqantsicta rescatamarnintsic, salbamäshun.

⁶⁹Salbamänantsicpaqmi Diospa sirweqnin une rey Davidpa castancho, juc puedeq salbador yuricunanpaq quecan.

⁷⁰Que salbador yuricunanpaqmi Diosnintsic änicurnin, une profetancunatawan willacatsimorqan, queno nishpa:

⁷¹‘Chiquiyäshoqniquicunapitam noqa jorquyashqequi y salbayashqequi’ nir.

⁷²Une castantsiccunata ancuparninmi, tse änenqanta Dios canan cumplenqa.

⁷³Une awiluntsic Abrahamtam Dios änerqan

⁷⁴chiquimaqnintsiccunapita salbamänantsicpaq, y pellatana mana mantsacushpa sirwinantsicpaq.

⁷⁵Tsemi pellapaqna car allicunata rurarnin, cawenintsiccho sirwishun.

⁷⁶Y qam llullu wamra, sielucho quecaq Diospa profetanmi canqui. Diospa tsurin shamunanpaqmi puntata ewar, nunacunata willapanqui,

⁷⁷queno nishpa: ‘Israel nunacuna jutsa rurayashqequicunapitam, Dios perdonayäshurniqui, salbayäshunqui’ nir.