Luke 1:31-77

³¹Ighoe ko bohe mo ko vahua a dalemu na mane, mo ko vatua nia Jesus.

³²Agaia ke haba, ma kara holoa nia Dalena God puku ni haba. Agaia Lord God ke sopou laghinia tana malei haba, vaghaa David na vunaghi haba a kukuana.

³³Ma gaia ke vunaghi pungisira na vure ni Israel, ke mua soko nina kinakabu.”

³⁴Mary te bosa vania na angel me ghaghua, “Inau na tahula marabu. ?Ivei ke ghaghua eni ge ke kale?”

³⁵Na angel te bosa tughu vania me ghaghua, “Na Tarunga Tabu ke mai itamua, ma nina maana God ke kuvihigho. Mana pukuna eni, na gari ko vahua te tabu ma kara holoa nia na Dalena God.

³⁶O ghanaghanaa so a hoghomu Elizabeth ke vahua na garimane, hauva ma gaia te tonikama tua. Tara bosa gaia te mua tangomana na logho gari, mo ko righia gaia te poloi tua e ono na vula itaeni.

³⁷Na pukuna e taho na hava ke vahola vania God na neana.”

³⁸Mary te bosa, “Inau nina tinoni lutu Lord. E uto so, ke kale na hava to bosaa vaniu.” Mana angel te tona sania gaia.

³⁹Mi murina vasoo eni, Mary te kuikuti me mina tona ta sakai na komu tana lei ghotu i Judea.

⁴⁰Mary te sara haghe tana valena Zechariah, me bosautoa Elizabeth.

⁴¹Tana bona te rongovighi Elizabeth na bosauto raini, na meomeo tana kutuna te soghasogha. Gaia Elizabeth te vonughia na Tarunga Tabu,

⁴²te ghaeghahe me ghaghua, “God te vautogho va itadira na lei vaivine soko, me ke vautoa na gari ko vahua.

⁴³?E ghua vaho ge ke kale vaniu na ghanaghana eni, ge agaia tinana nigua na Lord te mai kaou?

⁴⁴Mi tana bona tu rongovia to bosautou, na meomeo tana kutugu te nia soghasogha na togotogo.

⁴⁵God te vautogho na pukuna to taluutunia anina rongorongo ni baubahu Lord God vanigho ke kale utuni!”

⁴⁶Mary te ghaghua, “Na tobagu te holohabaa Lord

⁴⁷Mana tarungagu te nia togotogo gaia God, na vavolagu

⁴⁸na pukuna gaia te righitaoniu inau, nina tinoni lutu, hauva ka inau tu mua haba. Itaeni ke vuivuni, na lei vure soko kara holou nia Na vaivine God te vautoa,

⁴⁹na pukuna na lei totobo sule, God puku ni maana te nei vaniu. Te tabu na ahana.

⁵⁰Tana lei vavata mana vavata, te tatei vanira lei nina veiarovi arahei tara talumavaa.

⁵¹Nia na maana gaia te nei na lei totobo sule, ge havukaghinira tara talunaghora heghedira nia na ghanaghana tana kutudira.

⁵²Me ghora horura tana malei sopoudira tara haba; ge taludatora igaa rana talumuri.

⁵³Gaia te va kutira tara vitolo nia na lei totobo te uto, me ghuru kokobara tara sodorongo.

⁵⁴God te hangara na vure ni Israel, tara nina tinoni lutu, me ghanaghana tatera vanira na veiarovi nina vure talau,

⁵⁵na pukuna te talumavaa nina baubahu eni te nea vanira na lei vavatada, gaia te baubahu eni vania Abraham mana lei vavatana ke va me va!”

⁵⁶Mary te ghaha kolua Elizabeth, e tolu na vula vaho ge oli tana komuna.

⁵⁷Me sara na bona ge vahuhu Elizabeth, me vahua na garimane.

⁵⁸Agaira rana lei kukuana mana ghana komukolu Elizabeth tara rongovia na hava te nei vania Lord, mara togotogo koukolu itatana.

⁵⁹Me vitu vamua na bongina na meomeo, ge ra pahevaughilalana, te taonia nina vetena Moses, ma gaira tara liona ge kara vatua nia na ahana tamana, Zechariah.

⁶⁰Ma tinana te ghaghua vanira, “Taho, na ahana ke a John.”

⁶¹Ma gaira tara bosa vania tinana mara ghaghua, “E taho na aha eni tadira na lei kulamiu.”

⁶²Gaira tara kokoe pui vania tamana na gari, keri ge ra ghilala na aha Zechariah te liona.

⁶³Gaia te kokoe pui vanira ge kara hea na vatu ni gegere, me gerea te ghaghua, “Na ahana a John.” Ma gaira udolu tara nia hare!

⁶⁴Mi tana bona ni aho kiri, na lapina Zechariah te maluate, me ghoi kokoe oli ghua, me vuni na holohabaana God.

⁶⁵Ma gaira na ghadira komukolu tara nia hare, mana tutugui na lei totobo te kale raini te lada tana lei komu tana ghotu talighu tana bubulo Judea.

⁶⁶Gaira soko tara rongovia tara kene ghanaghana tana liodira, mara ghaghua, “?Ivei vaho ke vaghaa na gari eni ke sule?” Tara bosai raini na pukuna te tate tua itatana nina maana God.

⁶⁷Zechariah tamana John te vonughia na Tarunga Tabu ge bosatatea na bosana God, me ghaghua,

⁶⁸“Mai ghita ka bosautoa Lord, dida God ni Israel, na pukuna gaia te mai ge ke huiolira nina vure.

⁶⁹Gaia te vetenaa vanighita mai na vavola te maana, na vaivarina na vunaghi haba David, nina tinoni lutu.

⁷⁰Te vagha God te nia baubahu tana bosadira nina lei prophet idania mai.

⁷¹Ge ke volaghita itadira ghada na kana, mi ta didira na maana arahei tara nighita sika,

⁷²Gaia te tatea nina veiarovi tadira na vaivarida, na pukuna te ghanaghana olia nina baubahu te tabu,

⁷³Na bosa ni papari eni, te bahua nia na vaivarida Abraham

⁷⁴ge ke volaghita itadira na ghada kana me ke hangaghita ge ka lutu uto vania, ka mua mataghu.

⁷⁵Keri ge ighita udolu ka tabu, ma ka kabu maemane vania tana lei bongi ni volada.

⁷⁶Mi ghoe dalegu, kara hologho nia nina prophet God puku ni haba, na pukuna ko ghidevia Lord, ge ko gonidilaa na halautuna.

⁷⁷Ge ko bosaa vanira nina vure nia na rongorongo ni huioli, tana bona God te talukehai lei paludira.