Lucas 1:31-77

³¹Ech saꞌan tiichajla yaabꞌil. Sachee maꞌl iitzꞌin, tal xiak. Utz Jesuus ibꞌii looksa.

³²Tan techal talcheꞌ siꞌaneꞌ. IKꞌaol u Tꞌankin Tioxh saꞌalchi. Tan ijlenal saꞌaqꞌaxku bꞌen tu u Tioxh u kuBꞌaals Amlika, echaꞌ u tijleꞌm u Daviid tan, ikꞌuy imam.

³³Utz bꞌenamen saꞌatin tu viQꞌesalail xoꞌl qꞌul ituꞌxh ixalam u Jacoob. Yeꞌk iyaꞌebꞌal viQꞌesalail siꞌaneꞌ.— Texhtuꞌ.

³⁴Ech aatz u Liꞌ tan, tal tek tu u aanjel ech tzaꞌ: —¿Kam tokeꞌ tan, aal yeꞌ vootzaj vinaj?— Texhtuꞌ.

³⁵Tzaqꞌbꞌel tu u aanjel ech tzaꞌ: —U Tioxhla Espiiritu suꞌul saiꞌ utz, visulich u tijleꞌm u Tꞌankin Tioxh sakuꞌ saiꞌ. Ech tokeꞌ xaannaj el kꞌatz paav u tal nitxaꞌ vaꞌl saitzꞌeꞌi. Utz iKꞌaol Tioxh siꞌaneꞌ.

³⁶Tan echaꞌ val iitzꞌin aatzik u Xheꞌp, vaꞌl yeꞌ nititzꞌnaneꞌ chu teꞌleꞌ, sachee maꞌl titzꞌin majte, kꞌuxh qꞌeste. Vaajix ichꞌ tatin tu tiichajla yaabꞌil.

³⁷Tan kam koj yeꞌ saveet vatz u Tioxh.— Texh u aanjel.

³⁸Ech tal tek u Liꞌ ech tzaꞌ: —Aꞌtzii. Uchoj sunkꞌatza vaꞌl naaleꞌ tziꞌ. Txꞌajaꞌm koꞌxh vetz tan, atilin tiqꞌabꞌ u kuBꞌaals Amlika.— Texhtuꞌ. Ech eltekbꞌen u aanjel siatz.

³⁹Uncheeꞌ aatz iꞌan tu qꞌu qꞌii tziꞌ, oojeꞌl chit ibꞌen u Liꞌ, bꞌen tu maꞌl u tenam tikuenta Judea xoꞌlaj muunte.

⁴⁰Utz opon tu totzotz u Zacarias. Ech tal ichajlichil u Xheꞌp.

⁴¹Pek taꞌxh tabꞌi u Xheꞌp u chajlichil, yakich yuqꞌuꞌpanoj u tal nitxaꞌ vaꞌl atich kꞌatza. Ech ok u Tioxhla Espiiritu kꞌatza bꞌaꞌnil.

⁴²Ech qetun taltu u Xheꞌp ech tzaꞌ: —Chiꞌbꞌebꞌal eetz vatz tereꞌn qꞌu ixoj. Utz chiꞌbꞌebꞌal tetz val iitzꞌin vaꞌl saala.

⁴³¿Kam vijleꞌm aas nuꞌlaqꞌilaꞌin tan, axh inan vunBꞌaal?

⁴⁴Tan taꞌxh vetvabꞌi vetaal unchajlichil, yakich vetyuqꞌuꞌpanoj u tal nitxaꞌ sunkꞌatza tu txuqꞌtxunchil.

⁴⁵Ech techal axh tan, nimanyaxh aas saꞌnaltzojpi kam vaꞌl vettallu u kuBꞌaals Amlika see.— Texh te.

⁴⁶Aatz u Liꞌ tan, tal tek ech tzaꞌ: —Nuntꞌanbꞌaꞌ vunBꞌaals Amlika tu vaanxelal.

⁴⁷Utz nitxuqꞌtxun vaanima tiꞌ vunTioxh u Chitol vetz.

⁴⁸Tan vettillin u Tioxh aas in niman tetz. Ech chiꞌbꞌebꞌal vetz satal kajay qꞌu aanima qꞌuꞌl saꞌatin taabꞌaꞌbꞌen.

⁴⁹Tan sibꞌ mamaj bꞌaꞌnil vetiꞌanlu u Mam Tioxh sunkꞌatza. Techal vibꞌii tan, tzian kꞌatz paav.

⁵⁰Tan ibꞌenaꞌ ibꞌen koꞌxh vitxumt iatz qꞌu aanima qꞌuꞌl atil tatin u Tioxh siatz.

⁵¹Mamala chaj kam bꞌanel taqꞌo. Sotzsamal ikꞌuꞌl qꞌu aanima taqꞌo qꞌuꞌl tꞌeꞌsunibꞌ tiꞌ qꞌu kam nititzꞌa tu taanima.

⁵²Bꞌajel el taqꞌo qꞌu jeꞌsanibꞌ qꞌuꞌl atil mamaj tijleꞌm. Utz tꞌanbꞌaꞌmal taqꞌo qꞌuꞌl yitꞌ jeꞌsanibꞌ koj.

⁵³Tzꞌajel iatz tetz taqꞌo qꞌuꞌl nivaꞌyeꞌ. Utz maalieꞌl tetz qꞌu txꞌiiol iqꞌii taqꞌo.

⁵⁴Lochel vitenam taqꞌo, qꞌu niman tetz, ayaꞌ oꞌ Israeel. Aꞌ nitzojpi vaꞌl tala aas saꞌchititxum kuvatz.

⁵⁵Tan ech vaꞌl alel nal tu u kukꞌuy kumam Abrahaam taqꞌo, tuchꞌ tu qꞌul ituꞌxh ixalam yeꞌk iyaꞌebꞌal.— Texh u Liꞌ.

⁵⁶Utz kamal oxvaꞌl ichꞌ iꞌan u Liꞌ xeꞌ u Xheꞌp. Ech qꞌaavtekbꞌen tu tatibꞌal.

⁵⁷Uncheeꞌ aatz tek tzꞌaj u tiempo aas sachee u titzꞌin u Xheꞌp, itzꞌpu maꞌl tal titzꞌin, xiak.

⁵⁸Utz motx chit txuqꞌtxun qꞌu titzꞌin tatzik tuchꞌ qꞌu tetz tzꞌalol aas tabꞌi u mam bꞌaꞌnil iꞌan u Tioxh kꞌatza.

⁵⁹Utz aatz tek tzꞌaj vaaxajil qꞌii titzꞌpeꞌ, motx tiqꞌo bꞌen u tal nitxaꞌ tu viqꞌanalil u totztioxh, tiꞌ satzokꞌax el bꞌiil ichiꞌl. Utz aꞌ siꞌchtaqꞌvu bꞌen sichꞌexel vitat. Zacarias ibꞌii siꞌchiꞌaneꞌ.

⁶⁰Pek tal vinan u tal nitxaꞌ ech tzaꞌ: —Yeꞌka, Xhan ibꞌii soꞌoki atziꞌ.— Texhtuꞌ.

⁶¹Utz ech alax te tzaꞌ: —¿Kam tokeꞌ tan, keꞌch koj maꞌj iitzꞌin aatzik aas ech ibꞌii tziꞌ?— Texh qꞌu aanima.

⁶²Uncheeꞌ bꞌanax tek xheenya tu vitat. Chꞌotil te aas kam ibꞌii isaꞌ satoksa.

⁶³Ech ijajtu maꞌl tal aqꞌen u Zacarias. Utz itzꞌibꞌa kuꞌ siatz ech tzaꞌ: —Xhan ibꞌii atziꞌ.— Texhtuꞌ. Ech kajay qꞌu aanima nichtexhisotz ikꞌuꞌl taqꞌo.

⁶⁴Utz tu koꞌxh u muꞌkꞌul tziꞌ, yakich tepaj itxꞌol yol u Zacarias. Aꞌ bꞌaxa toksa iqꞌii u Tioxh.

⁶⁵Yakich xoꞌvoj qꞌu tetz tzꞌalol. Utz pax chit itziiul qꞌu kam vatz qꞌu aanima tziꞌ qꞌuꞌl jejlel tulaj muunte tikuenta Judea.

⁶⁶Aatz kajay qꞌu aanima qꞌuꞌl abꞌin, nichtekipensaarin taqꞌo. Utz nichtal ech tzaꞌ: —¿Kam tek tijleꞌm u tal xiak siꞌaneꞌ nitaleꞌ tziꞌ?— Chia. Tan Tioxh chit atil kꞌatz u tal nitxaꞌ tziꞌ.

⁶⁷Aatz u Zacarias, vitat u tal nitxaꞌ, ok u Tioxhla Espiiritu kꞌatza bꞌaꞌnil. Ech tal unjolol yol taqꞌo ech tzaꞌ:

⁶⁸—Techal u kuBꞌaals Amlika, u kuTioxh oꞌ Israeel. Tan vetꞌuliqꞌilaloꞌ, oꞌ itenam; vetꞌulteesaloꞌ tu tzaꞌl.

⁶⁹Vettaqꞌluꞌl maꞌl Mam Chitol qetz, maꞌl ituꞌxh ixalam u Daviid, u niman tetz.

⁷⁰Kam chit echaꞌ vaꞌl alel nal taqꞌo titziꞌ qꞌu alol tetz viyolbꞌal koꞌxtene qꞌuꞌl txaael el taqꞌo.

⁷¹Tala aas aꞌ saeesanoꞌ vatz qꞌu kukoontra utz, vatz qꞌuꞌl nichiꞌnaꞌn ikꞌuꞌl qiꞌ.

⁷²Tala aas saꞌchititxum kuvatz. Ech sitzojpixsa viyol iꞌan tu u tioxhla nukꞌuꞌm alel nal taqꞌo tu qꞌu kukꞌuy kumam.

⁷³Tan aꞌ vaꞌl talaꞌtziꞌi tu u Abrahaam u kukꞌuy kumam.

⁷⁴Silochꞌoꞌ tala. Saeloꞌ vatz qꞌu kukoontra taqꞌo. Ech yeꞌk kuxoꞌval sakunima saqoksa.

⁷⁵Sakubꞌan vijikomal siatz. Utz xaannajeloꞌ kꞌatz paav sakubꞌaneꞌ jatvaꞌl vatz kuqꞌii kusaj saꞌatini.

⁷⁶Pek aatz axh tal neꞌ tan, axh alol tetz viyol u Tꞌankin Tioxh siꞌaneꞌ. Sabꞌaxabꞌaxh vatz u kuBꞌaal. Seꞌnapaxsa itziiul u tulebꞌal.

⁷⁷Ech satabꞌi vitenam aas saꞌatin chitpichil tu paav, saꞌatin kuybꞌal.