Luk 1:31-77

³¹Idah kameh, ou tuwi nah mwan ari ere ndrinem, eme ou tondrohani nyaran ki Jises.

³²Iy kameh asahan ndramak tinan, ma idah kameh aloh iy Nadu Kindrei udu loken labai. Laban Kindrei kameh mesekei iy asahan kabin, i buku none tubun Debit mene,

³³ma idah kameh iy asahan kabin ta atondrok lundriye Jekop oro, udu le buku doh; ma tondrok tan kameh winiyan bano bwe!”

³⁴Eme Mariya tiye i ta angelo, “Jo badeh, bakohok ari mwan bwe. Idah kameh ki buku sah handru?”

³⁵Eme angelo dah anya, “Malawin Ndrabun kameh ewek la-um, ma hawe boto-on ta Kindrei ewek la-um. Ta katin doh le, nah doh kameh i ndrabun ma aloh iy Nadu Kindrei.

³⁶Ou tanam boram Elisabet, iri asehek anya iy kameh nadun bwe; iy badeh, ndra alon labai. Arile na len dah badeh, nah udu tan bun tan ndrasahan onoh ai.

³⁷Lakou mari kede-eh Kindrei winiyan mesekei le ai.”

³⁸Eme Mariya anya, “Jo dah, jo lohowan ta Laban, kasahan ki buku ou asehek badeh!” Eme ma angelo dah iu ai.

³⁹Ano udu hamon ja, Mariya alokou iy, ano iy edek suwi iu ili bolo ndrondro-ou, badu kon tinan ili kon ari udu bolo Judiya.

⁴⁰Iy ma sekesek tan edek iu ili bolo asiu ta Sekaraya atou Elisabet.

⁴¹Eme Elisabet anuhun sahou sekesek ta Mariya, ma nah udu ndrinen nyokolokon. Eme Elisabet idih na Malawin Ndrabun,

⁴²ma iy asehek sahou boto-on anya, “Ou badeh, nyosowan tam, sakalawi nyosowan tiri badih mari, ma nyosowan ki la-u nah, na len ou kameh adeu iy eme len!

⁴³Lakou laba tinan dah, asahan eme tek, ta sasah handru? Ya eme tine Laban eme selesen jo dah.

⁴⁴Jo anuhun sahou sekesek tam le badeh, ma nah udu ndrinek nyokolokon ta sekesek.

⁴⁵Idah kameh ou sekesek handru, tasah budon handru tam ndra-en ta sahou mene Laban ndrasehek tam.”

⁴⁶Eme Mariya iyah wari ma tiye i buku doh: “Ndrinek atudun nyara Laban;

⁴⁷ma kohak handru sekesek ta Kindrei, ta aseben jo,

⁴⁸tasah jo badeh, lohowan tan ma iy tondrokei jo! Na dah kameh iri lau rebesem, ano rebesem kameh aloh jo akohok nyosowan.

⁴⁹Tasah, Kindrei tinan labai, iy mesekei lakou tinan labai ndrame tek, ya nyaran badeh, ndrabun.

⁵⁰Iy leheya tikisiy tan i tiri lau heh anoh iy; ano ili ta lau rebesem au, ano lau rebesem au, i le buku doh.

⁵¹Iy amekes kalem tinan na bohan; ma iy tikahei iri lau ta budon, udu ndrine iri anya iri le ai, badeh iu.

⁵²Iy tikahei iri kabin tinan ame andri ta koyeu tiri; ma iy tutuni iri lau, amekes lahou i buku iri nah a loken.

⁵³Iy nyohonei iri lau ta son na lakou mwasin; ma tikahei iri lau, tiri lakou solo-an au, na luka lim ma na luka kati.

⁵⁴Eme iy tawi tandrakan tan i tiri lau badu Isra-el, ma iy bamani tikisiy tan i ta Abraham ma lundriyen oro bwe, ta udu le buku doh, i buku iy mene ndratiye ta tubu ahi iri mene ndra-au.”

⁵⁶Mariya udu hawe Elisabet udu gwek winiya bun taloh, ano iy iu i hamon ja ili kon tan.

⁵⁷Eme len ano ta Elisabet anya kedeu nadun, iy atehei nah mwan.

⁵⁸Eme ya iri lau asiu tiri udu mirihik tan, hawe lowan oro ndranuhun ta Laban amekes mwasin i tan handru. Eme ya oro mari ame sekesek hawen.

⁵⁹Ano udu, nah dah len tan asahan ndru la-uh badeh, oro ala ta asan ku-in; eme oro anya katondrohon nyaran, ki nyara taman Sekaraya.

⁶⁰Arile tinen anya ja, “Bwe! Nyaran kameh aloh iy Jon.”

⁶¹Eme oro tiye i tan, “Nyara lowa ado ari bala buku aliy, bwe oh!”

⁶²Ano oro amekes kalem i ta taman ta nyaran nah dah, ki are lau handru.

⁶³Eme Sekaraya edeu kalem anya, “Ari barak keme, ya jo katorou nyaran.” Eme iy torowenei nyaran badeh, Jon. Eme oro mari, boho oro asak!

⁶⁴Eme na le liliy, Sekaraya asehek sahou ja, ma iy atudun Kindrei.

⁶⁵Eme iri lau badu mirihik badeh, boho iri asak labai. Eme ma nyala lakou dah aseker ili bolo ndrondro-ou, kon tinan loboho Judiya.

⁶⁶Iri lau anuhun nyala aliy, eme iri lomondra ma ndremenya, “Iy nah doh kameh asahan sah handru kameh?” Oro badeh, lomondra i buku doh, tasah boto-on ta Laban udu bwele-en.

⁶⁷Ano tama Jon Sekaraya idih na Malawin Ndrabun, ma iy asehek sahou ta lele.

⁶⁸“Taha katudun Laban Kindrei ta Isra-el! Tasah, iy ndrame ta akunoh iri lau tan.

⁶⁹Iy atehei ndramak ari boto-on eme ta seben taha, badu boho kamen ta lohowan tan Debit,

⁷⁰i buku none iy mene atehei sahou kani iri propet ndrabun, bwena mene ndratiye ndra-au,

⁷¹Ya iy aseben taha are mine iri lau ta amekes bahun eme tataha, ma aseben taha ado mine iri lau, ta ato-ou kaliu eme tataha, ame len.

⁷²Ma iy kameh leheya tikisiy i ta tama taha iri, ma ta budon ta sahou randra le tan mene,

⁷³ta sahou tandrakan tan mene iy tandrakan i ta Abraham:

⁷⁴Ta aseben taha ado mine iri lau ta amekes bahun eme bada taha, ma mesekei taha sanoh ta amekes lahou tan.

⁷⁵Ma taha ka ndrabun, ma kado mwasin ta mada Kindrei na len mari, udu bolo manyah tataha.

⁷⁶Ya idah kameh ou naduk kameh, aloh ou propet ta Kindrei, udu loken labai; Ma ou kameh au ala bwena atehe san ta Laban,

⁷⁷ma atiye sahou tanan i tiri lau tan ta nyala seben, ndrame. Ya iy kameh balen mani karei ma lomondra ndra-in tiri.