Luuka 1:31-77

³¹Maane mäpumäpu pa äbitepi, imäbägrä ne pa jepänepi. Teebine ngii ecärepi Yeesu.

³²Tabe lui baborage cirege; Caburage Acejiyame me bägrä ca pa yaainepesi. Yageyame Acejiyame teebine mopeyame me cire jaawenepi epu pana teeme kaakesaare Daawida lipu mopeyame itu enajuji.

³³Tabe te Yakobu me kaakesaare bine iyeteta cire yaawademepi, ingle teeme waadena lui ngälu cäco gyene.

³⁴Mariya mename seemo ne itemlige egä, “Cane mäpumäpu lipu äbita, ingle camu gäne rooriye cama atejäclmuta?”

³⁵Mename seemo te jojige egä, “Aceji Seemo te määme bau me pa tädepi, piba Caburage Acejiyame me kokre määme cabu pa yaanajepi, peei name pi peei bägrä maane lui ne pa eplimlepi tabe Acejiyame tääpu myene, piiyepu Acejiyame me bägrä ca pa yaainepesi.

³⁶Yoo, määme ingle biname Elisabeta cuta imäbägrä pa jääpänepi. Teebine lui tääpume biname cina jwaajusi egä “äblicäco bägrä päpäna,” ngänu gwene page molyege, tabe siks mabye cama mäpumäpu gwene.

³⁷Iyeta gwidape Acejiyame tääpume ibibi gemi wawena.”

³⁸Siige, Mariya piba jejige egä, “Cane Acejiyame me biname gäne teeme singi wawename. Iyeta miiji gyene cäme tääpume äbita maane lui mene bii najite.” Siige, mename seemo piba teebine obmalige.

³⁹Yoo, pui mene ingwe ca, Mariya gwidape emacetnäjige, wata oclige yepä cewe Yuudea doro gawe cabu me.

⁴⁰Tabe Sakariya me mete me puga abacitige, Elisabeta ne sebore jowenige.

⁴¹Yoo, Elisabeta liba Mariya me mene utecijige, teeme bägrä te piba apinyarige came bora ätni diiba cabu, piiyepu Aceji Seemo Elisabeta me trupa cabu babo äbitige.

⁴²Tabe babo tage ca Mariya ne jojige egä, “Acejiyame te meebine babo miiji naawenige iyeta magebi cabu ca, piiyepu maane lui bägrä ne pa eplimlepi, tabe Acejiyame me babo miiji cama gyene.

⁴³Cane ngeno me ai miiji ne päpäna, cäme Yageyame me mage te cebine nädärenige!

⁴⁴Cane liba määme sebore mene nätecijige, piba taatu bägrä te gege cama apinyarige cäme came bora ätni diiba cabu.

⁴⁵Maane ngenecu gege gäte, ingle mime Yageyame me mene maane jaatrungepete egä määme poto cidi me pagege äbita.” Siige.

⁴⁶Mariya jiicige egä, “Cane Acejiyame ne ewepyeräjenine iyeta cäme ngenecu cama.

⁴⁷Cäme seemo te gege äbitenige Acejiyame tääpume, lui te cebine niiya cabu ca cirege asata.

⁴⁸Tabe owecu cama cebine näpänumi, cane lui teeme matikolä kaakesea bägrä gäne. Ama cita ca iyeta biname cina cebine pa nainepesi “gege gwene,”

⁴⁹peei modamoda gwidape name pi Acejiyame lui bine teeme kokre ca itu tewenemumi cäme tääpume. Teeme ngii lui jamyacu conocäco gyene.

⁵⁰Bägrä bime padare cabu ca piiyepu maramara kaakesaare bime padare cabu ca, tabe biname bine owecu jaawenemuge, lui cina teebine opo gaabe me yaacitusi.

⁵¹Tabe kokre mule bine ime ca itu jaawenemepi; biname lui cina ngenecu bora teemeteme babo me läbituge, teebibine jaawenemepi maramara me aplidnerame.

⁵²Tabe modamoda mope biname bine gawe me itu yaajaremepi teeme miijimiji puupu cabu ca, yepä matimati biname bine ituge awepenta.

⁵³Deedei cäco biname bine tabe yäängäremepi miijimiji deedei ca, yepä dogwe biname bine deedei cäco yääyecräjemepi.

⁵⁴Tabe cängena jaawenemepi lui mene mime kaakesaare bine ituge jaji; mibibine itu nitityäripi lui gemi teeme kaakesea bägrä ngii Israela cabu ca. Tabe teeme mene lica ngene jäätrimalepi, owecu wawename Abrahamo piiyepu teeme kaakesaare bine iyeteta.”

⁵⁶Siige, Mariya Elisabeta cama onajige nesae mabye cama, piba acnenutige teeme cewe me.

⁵⁷Yoo, Elisabeta me padare liba tatyaramtige, tabe imäbägrä ne eplimlige.

⁵⁸Siige, teeme inglewale piiyepu cewe mameta lui biname cina liba mene itecijemige Yageyame te lipu Elisabeta ne babo owecu jowenige, teepi ten cama gege äbitininisi.

⁵⁹Imäbägrä te liba eit bimu joomlige, teeme binamewale cina seclige Acejiyame me cewecu acita mule wawename tääpe matikolä iirputa ca. Teepi singi bägrä ne babe me ngii ceerame, Sakariya,

⁶⁰yepä teeme mage te jejemige egä, “Eewe! Teeme ngii lui Yoane.”

⁶¹Teepi mage me mene jowecnistisi egä, “Peei ngii weeme ingle cabu lica gyene.”

⁶²Teepi puma cita ca babe ne ime ca jewenisi teebine ätemlame egä, “Maane ngena ngii tääpume singi bägrä ceerame?”

⁶³Sakariya oogära gwidape tääpume jejige, peei cabu yoogärige egä, “Teeme ngii lui Yoane.” Biname cina cälu te jitemige.

⁶⁴Piba taatu Sakariya me wätä te miiji me äbitige, piiyepu teeme tagepogogo te tasatige. Tabe mene me gije abacitige Acejiyame ne awepyeräjame.

⁶⁵Cewe mameta biname cina wälu äbitininisi; peema cita ca idre ecenanisi Yuudea podo gawe cabu iyeta poto ta.

⁶⁶Iyeta lui cina peei mene itecijemige, mage ngene jotwa-naninisi, ätemläjinisi egä, “Ai bägrä tääpume lipu äbitenige?” Yoo, Biname bime tääpume pajecu ge egä Acejiyame me kokre ime puga ge pui bägrä cama.

⁶⁷Aceji Seemo te Yoane me babe Sakariya me trupa cabu me babo äbitige; tabe Acejiyame me tagepogogo mene jiicemige egä,

⁶⁸“Acejiyame mime Israela biname bime Yageyame ne mine pa yaawepyeräjesi, ingle tabe mibibine bii ningrärininige piiyepu mime niiya cabu ca äsecrera gaabe bii nicärininige.

⁶⁹Tabe mime tääpume kokre äsecrera biname ne bii tityepige, lui teeme kaakesea bägrä Daawida me kaakesaare gyene.

⁷⁰Ujarage, tabe teeme conocäco mename biname bime tagepogogo ca jiicuji egä,

⁷¹tabe mibibine cire niyeblingipi mime cubuyame bau ca, piiyepu teeme ime cabu ca lui cina mibibine nimugetninininusi.

⁷²Tabe te jiicuji egä tabe mime kaakesaare bine owecu wawename, piiyepu teeme conocäco jajeji mene tabe lica ngene ätrimelame.

⁷³Tabe mime kaakesaare Abrahamo ne teeme kokre ngii cabu jejuji

⁷⁴egä mibibine cirege äsecrera cubuyame me ime cabu ca, mine piba teeme tääpume kaakesea wälu cäco wawenecame,

⁷⁵piiyepu ngenecu epucäco conocäco lenajame teeme opo gaabe je iyeta mime ireclota ngalebora.

⁷⁶Yoo, cäme bägrä, biname cina meebine pa naainepesi mename biname ca mime Caburage Acejiyame tääpume, Ingle maane niinäce pa ädepi gaabe amacetnäjame Yageyame tääpume,

⁷⁷teeme biname bine umle wawename egä äsecrera gaabe pisi nyene, teepi liba kälyä jääpänemusi Acejiyame bau ca teeme niiya mule tääpume.