Lok 1:31-77

³¹Abinodjij kiga kigicka8a. Kiga og8izisinan, acitc dac Jesos kiga ijinikana.

³²Kada kitci apitendagozi acitc Kije Manido ma8adji ka icpendagozidj Og8izisan kada ijinikanagani8i. Kije Manido ka Tibendjigedj oga minan kidji ogima8indjin tabickotc Davidiban, 8eckadj okitci anicinabembanin.

³³Kagige kada ogima8i Israel a8iagokag. Ka8in dac 8ikad kada poni ogima8isi,” ki ikido ajeni.

³⁴Mani dac ogi inan ajenin: “Ka8in maci ni8idji tajikemasi nabe, adi dac kegi odji iji8ebizian iidi?”

³⁵Ajenin dac ogi nak8e8ajiigon: “Mino Manido kiga pidigeckag, acitc ma8adji ka icpendagozidj Kije Manido kiga minig omacka8izi8in. Mi ke odji kitcit8a8izidj aa abinodjij ke nta8igidj, acitc Kije Manido Og8izisan ke odji ijinikanagani8idj.

³⁶Ndotan! Kitcina8emagan Sabet ke8in kigicka8aso, ockina8esan opian. Aja kitci kokomi8i. Ikidonani8anoban ega 8ikad kidji odabinodjijimidj. Misa8adj dac, nogom aja nigod8asokizis8ezi8an e kigicka8adjin.

³⁷Ka8in mega kegoni op8ana8itosin Kije Manido.”

³⁸Misa Mani ki ikido: “Ka Tibendjigedj nidanokita8a. 8egona todaojidj Kije Manido ii ka ikido8an.” Midac ka iji naganigodjin ajenin.

³⁹Ka8in kin8ej ka ick8a 8abamadjin ajenin, Mani ki madja, kitci kijika e ijadj pejig odenakag, ka iji pik8adina8anig Coda (Judée) akikag.

⁴⁰Zakani omigi8amikag ki iji tag8icin, Sabet ocomisimikag. Ki pidige, acitc ogi anamika8an Sabetan.

⁴¹Apitc Sabet e nodag e anamikagodjin Manin, ki odji mamadji8an ka kigicka8adjin otcidjiciman. Sabet dac ogi pidigeckagon Mino Manidon.

⁴²Ogi inan dac Manin, e kitci kiji8edj: “Kakina e taci8adj ik8e8ag kin a8acamej Kije Manido kica8enimig, acitc oca8eniman ini abinodjijan ka kigickaomadjin.

⁴³Ka Tibenimijidj odjodjoman nipi odisig. Nikitci mina8azinan dac!

⁴⁴Apitc ka nodaman e anamikaojian, abinodjij ka kigicka8ag ki odji mamadji epitci mina8azidj.

⁴⁵Kica8endagozinan! Kigi teb8etan ka ikidopan Kije Manido kidji iji8ebanig.”

⁴⁶Mani dac ki ikido: “Nidjitcagoc odicpeniman ka Tibendjigendjin,

⁴⁷acitc Kije Manido ka Ag8acimijidj niminig kidji kitci modjigendaman.

⁴⁸Nigi mik8enimig mega, nin odanodaganik8eman ka tabasendizondjin. Apanigotc dac kakina a8iagog ke ani aianike nta8igi8adj kada ikido8ag egi kitci ca8enimijindjin Kije Manidon.

⁴⁹Kije Manido mega, 8in ma8adji ka macka8izidj, ka kitci mamakadendag8anigin kegonan ogi todanan nin odji. Kitcit8a8endag8ani o8izon.

⁵⁰Apanigotc okije8anan kakina a8iagon ka manadjiigodjin.

⁵¹Odojitonan ka kitci mamakadendag8anigin kegonan kidji 8abadai8edj omacka8izi8in. Odobenija8an a8iagon ka kitci kitenimondjin.

⁵²Ota8ebicka8an kitci ogiman acitc odapitendagozian ini8e ka kidimagizindjin.

⁵³Kitci mane mino kegonan ominan a8iagon ka ka8askadendjin, acitc otoja8an ka kitci oconiamindjin ega kegonan kidji aiamindjin.

⁵⁴O8idoka8an Israel a8iagon, ka anokitagodjin. Ka8in odji 8anikesi apanigotc kidji mino toda8adjin Abanaaman (Abraham) acitc kakina odanike ojisini, mi mega ka inagobanen 8eckadj kikitci anicinabeminabanin.” Mi ka ikidodj Mani.

⁵⁶8aiej nisokizis Mani ogi 8idji tajikeman Sabetan. Kegapitc dac ki koki ki8e.

⁵⁷Aja ijiseniban kidji nta8igindjin Sabet odabinodjijiman, ki og8izisi dac.

⁵⁸A8iagog pecodj ka tajike8adj Sabetikag acitc otcina8emaganan ki nodage8an ka Tibendjigendjin egi kitci mino todagodjin, kakina dac ogi 8idji modjigendamoma8an.

⁵⁹Apitc ini abinodjijesan ka pejigota8ate8ezindjin, kakina mina8adj ki tag8icinog kidji pak8ej8agani8indjin. Onada8enima8abanin odadaman o8izoni “Zakani” kidji ijinikazondjin ini abinodjijan.

⁶⁰“Ka8in” dac ki ikido8an odjodjoman. “ ‘John’ kada ijinikazo.”

⁶¹Ki inagani8i dac: “Ka8in a8iag iidi ijinikazosi kitcina8emaganikag.”

⁶²Ogi k8ag8edjima8abanin dac ka iji odadamindjin e mamadjinik8ebanio8adj, kidji kikendamo8adj adi 8a ijinikanadjin odabinodjijiman.

⁶³Zakani dac ki k8ag8ed8e kegoni kidji iji ojibiigedj acitc mi oo8e ka ojibiag: “ ‘John’ ijinikazo.” Midac kakina a8iagog ki kitci mamakadendamog.

⁶⁴Teci8ag dac Zakani ogi kackiton kidji koki anim8edj, acitc teci8ag ogi icpeniman Kije Manidon.

⁶⁵Kakina dac a8iagog pecodj ka tajike8adj ki kitci segizi8ag, acitc mizi8e ka iji pik8adina8anig Coda (Judée) akikag ki nodagani8ani adi ka pi iji8ebag.

⁶⁶Kakina a8iagog ka nodage8adj e ikidonani8anig ki mamidonendamog, acitc ki k8ag8ed8e8ag: “Adi ke ani iji8ebizidj aa abinodjij?” Ki paietenag8ani mega ka Tibendjigendjin omacka8izi8ini e 8idjiogodj aa8e abinodjij.

⁶⁷Zakani, aa abinodjij odadaman, Mino Manidon ogi pidigeckagon acitc ki niganadjimo oo8e:

⁶⁸“Icpenimik ka Tibendjigedj, mi aa Israel a8iagog Okije Manidomi8an. Ogi pi ag8aciman mega odanicinabeman.

⁶⁹Kigi pidjinijaamagonan a8ian e kitci macka8izindjin kidji ag8aciminak. 8in odanodaganan kitci ogiman David, odaiagizi aa a8iag.

⁷⁰Aja 8eckadj oo8e kagi pi tibadjimogobanen Kije Manido, e abadjiadjin okitcit8a niganadjimo8inniman.

⁷¹Teb8e Kije Manido ki ikido kidji nagadjiigo8ak, ega kidji gi madji todago8ak igi8e ka 8i miganigo8ak acitc igi8e ka kitci madjenimigo8ak.

⁷²Ki ikido kidji kidimagenimadjin 8eckadj kikitci anicinabeminabanin, acitc kidji mik8endag okitcit8a nakomo8in.

⁷³Kije Manido teb8e ogi inan Abanaaman (Abraham), 8eckadj kikitci anicinabeminaban,

⁷⁴kidji 8idjiinak, ega kidji madji todago8ak igi8e ka madjenimigo8ak, midac kidji gi anokita8aiak ega kidji tajinijiak,

⁷⁵midac kidji paiekideeiak acitc kidji k8aiakoziak inigik ke pimadiziak e anokita8aiak.

⁷⁶Kin dac, nidabinodjijim, ‘Kije Manido ma8adji ka icpendagozidj oniganadjimo8inniman’ kiga ijinikanigo. Ab8amaci pi tag8icig ka Tibendjigedj, kin nitam kiga tibadjimonan, kidji 8idama8ad8a a8iagog kidji eco8i8adj kidji tag8icinindjin ka Tibendjigendjin,

⁷⁷acitc kidji 8idama8ad8a ka Tibendjigedj odanicinabeman kidji pi ag8acimadjin e kasiama8adjin opatado8ini8an.