Lukka 1:31-77

³¹a hooƴan reedu, ndimaa ɓiɗɗo gorko, inndiraa ɗum Iisaa.

³²Ɓiɗɗo oon laatoto tedduɗo, o noddirte Ɓii Laamɗo Toowɗo. Laamɗo Joomiraaɗo hokkan mo laamu maamiiko Daawda.

³³O laamoto ƴuwdi Yaakuuba faa abada, laamu makko walaa timmoode.

³⁴Mariyama wi'i maleyka oon: —Noy ɗum laatortoo, sabo mi anndaa gorko?

³⁵Maleyka oon jaabii mo, wi'i: —Ruuhu Ceniiɗo jippoto e maaɗa, baawɗe Laamɗo Toowɗo cuddete. Saabe ɗuum, ɓiɗɗo mo ndimataa oon inndirte Ceniiɗo, Ɓii Laamɗo.

³⁶Ndaar, sakiike maa Elisabet du hooƴii reedu ley nayeewu muuɗum, o riman ɓiɗɗo gorko. Imo wi'enoo wo o dimaro, de joonin kaa imo wondi e reedu lewru jeegaɓurdu,

³⁷sabo walaa fuu ko Laamɗo waawaa.

³⁸Wakkati oon, Mariyama wi'i: —Inani kam, miin korɗo Joomiraaɗo, ɗum laatoranoo kam no mbiiruɗaa ni. Ndeen maleyka oon dilli to makko.

³⁹E ley balɗe ɗeen, Mariyama ummii, yehi law to wuro gomma wonngo ley baamle Yahuudiya.

⁴⁰O naati suudu Jakariyaa, o jowti Elisabet.

⁴¹Nde Elisabet nannoo jowtaango makko ndeen, ɓiɗɗo gonɗo e reedu muuɗum oon dimmbii. Ndeen Elisabet hebbinaa Ruuhu Ceniiɗo,

⁴²ƴeewnii e daande toownde, wi'i: —A barkinaaɗo hakkunde rewɓe! Ɓiɗɗo mo ndeeduɗaa o du wo barkinaaɗo!

⁴³Miin, wo mi ɗume faa inna Joomiraaɗo wari to am?

⁴⁴Ndaar, nde jowtaango maa yottinoo nowru am ndeen, ɓiɗɗo gonɗo e reedu am oon dimmborake kuyam.

⁴⁵Barke woodanii ma, aan goonɗinɗo ko Joomiraaɗo haalani maa ɗuum tabitan.

⁴⁶Mariyama wi'i: —Yonki am ina mana Joomiraaɗo!

⁴⁷Ɓernde am ina heewi seyo e dow Laamɗo Kisinoowo kam,

⁴⁸sabo o yurmake kam, miin, korɗo makko leeƴuɗo. Gilla joonin jamaanuuji fuu noddiran kam barkinaaɗo.

⁴⁹Sabo Jom baawɗe waɗanii kam kulle mawɗe! Innde muuɗum wo seniinde.

⁵⁰Yurmeende muuɗum ina woni dow hulooɓe ɗum jamaanu dow jamaanu.

⁵¹O gollii golleeji mawɗi e semmbe junngo makko, o sankitii mawninkiniiɓe e anniyaaji muɓɓen.

⁵²O saamdinii kaanankooɓe e laamuuji muɓɓen, o toownii leeƴuɓe.

⁵³O haarnirii yolbuɓe kulle lobbe, o yoppii jom'en jawdi juuɗe ɓole.

⁵⁴O wallii yimɓe Israa'iila, maccuɓe makko ɓeen, sabo o yeggitaay ko o haaldunoo e maamiraaɓe meeɗen, yurmaade Ibrahiima e ƴuwdi muuɗum faa abada.

⁵⁶Mariyama waddi e Elisabet ko waɗata lebbi tati de yeccii suudu muuɗum.

⁵⁷Wakkati ndimu Elisabet yottii, o rimi ɓiɗɗo gorko.

⁵⁸Hoddiiɓe makko e sakiraaɓe makko nani yurmeende mawnde nde Joomiraaɗo waɗani mo ndeen, ceyodii e makko.

⁵⁹Nde cukalel ngeel waɗunoo nyalaaɗe jeetati ndeen, ɓe ngari taadude ngel. Iɓe njiɗunoo inndirde ngel innde baabiigel Jakariyaa,

⁶⁰ammaa inniigel jaɓaay, wi'i ngel inndiree Yaayaa.

⁶¹Ɓe mbi'i ɗum: —Yimɓe maa fuu walaa inndiraaɗo innde nde.

⁶²Ɓe ƴami baabiigel e muummumre, noy yiɗi ɓiyum oon inndiree.

⁶³Jakariyaa ƴamani alluwal, winndi dow maggal: «Yaayaa woni innde maggel.» Ɓe fuu ɗum haaynii ɓe.

⁶⁴Wakkati oon pay, hunnduko Jakariyaa yoppaa, ɗemngal mum haɓɓitaa, ina haala, ina yetta Laamɗo.

⁶⁵Kulol nanngi hoddiiɓe makko ɓeen fuu. Katin du yimɓe ley baamle Yahuudiya fuu ina kaala kabaaruuji ɗiin.

⁶⁶Nanɓe ɗum ɓeen fuu ndesi ɗum e ley ɓerɗe muɓɓen, ina mbi'a: «Ndelle ɗume cukalel ngel laatoytoo?» Sabo ɓe nji'ii junngo Joomiraaɗo ina woni dow maggel.

⁶⁷Jakariyaa, baaba cukalel ngeel, heewi Ruuhu Ceniiɗo, haaldi annabaaku, wi'i:

⁶⁸—Jettooje ngoodanii Joomiraaɗo, Laamɗo Israa'iila, sabo warii walli yimɓe muuɗum, rimɗini ɗum'en.

⁶⁹O waddanii en Kisinoowo jom semmbe ƴuwɗo e suudu Daawda, maccuɗo makko.

⁷⁰Ɗum fuu ɗum laatorii hono no o haalirnoo e kunnduɗe annabaaɓe makko seniiɓe gilla arande -

⁷¹o wi'i o hisinan en e habdiiɓe men, e juuɗe wayɓe en fuu.

⁷²Nii o yottiniri yurmeende nde o aadaninoo maamiraaɓe men ndeen, o miccitake amaana makko ceniiɗo,

⁷³hunayeere nde o hunanii maammen Ibrahiima, o hokkan en

⁷⁴danneede e juuɗe wayɓe en faa ngolliranen mo rafi kulol,

⁷⁵ndewen mo ley senaare e dartaare yeeso makko haddi nguurndam meeɗen fuu.

⁷⁶Aan du cukalel, a noddirte annabaajo Laamɗo Toowɗo, sabo a artoto Joomiraaɗo warde faa moƴƴinanaa mo laabi makko,

⁷⁷faa anndinaa yimɓe makko laawol kisindam ley ko o yaafotoo hakkeeji muɓɓen.