Lukas 1:31-77

³¹Ke lape sam pe ohoe tum tamane ngana e pe o hetue i ke ene Iesus.

³²Pe i nge lape lohot ke NeHalang nena non kerkereng ngana ia. Pe pingana song pe te hetue i ke NeHalang Nge I Soke Nga Lut Toto Tuna.

³³NeHalang lape poia i ke i Israel mur aria naungaala ana non ke pomange nette Teuit. Pe i lape nauele iri nga etue lochloch sapele.”

³⁴Pe Maria hele lange angkelo, “Iau etu luluch nge none ero kura i. Pe ure nei lape lohot ke pomere?”

³⁵Pe angkelo neu tuacholia, “Opepengpeng lape sio at nge iong pe NeHalang Nge I Soke Nga Lut Toto nena hekerkerenga lape tu hite iong. Pomalam lape te hetue tum nem ke i NeHalang Tuna nge pengpeng toto.

³⁶Onau lange alom Elisapet. Te teke i hoho erochro pe nga etue nei tuauna lo pe mes mule ke nena teio iri rahtele elle.

³⁷Ure lochloch ngana nenge anali toto nge hana te poia NeHalang nakuna nge poia.”

³⁸Ol pe Maria hele, “Iau i loi. Iau Non Soke na hekuleileinga. E nanas mene NeHalang lemene ngana nenge o heleia lo.” Pe angkelo neu hile i pe la sapele.

³⁹Mala ero mana pe Maria lohaka ke langa kileng e nga lut nge Iutea.

⁴⁰La pe i teu nga Sakarias na pele pe hele “Uach toto.” lange Elisapet.

⁴¹Pe Elisapet longe Maria na helenga pe amneia tuna nge sechsech nga letena pe Opengpeng hemute i

⁴²pe hele haka sapele, “NeHalang pete tote iong nge hehei lochloch pe pete tote tum nenge lape o hoe nem.

⁴³Pomere toto nge ak Non Soke tana at ke nau tote iau?

⁴⁴Iange e longe iong nge o hele uach at nge iau pe tuk iech toto pe sechsech nga letek.

⁴⁵Non Soke pete iong lo iange letem manmanna ia na helenga nge lape lohot ke manmanna toto.”

⁴⁶Maria hele, “Nga letek lochloch e heto heke Non Soke.

⁴⁷Iau e iech toto nge NeHalang nge mene mule iau!

⁴⁸Iange iau heie mana nga ich pe i letena metene iau. Hulua nenge tetu nga etue nei pe nga etue lochloch nga hoena lape te hetue iau ke hei nge NeHalang heiech ia.

⁴⁹Iange NeHalang na kerkerenga halang poia ure papalau ngana ke lohot nge iau. Ia I na poinga pengpeng toto.

⁵⁰NeHalang letena poreke ia iri lochloch nenge te mataua I. Iri nenge te tu nga etue nei pe nga hoena pule

⁵¹Hana nenge tetal heke iri nga leteria toto NeHalang tul hote penna pe na kerkerenga sisparai sue iri.

⁵²Naungaala nemur nenge tetal heke iri ke kokoes NeHalang tal sio tote iri. Pe iri nenge teau sio tote iri nga NeHalang matana, NeHalang tal haka tote iri langa lut.

⁵³NeHalang tunge ure urana ngana mur lange iri nenge reria ute hel ero. Pe iri nenge reria ure halang NeHalang kulosia iri pe te patpata mana ke tela ol.

⁵⁴NeHalang halaua Israel mur pe letena ia Apraham pe na tete mur nga etue lochloch. Iange letena metene helenga utona nem nenge heleia lange rera tete mur nge nike.”

⁵⁶Iok laol, Maria tu luluch nge Elisapet ke teio mol het pe la mule nga na kileng.

⁵⁷Elisapet ana etue nenge hoho ia lohot pe hoe tuna tamane ngana e.

⁵⁸Elisapet na kileng ngana mur pe alona mur te longe nge Non Soke poi ke urana toto lange i pe iri lochloch te iech luluch nge i.

⁵⁹Pe kol nem ana etue iri rahtele mol (8) pe te riria i pe te teke te hetue i ke ene Sakarias.

⁶⁰Pe tana hele ele iri, “Ero! Ene laka Ioanes.”

⁶¹Pe alona mur te hele, “Iong alom mur eria pomam ero!”

⁶²Ke het pe tepoi urume reria onteinga nga peria lange Sakarias pe te onteia i, “Kol nei lape ene pomere?”

⁶³Pe Sakarias ontei rara alalaha sachana ke has haka ia. Pe la has sue ke ene Ioanes. Ol pe iri lochloch te esia pe te rura.

⁶⁴Pe nga etue neu pengpeng Sakarias hanna olha ke hele mule pe heto heke NeHalang.

⁶⁵Pe na kileng ngana mur te rura toto pe singiria matau nga urene nge lohot. Pe te hesongia helenga ke ronge kileng mur nga lut nge Iutea.

⁶⁶Iri lochloch ngana nenge te longe leteria tuanin raraia pe te ontei, “Kol nem mam lape lohot ke i utar?” Pe te eteia nge Non Soke na kerkerenga tu hit mene i.

⁶⁷Opepengpeng hemuta heke Ioanes temene Sakarias pe haliu hot sapele NeHalang na helenga:

⁶⁸“Ta heto haka tote NeHalang Israel mur aria Non Soke! Iange i sio at ke halaua nena hana mur pe mene mule iri nga reria poinga poreke ngana mur.

⁶⁹Pe tung sue hemasinga e nge na kerkerenga halang ke hemas mule ita lochloch. Pe i nenge hemasmas nem at nga mata nenge Teuit (NeHalang nena hekuleileinga).

⁷⁰Hetatalonga mur nge nike te hele hote na helenga kerkereng ngana mur.

⁷¹Ke te teke NeHalang mene mule ita nga rera ngarang mur peria pe nge iri nenge muteria taua ita ero.

⁷²Pe NeHalang hele ke teke lape letena ia rera tete mur pe letena metene helenga tomunga hel nenge pengpeng toto.

⁷³Nena helenga utona nenge heleia lange Apraham ma ke mai:

⁷⁴NeHalang lape mene mule ita nga rera ngarang mur peria ke ta ume mana nge i pe ta mataua rera ngarang mur ero ol.

⁷⁵Pomalam laka poinga poreke ngana e tu nge ita ero pe ta pengpeng toto nga NeHalang matana nga etue lochloch nenge tatu nga ich.”

⁷⁶Sakarias hele lange tuna, “Iau tuk iong pe lape te hetue iong NeHalang nenge I Soke nga Lut Toto nena hetatalonga. Iong lape iong muka nge Non Soke ke o hepengia nena kue.

⁷⁷Pe o hele lange hana lochloch ke NeHalang lape hemas mule iri ke pomai: lape saua reria poinga poreke ngana mur ke te lasus toto.