Kàdduy Waare 10

1

2

3

4

5

6

7

8

9

10

11

12

¹As weñ tàbbi ci diw gu xeeñ, yàq ko; ab dof it jëfam su tuut neenal na xel mu rafet ak daraja.

²Xelu, jubal; dofe, jàdd.

³Te it ku dofe buy dox sax, du ànd ak xelam; ku ko gis, xam ne kii dof la.

⁴Su la sa kilifa meree, bul jóge fa ñu la teg; tooñ yu mag, teey ba giif.

⁵Lu mettee ngi lu ma gis fi kaw suuf, lu mel ni njuumte lu rëcc kilifa:

⁶Ab dof bu ñu jox cér yu bare, boroom daraja féete suuf;

⁷ma gis baadoolo war fas, kilifa di rung ni baadoolo.

⁸Ku gas um yeer, repp nga tàbbi ca; ku bëtt miir, repp jaan matt la;

⁹kuy yett ay doj, repp nga caa gaañu; kuy gor bant, repp nga caa loru.

¹⁰Liggéeye weñ gu day te xacceesu ko, góor-góorlu war na ca; xelu, baaxle jariñoo.

¹¹Jaan màtte, balees koo jat, du njariñal jatkat ba.

¹²Ku xelu àddu, mu diw yiw; ku dofe wax, sànku.

¹³Bu jëkkee wax ju amul bopp, daaneele ndof gu sotti.

¹⁴Ab dof a ngi waxa wax, te kenn xamul luy xew ëllëg. Ana ku koy xamal gannaawam?

¹⁵Ab dof ak kër-këreem, coonoy neen; du xam sax yoonu taax ya.

¹⁶Ngalla yeen, réew mi gone falu buur, jawriñ ña di xëye xawaare.

¹⁷Ndokklee, yeen, réew ma as gor falu, te bu jotee, jawriñ ñay xéewlu, ngir am doole te baña màndi.

¹⁸Tayel, puj bu màbb; yaafus, néeg buy senn.

¹⁹Aw ñam bégal, aw ñoll bànneexal, xaalis tontu lu ne.

²⁰Sam xel sax bu ca saaga buur, sa néegu biir sax, bu fa saagaa boroom daraja. Xamoo picc muy yóbbu sa kàddu, mbaa njanaaw luy siiwali mbir ma.