1Gel ni tay yu Israel e go’ nang gubin e pilung ni yad bay ko ngal u Jordan — u lan e pi burey, nga enggin e burey, nge ga’ngin dapel’ay u Mediterranean i yan nga Lebanon; ni aram e pilung nu Hit, Amor, Kanaan, Periz, Hiv, nge Jebus.
2Yad gubin nrabad nga ta’bang ngar puthiyed gelngirad ni ngar chamgad ngak Joshua nge piyu Israel.
3Machane girdi’ nu Gibeon, ni aram Hivite, e rrung’aged e n’en nike rin’ Joshua ngak puyu Jeriko ngu Ai,
4Ma aram miyad leamnag ni ngar ban niged Joshua. Ere ranod ngar feked boch e ggan ngar sugyed daken e dongki rorad nga bogi tutuw nike kaday nge pi tutuw ko wayin ni kanip’ e yungin ke mogchoth riy.
5Miyad yon’ e mad nike mogmogchoth nge sus nike kaday ni kanip’ e yungin ke math’ riy. Ma flowa nra feked e ke el el ma ke pthethaw.
6Ma aram miyad yan ko gin be par yu Israel riy u Gilgal ngar ga’argad ngak Joshua nge pumo’on nu Israel, “Kugbad nib palog. Gamad ba’adag ni ngam flaged e tha’ u thildad.”
7Machane me ga’ar e pumo’on nu Israel, “Mangfan ni nggu falegned reb e tha’ u thildad? Dabisiy nigmed ma par nib chugur ngaray.”
8Miyad ga’ar ngak Joshua, “Gamad e ngu pigpiggad rom.” Me fithrad Joshua ni ga’ar, “Gimed chon mini’? Ma uw e kambad riy?”
9Miyad weliy salparad nra ga’argad: “Siro’, ma kugbad u bang ni rib palog, ni bochan e kug rung’aged marung’agen SOMOL ni Got rom. Kug rung’aged urngin ban’en nike rin’ u Egypt
10nge n’en nike rin’ ko fa gali Pilung nu Amor ko ngek u Jordan ni Sihon ni Pilung nu Heshbon nge Og ni Pilung nu Bashan, ni yow ma par u Ashtaroth.
11Keyog e pi’in ma yog e thin romad nge gubin e girdi’ ni yad be par u daken e but’ romad ni nggu feked boch e ggan, ya nggu flaged rogmad ko milekag ni nggubad gu mda’ niged gur. Ma kanog ngomad ni nggu manged tapigpig rom magmad yog ngom ni ngam fal’eg ba tha’ u thildad.
12Amsap ko flowa romad, ya ka nap’an ni gu chuwgad u tabinaw romad ni nggubad guyed gur, ma ka ba guwal. Ma chiney, e am sap ya ke mlik’ ma ke pthethaw.
13Nap’an ni gu suguyed e pi tutuw ko wayin romad, ma kab be’ech, ma am sap! Ya ke kaday. Mad romad nge sus e go’ ke kaday ko milekag nib n’uw.”
14Pumo’on nu Israel e ra feked boch fapi ggan rorad, machane dar fithed murung’agen ngak SOMOL.
15Me fal’eg Joshua ba tha’ ni ngar tafgergad e girdi’ nu Gibeon ma ngan pagrad ni dab nli’rad. Pi’in yad ma yog e thin ko ulung nu Israel e ra dugliyed ni ngar ted e ra tha’ nem nib mich.
16Dalip e rran nga tomuren ni kan ngongliy fare tha’, me pir’eg yu Israel ni fapi girdi’ e yad ma par nib chugur.
17Me’ere yan e girdi’ nu Israel u lan dalip e rran ngar tawgad ko fapi binaw nma par fapi girdi’ riy ni aram yu Gibeon, Chefirah, Beeroth, nge Kiriath Jearim.
18Machane piyu Israel e dabkiyag ni ngar li’ed e picha’nem, ni bochan fare tha’ nike micheg e pi’in yad ma yog e thin rorad nga fithingan SOMOL, ni Got rok yu Israel. Urngin e girdi’ nra topluwgad ko fa pi’in yad ma yog e thin rorad u murung’agen e ren’em,
19machane ra pi’ed e fulweg riy nra ga’argad, “Kug micheged ngorad u fithingan SOMOL ni Got rok yu Israel. Chiney e dabkiyag ni ngad rin’ed ban’en ngorad.
20Thingar dapaged ndab da li’edrad ni bochan e tin kad micheged ma fa’anra dab dfolgad, ma Got e ra gechig nagdad.
21Ngad tedrad ndab nli’rad, machane ngu’ur th’abed e l’ud miyad be ling e ran rodad.” Irera’ e n’en nike yog e picha’ nem ni yad ma yog e thin.
22Me pi’ Joshua e thin ni ngan fek e girdi’ nu Gibeon i yib ngak, me fithrad, “Mangfan ni kamban niged gamad ni kamoged ngomad ni gimed ma par nib palog nga orel, ma irera’ ni gimed be par nib chugur?
23I Got e bayi kirebnag wa’athmed ni bochan e ran’ey ni ka mu rin’ned. Tiromed e girdi’ e bay urpired ni gubin ngiyal’ ni yad bogi sib, ngu’ur the’bad e l’ud ma yad be mat’eg e ran i yib ko naun rok e Got rog.”
24Miyad fulweg, “Siro’, kug rin’ed ban’en ni aram rogon ni bochan e kug nanged ni riyul’ ni SOMOL ni Got rom e keyog ngak Moses ni tapigpig rok ni nge pi’ ngom e gi binaw ney ni ga’ngin me li’ e girdi’ ni yad be par riy u nap’an ni gimed be yan nga m’on. Ma kug rin’ed ni bochan e kugm’ad ko marus ngom; ma kagmad be rusnag e pogofan romad.
25Ere chiney e gamad bay u tan gelngim; ere mu rin’ ngomad e tin ga be leamnag nib mat’aw ma ba manigil.”
26Irera’ e n’en ni rin’ Joshua: i aywegrad ma depag e girdi’ nu Israel ni nge thang e pogofan rorad.
27Machane ku be tayrad ni yad e sib, ni ngu’ur th’ebad e l’ud ma yad be mat’eg e ran ni fan ko girdi’ nu Israel nge ran ko altar rok SOMOL. Ke mada ko daba’ ma ku yad ma rin’ ere maruwel ney ko gin’en ke duwgiliy SOMOL ni ngu’un liyor ngak riy.
