Jonás 4

1

2

3

4

¹Erë e' kë̀ dör bua' Jonás a̱ ta̱ ie' uluneka̱ tai̱ë.

²Ie' iché Jehová a̱: —A Jehová, be' isué̱. Mik ye' tkëria̱ ye' ka̱ska', eta̱ ye' iyë' tö be' e̱r buaë chöraë Nínive wakpa a̱. Ye' wa̱ ijche̱r tö be' dör es, e' kue̱ki̱ ye' bakshkar Tarsis. Ye' wa̱ ijche̱r tö be' kë̀ ulurta̱'ka̱ bet. Be' e̱r tottoë. Be' sa' suè̱ e̱r sia̱rë wa. Mik sa' tö ì sulu wamblé ta̱ sa' e̱r mane'wé̱, e' ta̱ bet e' nuí̱ olo'yé be' tö sa' ki̱, kë̀ sa' we'ikè we̱s be' sa' pau̱ñé es.

³A Jehová, e' kue̱ki̱ ye' be' a̱ ichè ye' ttö́wa̱, e' dör bua'ie ye' a̱.

⁴Erë Jehová tö ie' a̱ ichaké: —¿I̱ma be' ibikeitsè tö be' wa̱ ka̱wö ta̱' ulunukka̱ se̱ es?

⁵Eta̱ Jonás e̱' yéttsa̱ Nínive mía̱ diwö tskirke e' kke̱ ta̱ ee̱ úla yuéka̱itö e̱' blóie dìba yöki̱. Ee̱ ie' e̱' tkése̱r ì tkö̀mi Nínive wakpa ta̱ e' wà panuk.

⁶Eta̱ Skëköl Jehová tö kalkua tskéka̱ elka tala'wé̱ka̱itö Jonás tsa̱ka̱ a̱s ikí̱ ttsë'r buaë. E' tö ie' ttsë'wé̱ buaë.

⁷Erë bule es bla'mi ká̱ ñine eta̱ Skëköl tö í̱ patké kalkua katökwa ta̱ isinewa̱ duowa̱.

⁸Mik diwö deka̱, eta̱ ie' tö siwa̱' darërëë ba'baë e' patké diwö tskirke e' kke̱ Jonás ki̱. Dìba a̱ne darërëë Jonás wökir ki̱, ta̱ ie' tö ittsé tö ie' siwa̱'a̱rkewa̱. Ibikeitséitö “¡Ye' mú duö̀wa̱!” Ie' iché, “Ye' duowa̱, e' dör bua'ie ye' a̱.”

⁹Erë Skëköl tö iché ie' a̱: —¿I̱ma be' ibikeitsè tö be' wa̱ ka̱wö ta̱' ulunukka̱ kalkua sinewa̱ e' kue̱ki̱? Ie' iiu̱té: —Tö́, ye' wa̱ ka̱wö ta̱'. ¡Ye' ulune tai̱ë mik ye' duowa̱ eta̱ e' olone!

¹⁰Eta̱ Jehová tö iché ie' a̱: —Kal kuá kë̀ tkëne be' wa̱, kë̀ talane kë̀ kaneo̱ne be' wa̱. E' tskine talane ká̱ et nañewe ë̀, bule es nañewe ta̱ iduowa̱, e' dalëne be' é̱na.

¹¹Eta̱ ¿we̱s ye' kë̀ é̱na Nínive wakpa dalënuk? Ie'pa dör tai̱ë, ie'pa ala'rla tso' tai̱ë döka̱ 120.000 kë̀ wa̱ ijche̱r ì dör buaë, ì dör suluë. Ñies ie'pa iyiwak tso' tai̱ë.