Joel 2

1

2

3

¹Duruk Zion awote trumpet itugumalko; aninga duruk laili mu awote nirung mu te kariimet sinar nungaralko. Yawe ko tom balman mu aitak tai pingi aram se nina suen la ali imi te bagasan mu ko sinar talko!

²Tom mu tairuk mu taiti nuwi kaetam ko tiromorom duruk ira saparuk ale sor taukko; Kaem ko gomang magara ko kager, kariimet bo girakala se udagi me arigokko, mu tairuk ale sor ninguru ira saparukko.

³Kager mu me taira la, mu sor ko ariga ningam Eden iwita arikko; bare kam kager mu aolak iluso mu, tama iwita mel kasik biya koma te aniso mu kai saposo; se kager mu aolak ilu namoso se buring ko mu, sor kani malilaram iwita arikko; mel bo ta am ari betemonko mu mena.

⁴Nunga ariga mu horse iwita, se kager ningi kager ko namasan mu horse iwita tengesan.

⁵Ale nungumik nirung mu karis ko nirung iwita, se duruk bibiya ta wore am kuali kapasan; se tam tareng kaniso ale pirikpirak maso iwita, tam gawa gurek am no sapasan; ale kager motam biya kager ko namakoyam namasan.

⁶Se kariimet nungarkasan ale nodora namoso se nguanga gilingisan.

⁷Nuna kager kari aora aora iwita, kar kalel biya ta wore am kuali kapasan; nuna kager nongoma tusan ale arerem la namasan, ale nunumi nomoke ko me kapasan.

⁸Nuna nunumi te sorara gurungumura mena, am diram la namasan, se mel bo nongoma me siruwukoyam am dirkiriyam namasan.

⁹Nuna wuli ago wonong se ko kar mu am ira namasan, ale kawam aragasan ale tere kari iwita ko kuring gotektek mu ningi kasu nagusan.

¹⁰Tom nuna taisan mu ali wanara ko kapa kam taisan; se taiti gomang mu uririkiso; se worem sige nomotam tirom iluso, se baras me nikim kapasan tala.

¹¹Yawe pure pagakoyam ko kager kari nongoma ko giriso; noko kager kari mu kaura moke mena, ale sokel karogo la nu kuring karo tusan. Yawe ko tom mu duap bo, se nguangara karogo. Awiri sokel ago sanamarukko terong? Mena.

¹²Bare Yawe iwita balso: “Aitakta ewerta nengemang motam lilim ago peleral agate tairalko; inang kaolal ale nia mo se tairalko,” maso.

¹³Ninimi karur tuguma ko munan te me ira sanamaralko, bare nengemang motam bataga mu nu tualko. Yawe nenenga Kaem kote peleral tairalko, mu awuk, nu gomang lila se gomang bataga ko Kaem; nu gomang tairate me magoso, se ninguru nanga kua lagoso; nu nanga memek koma nanga maguwura mu me ko kua lagoso.

¹⁴Uwuta betenak mu asele nu ko ikia gurugok ale gomang nangaruk ale nanga sangukko agila? Se nanga inang muguri se nanga waen mel akingtala kapa nangarukko, se sang gi karogo nama Yawe nanga Kaem mu munan tunakko.

¹⁵Duruk Zion awote trumpet itugumalko; kariimet nunga ilu biguwural se laili kaumon ale inang kalomonko.

¹⁶Kariimet suen la nunga bolala awuralko; kari supuling ta, kuriang gotektek ta, se kuriang mimili mu karogo tala, se imet kari iru nunumi gimonko negawara mu nongorak tai Yawe koma te la bolala awu saparalko.

¹⁷Se priest alo, Yawe ko ura betesan, mu temple kuring se tama betera kuwim temple kuring ko aniso mu kusumuri mu te, nongomang bataga se wosenga kira se balmon, “O Yawe, ka kariimet nunga gemang batagukko! Sor saki nungarki sager se dolara den nangaru se balmon, ‘Nenenga Kaem apoko ya?’ ma me balmonko.

¹⁸Asele Yawe ko ali se ko kariimet magaman kueneman mu nunga gomang batagam se gomang nungaram.

¹⁹Nu nuguring iluwam ale balam: “Ani inang muguri iru se waen ningo ningo se olive oil terong ma la ningaru saparikko; ale udagi sor saki ko kariimet nongoma te me dolara ningarikko.

²⁰“Ani kager motam biya koma north mu te taiman mu nunga sarumu warik se ali maraka biya mu te namamonko; saki koma worem bausa te mu Gagi Dead Sea ningi nunga warik se sarenga namamonko; se saki worem kapara te mu, Gagi Mediterranean ningi sarenga namamonko. Ale iwi namamon ale siring kapamonko.” Nunguningta, Yawe mel ningo ningo suen biya beteram!

²¹O Judah, ni me nguangerko; gemang nungeruk se amilmilerko. Nunguningta, Yawe mel ningo ningo suen biya beteram!

²²O anapeya mel, nina me nguangaralko! Giarum se sirsir mel gawa gurek iru mu barasuwoso. Tam duap duap se tam fig se tam waen mu sisik iru warsan.

²³O Zion ko kariimet, nina nengemang nungeruk se Yawe nenenga Kaem mu ko ninguru amilmilaralko! Mu awuk, nu ningo diram se ulengkala bitakaso iwita, tuwik ko tom tom te diram ningarso.

²⁴Barley se wheat te nunga burangara ko kuwim mu inang karogo duruk tarigirukko; se yu waen se olive oil te nunga ko kuwim mu waen se oil karogo lilim arukko.

²⁵“Anigita kager bitakasam se locust nunumi nogowom kaora la taikasan ale ninga maguwukasan; ani aninga kager kari sokel ago iwita nunga bitakasam se taikasan. Bare yia awilaya ninga na inang magaram mu aking kuwim kuwim te nungek se aratukko.

²⁶Se ninga na inang suen kelaguk se udagi me ko kueralko; nina ani Yawe, nenenga Kaem, aip patawu se lagaralko; ani agata mel bibiya nego ko beterem. Se udagi nina aninga kariimet me magi kutuwa se dola lagaralko.

²⁷Se Israel, mu te nina ikial, ani nina nengerak bagasam. Ani Yawe, nenenga Kaem, kaem bo bo mena. Se udagi nina aninga kariimet me magi kutuwa se dola lagaralko.

²⁸“Se maingte ani aga Bur bitirik se kariimet suen la nunga ningi kaparukko. Se ninga namarari se ninga nanawusari mu agiring tamon ale agiring diram la balu pagarmonko, se ninga kari garuk mu ipingira arigimonko; se ninga kari kulak mu kausa yumura sang arigimonko.

²⁹Se aga ura kari ta se aga ura imet ta nunga ningi karogo la bitirik se kaparukko.

³⁰Tom mu te taiti gomang te se ali te kausa duap duap, gue, se tama, se tama bur biya iwita bitirik se aratukko.

³¹Worem motam tiromorom paguk, sige motam gue iwita guar mauk, asele Yawe ko tom biya, nguangara ago, umutang aratukko.

³²Se awiriya Yawe nup te airuk mu saonga taukko; mu awuk, Yawe balam butata, Duruk Zion te se Jerusalem ningi mu kariimet ikup memek kia kapaman ale bagasan mu nunga ningi, noko ma nunga balam mu nunga giokko.”