Joel 3

1

2

3

¹“Ikialko! Tom mu kaparuk se ani Judah se Jerusalem ningi mel suen biya nungek burangarikko.

²Tom mu te ani sor suen la nunga bolala awurek ale arungak Jehoshaphat ko sor gomeng mu te arungu kaparikko. Aninga kariimet Israel mu aninga angamang motam, bare nungumik te kilek memek bita lagaman umu ko, ani kuwim mu te den te nunga bitirikko, mu awuk, nuna aninga kariimet nunga parusuwuman se sor sor namaman bagakasan, ale nuna aninga ali pakaku nunumi tui gurugu ago namaman.

³Ale nuna aninga kariimet ura dungan ko nunga gimonko kolara kolaman ale nunga parusuwu nunumi tuman. Aking nuna aninga kari kulak se imet itiwik mu mel yam ko nunga bitakasan, ale arungu nama kari saki arungu diakasan, ale koma manga tokasan mu te lage luan imet te nunga dia se, waen te agotala dia nokasan.

⁴“Tyre, Sidon se Philistia sor lilim la, ikialko! Ani memek awuk wore beterem se nina butata aningate betesan a? Ani mel i nengete bita maguwurem se koma ko suwuta betesan e? Buta agi mu, sinar talko! Ani tairik ale kiwem nina beteman mu ko koma ninga maguwurikko.

⁵Mu awuk, nina aninga silver se gold se aga mel yawara yawara giman ale ago nama ninga temple ningi awuman.

⁶Ale nina aninga kariimet Judah se Jerusalem mu nunga giman ale Greek alo arungu nunga diaman, se nunga sor beteman awar biya namaman.

⁷“Bare iwita ikialko. Aitak mu ani kuwim nina te nunga beteman se namaman umu te nunga giek se pelemon ale taimonko. Ani nina kilek aguwaya nuna nungumik te beteman turantala nina ningimik te bitirikko.

⁸Ale ninga nanamarari se ninga nanawusari mu nunga giek ale Judah alo nuguting te nunga awurek, se aking nuna nunga gimon ale Sabean alo nongorak diamon se nuna nunga sor awar biya nunguningkiri mu te nongorak namamonko.” Imi Yawe ko kuring se uwutata aratukko.

⁹Den imi balal se sor sor namarukko: Kager ko ninimi nungalko! Kager kari nongomang patawural se suen la tai bolala awumon ale sanami muruwumonko.

¹⁰Ninga ali te kaura ko mel mel ital se nama kager ko batir ko aratamon, se tam kower te tagi karogo kapara ko yaku mu moa dingumu ago namaral se gatu ko aratamonko. Se kituwura alo ta wore nokokosa momon ale balmon, “Ani asokel ago!” mamonko.

¹¹Nina sor suen la ninga koma koma te pasak tai umu te ilu biguwuralko. O Yawe, ni ka kager kari arungu tai kaparko!

¹²Yawe balso, “Sor suen la barasamon ale Jehoshaphat ko sor gomeng mu te taimonko; mu awuk, ani umu te daigek ale sor suen la nunga tuterikko.

¹³Arigalko. Nononga kilek memek mu yopa saparam. Inang muguri mu garukaram, se batir sisuwuralko! Waen ko nunguning yoparam se bolala awuman mu kuring aratam, se tairal ira parusuwural se kani waen yu karogo mu kuring aratu saparukko!”

¹⁴Kariimet ninguru ta, se kaura koma mena, mu tai kuwim gomeng, den te tutera ko, mu te biguwuman. Mu awuk, Yawe ko tutera tom sor gomeng mu te mu tai pingi aram.

¹⁵Worem se sige mu tiromorom kelagamonko, se baras nikim me kapamonko tala.

¹⁶Yawe Zion baga se lion iwita niaruk, ale Jerusalem baga se pure iwita paguk se ali se taiti mu uririkimonko. Bare Yawe mu ko kariimet Israel nunga yumura kuwim gek am bagarukko.

¹⁷“Se munan umu te nina ko ikialko, ani Yawe, nenenga Kaem, ani aga duruk laili Zion bagasam. Jerusalem mu akingtala laili anirukko; se udagi kariimet iwareng taimon ale me ta eremonko ale kau tamonko.

¹⁸“Tom mu te duruk luan mu tam waen ago terong maukko; se duruk dopang mu bulmakau amin welang ago mu ago terong maukko; se Judah sor suen la yu ago la terong ma saparukko. Yu ningo bo Yawe ko temple ningi palenguk aratuk ale sor gomeng maraka mu yu tui saparukko.

¹⁹Bare Egypt mu sor garagarayam memek ko aratukko, se Edom sor mu betela maraka garagara maukko, mu awuk, nuna Judah kariimet arungu kagerman, ale kariimet nungumik den mena wore nunga moman se kueman.

²⁰Se Judah sor mu kariimet ago terong ma saparukko; se Jerusalem mu kariimet karogo pempem butata anirukko.

²¹Ani kariimet nungumik den mena, nunga moman se kueman se ani koma me kutuwurem, mu koma kutuwurekko.” Yawe Zion pempem bagoso!