Hose 12

1

2

3

4

5

6

7

8

9

10

11

12

13

14

¹Efirami bɔnsɔnna n nabilinxi wulen na. Isirayila yamana n yanfama. Koni Yuda kaane mɔn biraxi Ala nan fɔxɔ ra, e lannayaan nabama e nun sariɲandene.

²Efirami bɔnsɔnna e masoma fe fufafune nan na, a luxi alo a foyen nan sagatanma fɛriɲɛn gbɛn! A wulen nun fe ɲaxin nawuyama ayi. A layirin xidima e nun Asiriya yamanan tagi, a Oliwi turen soma Misiran mangan yii.

³Alatala Yuda muxune makitima nɛn, a Yaxuba bɔnsɔnna wali ɲaxin saranma a ra nɛn, a yi a saren fi a kɛwanle ra.

⁴A a nga kui, Yaxuba yi a tada santinban suxu, a to fori, e nun Ala yi gerenna so.

⁵E nun malekan yi yɛngɛn so, a nɔɔn sɔtɔ. A yi wuga, a yi mayandin ti. Yaxuba Ala li Betɛli nin. E nun Ala falan ti mɛnna nin.

⁶Alatala, Ala Sɛnbɛn Birin Kanna nan yi na ra. Xili gbee kanna nan Alatala ra.

⁷I tan xa fa i ya Ala ma, i hinanɲɛ ayi, i sariyan suxu. I xaxili ti i ya Ala ra waxatin birin!

⁸Isirayila yanfan tima alo sarematina, ligase ɲaxin naxan yii. Muɲan nafan a ma.

⁹Efirami bɔnsɔnna bata a fala, “N bata bannaya han! N bata nafunla sɔtɔ, koni n ma wanla tɔnɔn nan a ra! Hakɛna hanma yulubi yo mi n ma.”

¹⁰Alatala nan n tan na, i ya Ala, naxan i rafaxi keli Misiran yamanani. N mɔn i radɔxɔma nɛn bubune bun alo yamaan yi kii naxan yi na waxatini.

¹¹N bata falan ti nabine xa, e yi toone ti n xɔn. N bata sandane sa nabine xa.

¹²Xa suxurene Galadi yi, e yɛtɛɛn luma nɛn fuu! E ɲingene bama saraxan na Giligali yi, koni e saraxa gandene luma nɛn alo gɛmɛ malanxine xɛɛne ma.

¹³Yaxuba a gixi nɛn siga Arami yamanani, Isirayila yi wanla kɛ a ɲaxanla futu seen na, a yi xuruseene kantan.

¹⁴Alatala Isirayila raminixi nɛn Misiran bɔxɔni nabiin xɔn, a Isirayila kantan nabiin sabun na.

¹⁵Koni Efirami yi Ala raxɔlɔ gbeen ti. Nanara, a marigin mi a mafeluma a faxa tixin na, a a xɔnnantenyaan naxɛtɛma a ma nɛn.