Hose 4

1

2

3

4

5

6

7

8

9

10

11

12

13

14

¹Isirayila kaane, ɛ Alatalaa falan namɛ! Amasɔtɔ kitina Alatala nun ɛ tan tagi. A naxa, “Lannaya mi fa na. Hinan mi na. Ala kolon mi fa yamanani ito yi.

²Dangan nun wulen nun faxan nun muɲan nun yalunyaan nan na. Gbalon bata gbo ayi, faxan tima a bode fari.”

³Nanara, ɛ yamanani xarama nɛn, a niimaseen birin yi xɔsi. Subene nun xɔline, hali baa yɛxɛne fan faxama nɛn.

⁴Koni muxu yo nama matandin ti, muxu yo nama yamaan mafala, amasɔtɔ kitina nxu nun saraxaraline nan tagi.

⁵Ɛ tan saraxaraline nun nabine tantanma kɔɛɛn nun yanyin na. Nanara, n na ɛ nga Isirayila faxama nɛn.

⁶N ma yamaan bata kala, amasɔtɔ kolonna dasaxi a ma. Bayo ɛ bata ɛ mɛ kolonna ra, n bata ɛ ba n ma saraxaraliyani. Bayo ɛ bata ɛ Alaa sariyan nabeɲin, n fan bata ɛ diine rabeɲin.

⁷Saraxaraline nɛma wuyɛ ayi, e yulubine fan gboma ayi. Nanara, n na e binyen masarama nɛn yagin na.

⁸E lugoma n ma yamaan yulubine xɔn. Yamaan hakɛne e nii yifanma e ma.

⁹A ligama nɛn saraxaraline ra alo yamana, n yi e kɛwanle saran e ra.

¹⁰E e dɛgema nɛn, koni e mi lugoma. E suxurene batuma, koni ne mi e rasabatima. Amasɔtɔ e bata Alatala rabeɲin, e yi e sɔbɛ so

¹¹yalunyaan ma e nun dɔlɔ fonna nun dɔlɔ nɛnɛ minna. Ne nan e xaxinla kalaxi.

¹²N ma yamaan suxure wudine maxɔdinma, alo dunganna nan falan tiyɛ e xa. Amasɔtɔ yalunya xaxinla bata e ralɔ ayi, e yalunyaan ligama Ala ra.

¹³E saraxan bama geya gbeene xuntagi. E wusulanna ganma geyane fari, xanamu warine nun wudi tofaɲine nun kondene bun ma, e nun wudi belebelen naxanye ninin gbo. Nanara, ɛ dii tɛmɛne yalunyaan ligama e nun yalunden nan ɛ bitan gilɛne ra.

¹⁴N mi ɛ dii tɛmɛne yulubine saranma e ra bayo e yalunyaan ligama, hanma ɛ bitan gilɛne bayo yalunden nan e ra. Bayo ɛ tan yɛtɛn yalunyaan ligama ɛ nun yalundene, ɛ nun ɲaxalan yalunxine saraxan bama. Yama xaxilitarena a gima a bɔnɔni.

¹⁵Isirayila, xa i lu yalunyani, ɛ nama Yuda ti hakɛn ma, ɛ nama siga Giligali yi, ɛ nama te Beti-Aweni yi. Ɛ nama ɛ kɔlɔ Alatala xinli!

¹⁶Xa Isirayila murutɛxi alo ɲinge mataganxina, Alatala xa e masuxu di? Alo yɛxɛɛdina mɛrɛmɛrɛ faɲin ma.

¹⁷Efirami bɔnsɔnna muxune bata kankan suxure batun ma, e lu na!

¹⁸Xa e minseene bata dasa, e sa dangu yalunyaan ma. E mangane waxi yagin nan xɔn.

¹⁹Nanara, wuluwunla e xalima nɛn, e yi yagi e saraxane fe ra.