Hose 11

1

2

3

4

5

6

7

8

9

10

11

12

13

14

¹Isirayila to yi xurun, n yi a xanu. N yi n ma dii xɛmɛn xili a xa keli Misiran bɔxɔni.

²Koni n to yi e xilima, e yi e masiga n na. E yi saraxan ba Baali suxurene xa, e yi wusulanne gan suxurene xa.

³N tan nan yi Efirami bɔnsɔnna maxaranma siga tideni, n yi e suxu e yiine ma, koni e mi a kolonxi a n tan nan yi e rakɛndɛyama.

⁴N yi e mabandunma marafanna nun xanuntenyaan nin. N tan nan xun xidi wudin baxi e xunna ma, n yi n felen n donseen so e yii.

⁵E xɛtɛma nɛn Misiran bɔxɔni yati! Asiriya yamanan nan nɔɔn sɔtɔma e xun na, amasɔtɔ e bata tondi fɛ n ma.

⁶Nanara, sofane fama silanfanne ra e taane yi, e yi e taan dɛɛn wurene gira Isirayila kaane fe yitɔnxine fe ra.

⁷N ma yamaan kankanxi murutɛn ma, e birin bata ala gbɛtɛye fen koni e mi xunna kenla fiyɛ e ma.

⁸Koni, Efirami, n xa i rabeɲin di? N xa Isirayila so yiini di? N xa i liga alo Adamaha ba? N xa i lu alo Seboyimi ba? N bɔɲɛn wolonxi n kui. N ma kininkininna birin bata fa.

⁹N mi a ligama n ma xɔlɔ gbeen xasabini, n mi fa Efirami bɔnsɔnna kalama, amasɔtɔ Ala nan n na, muxu mi n na. Sariɲantɔɔn nan n na i fɛma, n mi fama xɔlɔni.

¹⁰Bayo e sa birama nɛn Alatala fɔxɔ ra, a na wurundun alo yatana. A tan na wurundun, a diine fama xuruxurunɲɛ nɛn keli baan dɛ.

¹¹E fama xuruxurunɲɛ nɛn alo xɔline keli Misiran yamanani, alo ganbane e keli Asiriya yamanani. N na e radɔxɔma nɛn e banxine yi. Alatalaa falan nan na ra.