Osee 12

1

2

3

4

5

6

7

8

9

10

11

12

13

14

¹Isirelibɑ bɑ rɑ n mɑn weesu kuɑmmɛwɑ, kpɑ bɑ n mɑn nɔni wɔ̃kumɔ. Adɑmɑ Yudɑbɑ bɑ kɑ nɛ, Yinni Gusunɔ Dɛɛro sĩimɔ dee dee.

²Isirelibɑ bɑ Egibitigibu gum wɛ̃ɛmɔ. Mɑ bɑ kɑ Asirigibu ɑrukɑwɑni bɔkumɔ. Nge mɛyɑ bɑ kɑ kpɑɑsibu kɑsu be bɑ ǹ sɑ̃ɑ gɑ̃ɑnu. N sɑ̃ɑre bɑ woo nɑɑ gire. Bɑ ben weesu dɑbiɑsiɑmɔ tɔ̃ɔ bɑɑtere. Mɑ bɑ dɑɑ bɔɔbɔyɑ mɔ̀ bɑ dɔɔ.

³Nɛ, Yinni Gusunɔ nɑ Yudɑbɑ siribu sokumɔ. Kon be Yɑkɔbun bweseru wɔrimɑ ben dɑɑ kɔ̃sɑn sɔ̃. Kpɑ n bu ben kɔ̃sɑn ɑre kɔsiɑ.

⁴Ben bɑɑbɑ Yɑkɔbu u win mɔɔn nɑɑ tokuru nɛnuɑ sɑɑ win mɛron nukurun di. Ye bɑ nùn mɑrɑ u kpɛ̃ɑ, mɑ u kɑ nɛ Gusunɔ wɔri kuɑ kɑ win dɑm kpuro.

⁵U kɑ nɛn gɔrɑdo wɔri kuɑ, mɑ u kɑmiɑ. U swĩ, mɑ u gɔrɑdo wi kɑnɑ u nùn domɑru kuɑ. Betɛli miyɑ u kɑ nɛ Gusunɔ yinnɑ. Mɑ nɑ kɑ nùn gɑri kuɑ.

⁶Nɛnɑ Gusunɔ wɔllu kɑ tem Yinni. Nɛn yĩsirɑ Wi u rɑ n wɑ̃ɑ.

⁷Bɛɛ Isirelibɑ, i de i wurɑmɑ nɛ bɛɛn Yinnin mi. I de i geɑ ko kpɑ i n mɑn nɑɑnɛ sɑ̃ɑ bɑɑdommɑ.

⁸Bɛɛ Isirelibɑ i sɑ̃ɑwɑ nge tenku be bɑ kilo weesugiɑ nɛni. Bɑ rɑ gbɛnɑ kɑ̃.

⁹Kpɑ i nɛɛ, kɑ gem i gobi wɑ, i dukiɑ bɑkɑ gurɑ. Kɔ̃sɑ gɑɑ sɑri ye sɔɔ. Bɛɛn sɔmburun ɑreyɑ.

¹⁰Adɑmɑ nɛ, Gusunɔ nɑ sɑ̃ɑwɑ bɛɛn Yinni sɑɑ mìn di i wɑ̃ɑ Egibitiɔ. Kon mɑɑ de i wurɑ i n wɑ̃ɑ kuu bekuruginu sɔɔ nge sɑnɑm mɛ nɑ bɛɛ yɑrɑmɑ Egibitin di i wɑ̃ɑ gbɑburɔ.

¹¹Nɛn sɔmɔbɑ nɑ kɑ gɑri kuɑ kɑ̃sinu sɔɔ, kpɑ be, bu mɑɑ kɑ bɛɛ gɑri ko. Beyɑ bɑ mɑɑ bɛɛ nɛn himbɑ sɔ̃ɔsi yɑ kɑ gisɔ girɑri.

¹²Kɑ mɛ, Gɑlɑdigibu bɑ kuɑ tɔn kɔ̃sobu. Mɑ bɑ koo kɑm ko. Bɑ rɑ kɛtɛ kinɛ dɑbinu go Giligɑliɔ. Adɑmɑ ben yɑ̃ku yenu nu koo ko kpee subenu gbɑɑnun kpĩi sɔɔ.

¹³Yɑkɔbu u kpikiru dɑ Arɑmuɔ. Miyɑ u sɔmburu kuɑ u yɑ̃ɑnu kpɑrɑ u kɑ kurɔ wɑ.

¹⁴Adɑmɑ sɔmɔ goowɑ Yinni Gusunɔ u gɔrɑ u dɑ u win bweseru Isirelibɑ yɑrɑmɑ Egibitin di. Sɔmɔ wiyɑ u bu kpɑrɑ.

¹⁵Adɑmɑ yenibɑ kpuro sɔɔ, Isirelibɑ bɑ Yinni Gusunɔ nuki sɑnkɑ too too. Yen sɔ̃, u koo de yɛm mɛ bɑ yɑri mi, mu wɔri ben wiru wɔllɔ. U koo de bu yen sekuru wɑ.