1Kũ gbɛ̃nↄ è Musa dí kipa kpia likalikaro, ò kàkara Harunai ò pìnɛ: Ǹ futɛ ǹ tãna kenↄ kɛwɛrɛ ò dowɛrɛ arɛ, zaakũ Musa kũ à ó bↄ́tɛ Misila pìi, ó dↄ̃ yã kũ à a lèro.
2Akũ Haruna pìńnɛ: À á nↄgbɛ̃nↄ wura pↄ́sãnↄ bↄtɛ kũ á nɛ́gↄ̃gbɛ̃nↄ pↄ́nↄ kũ á nɛ́nↄgbɛ̃nↄ pↄ́nↄ à suomɛnɛ.
3Akũ ń pínki a wura pↄ́sãnↄ bòbo ò kpà Harunaa.
4À sì à kàsa lán zùsanɛ bà, akũ à lↄ̀lↄ. Akũ ò pì: Isarailanↄ, á tãnan di! Àkũ mɛ́ à á bↄ́tɛ Misila.
5Kũ Haruna è lɛ, à sa'oki bò zùu pì arɛ, akũ à kpàkpaa kɛ̀ à pì: Dikiri dikpɛ kun zia.
6Kũ gu dↄ̀, gbɛ̃nↄ fùtɛ ò sa'opↄ kũ òdi ká tɛ́n à tɛ́ kũ òa kũ kɛnnakũkↄ̃o sa'opↄo. Gbɛ̃nↄ vùtɛ òtɛn pↄ́ ble òtɛn í mi, akũ ò fùtɛ òtɛn pãpã kɛ.
7Akũ Dikiri pì Musanɛ: Ǹ kipa ǹ gɛ́! N gbɛ̃ kũ n bo kũńwo Misilanↄ yàka.
8Ò kɛ̃̀ zɛ́ kũ ma mↄ̀ńnɛa likalika, ò wuraa kàsa tãna ũ lán zùsanɛ bà, ò kùtɛnɛ ò sa òa ò pì, Isarailanↄ tãna kũ à ń bↄ́tɛ Misilan gwe.
9Akũ Dikiri ɛ̀ra à pì Musanɛ: Ma è gbɛ̃ pìnↄ sã gbãnamɛ.
10Ǹ gomala de mà a pↄfɛ̃ kipaḿma mà ń kakatɛ, ama mani n burinↄ kɛ dasi.
11Akũ Musa kútɛ kɛ̀ Dikiri a Ludanɛ à pì: Dikiri, bↄ́yãin ntɛn pↄfɛ̃ kipa n gbɛ̃nↄa kũ n ń bↄ́tɛ Misila kũ n gbãna purao kũ n gã̀sã gbãnaoo?
12Misilanↄ ni pi ń kakatɛna yãin n ń bↄ́tɛ, de ǹ le ǹ ń dɛdɛ kpinↄ musu ǹ ń láka andunia gũn. Ǹ n pↄfɛ̃ kpátɛ ǹ yã kũ ń ye ǹ kipa n gbɛ̃nↄaa pì bo n nɛ̀sɛn.
13Ǹ dↄ n zↄ̀blerinↄ Ibrahĩ kũ Isaakuo kũ Isarailao yãn, zaakũ n la dàńnɛ kũ n zĩdao n pì, ĩni ń buri kara lán susunɛnↄ bà, ĩni bùsu kũ n a yã òńnɛ kpá ń burinↄa ògↄ̃ vĩ gↄrↄ sĩnda pínki.
14Akũ Dikiri yã kũ à pì áni kipa a gbɛ̃nↄaa pìi bò a nɛ̀sɛn.
15Musa ɛ̀ra à kìpa kpia, à doka gbɛ̀ anlo mɛ̀n pla pìnↄ kũna a ↄĩ. Yã kɛ̃na gbɛ̀ɛ pìnↄa kpa plapla pínki.
16Luda mɛ́ à gbɛ̀ anlo pìnↄ à, àkũ mɛ́ à yã kɛ̃̀ḿma.
17Yↄsua gbɛ̃nↄ wiki mà, akũ à pì Musanɛ: Ǹ zĩ̀ wiki ma dↄ bùran.
18Musa pì: Kùwiki mɛ́ à dↄ gwero, wɛ̃nda ↄ́ↄ dↄn gwe sↄ̃ro, gbɛ̃nↄ lɛ̀sinaan matɛn ma.
19Kũ à kà kãni kũ bùraao, à è òtɛn ũ wã zùsa pì arɛ, akũ à pↄ fɛ̃̀. À gbɛ̀ anlo kũ à kũnaa pìnↄ pã̀tɛ kpigɛrɛɛi gwe, ò wìwi.
20Akũ à zùsa kũ ò pìi pìi sɛ̀ à dà tɛ́n. À a títi bò, akũ à kà ín à kpà Isarailanↄa, ò mì.
21Akũ Musa Haruna là à pì: Bↄ́n gbɛ̃ pìnↄ kɛ̀nnɛ, gbasa n tò ò durunna zↄ̃kↄ̃ dí taka kɛ̀ɛ?
22Akũ à wèa à pì: Ǹsun pↄ fɛ̃ro, mare. Ń gbɛ̃ pìnↄ dↄ̃, kũ ò vãni.
23Mↄ́kↄ̃nↄ mɛ́ ò pìmɛnɛ mà tãna ke kɛ à dońnɛ arɛ. Ò pì Musa kũ à á bↄ́tɛ Misila pìi, ò dↄ̃ yã kũ à a lèro.
24Akũ ma pìńnɛ gbɛ̃ kũ ò wura vĩnↄ bↄtɛ ò suo. Kũ ò sùo, akũ ma kà tɛ́n, akũ à bò zùsanɛ́ bↄ̀rↄↄ pì ũ.
25Musa è Haruna tò gbɛ̃nↄ tɛni ń pↄyeina kɛ, akũ ò gↄ̃̀ lalandi pↄ́ ũ ń ibɛrɛnↄnɛ.
26Akũ à zɛ̀ bùra zɛ́lɛa à pì: Gbɛ̃ kũ ò kú Dikiri kpanↄ su ma kuru. Akũ Levi burinↄ kàkara a kuru.
27À pìńnɛ: Dikiri Isarailanↄ Luda pì, á baadi a fɛ̃nɛda loko à dodo bùraai zɛ́lɛ kũ zɛ́lɛo, á baadi a gbɛ̃nↄ kũ a gbɛ̃nnanↄ kũ a gbɛ̃dakenↄ dɛdɛ.
28Levi burinↄ kɛ̀ lákũ Musa dàńnɛ nà. Gbɛ̃ kũ ò ń dɛdɛ zĩ pìianↄ kà gbɛ̃nↄn dúbu aakↄ̃ taka bà.
29Akũ Musa pì Levi buri pìnↄnɛ: Lákũ a bo á nɛ́nↄ kũ á gbɛ̃nↄ kpɛ nà, a á zĩda kpà Dikiria gbãra, Dikiri arubarikaa dàágu gbãran gwe.
30Kũ gu dↄ̀ Musa pì Isarailanↄnɛ: A durunna zↄ̃kↄ̃ↄ kɛ̀, bee kũ abireo mani ɛra mà didi kpia mà gɛ́ Dikiri kĩnaa dↄ, òdigↄ̃ dↄ̃ro ke mani le mà kútɛ kɛnɛárɛ á durunna yã musu.
31Akũ à ɛ̀ra à gɛ̀ɛ Dikiri kĩnaa à pì: N yã nna! Gbɛ̃ pìnↄ durunna zↄ̃kↄ̃ↄ kɛ̀, ò tãna ke kɛ̀ ń zĩdanɛ kũ wuraao.
32Ǹ sùru kɛ! Ǹ ń durunna kɛ̃ḿma. Tó lɛnlo, ǹ ma tↄ́ warawara takada kũ n kɛ̃̀ɛ gũn.
33Dikiri pìnɛ: Gbɛ̃ kũ à durunna kɛ̀mɛnɛ tↄ́n mani warawara ma takada gũn.
34Ǹ gɛ́ kũ gbɛ̃nↄ gu kũ ma ònnɛn sà. Ma Malaika ni donnɛ arɛ. Bee kũ abireo tó ma wɛ́tãmmana gↄrↄ kà, mani wɛ́ tãḿma ń durunna yãi.
35Akũ Dikiri gagagyã kà gbɛ̃nↄgu zùsanɛ kũ ò tò Haruna pìi pì yãi.
