1Dikiri pì Musanɛ: Mↄkↄ̃n kũ Harunao kũ Nadabuo kũ Abiuo kũ Isaraila gbɛ̃ zↄ̃kↄ̃ gbɛ̃nↄn baaakↄ̃ akurinↄ, à didi kpia à mↄ́ ma kĩnaa, à donyĩ kɛmɛnɛ zaa zã̀.
2Mↄkↄ̃mmɛ ĩni namai ndo, gbɛ̃ kparanↄ sún su kãniro akũsↄ̃ pari sún didi kũńwo kpi díkĩna musuro.
3Musa gɛ̀ɛ à yã kũ Dikiri òo gbã̀ńnɛ pínki kũ dokayãnↄ pínki. Ò wè lɛɛlɛ ń pínki ò pì: Yã kũ Dikiri ò pínki óni kɛ.
4Akũ Musa yã kũ Dikiri òo pìnↄ kɛ̃̀ takada gũn pínki. À fùtɛ kↄnkↄkↄnkↄ à gbagbaki bò kpigɛrɛɛi, akũ à gbɛ̀ɛ pɛ̀tɛpɛtɛ mɛ̀n kuri awɛɛpla Isaraila buri mɛ̀n kuri awɛɛplanↄ pↄ́ ũ.
5À Isaraila kɛfɛnnanↄ zĩ̀ kũ zùsanɛnↄ, akũ ò sa'opↄ kũ òdi ká tɛ́n à tɛ́ kũ òo Dikiria kũ sáabukpana sa'opↄnↄ.
6Akũ Musa zùu pìnↄ aru sì à kpàatɛ lɛu pla. À a lɛu do dìtɛ kũ tao à a lɛu do àtɛ̃ gbagbakia.
7Akũ à Dikiri bàka kunna kũńwo takada sɛ̀ à a kyó kɛ̀ńnɛ. Akũ ò pì: Yã kũ Dikiri ò pínki óni kɛ óni mì natɛnɛ.
8Akũ à aru pìi sɛ̀ à fã̀ḿma à pì: Dikiri bàka kunna kãáo arun gwe lákũ a mà nà pínki.
9Musa kũ Harunao kũ Nadabuo kũ Abiuo kũ Isaraila gbɛ̃ zↄ̃kↄ̃ gbɛ̃nↄn baaakↄ̃ akurinↄ dìdi kpia.
10Ò Isarailanↄ Luda è. Safia gbɛ̀ gusara katɛna a gbá gɛ̃i, a í de búgu swáswa lán ludambɛ búgu bà.
11Luda dí yãke kɛ Isaraila gbãnade pìnↄnɛro. Ò wɛ́ sìalɛ, akũ ò pↄ́ blè ò í mì.
12Dikiri pì Musanɛ: Ǹ didi kpia ǹ mↄ́ ma kĩnaa ǹgↄ̃ kú gwe. Mani gbɛ̀ anlo kũ ma a dokayãnↄ kɛ̃̀anↄ kpámma, de ǹ le ǹ dańnɛ.
13Akũ à fùtɛ kũ a kpàasi Yↄsuao, òtɛn gɛ́ didi Luda kpia.
14Akũ Musa pì gbɛ̃ zↄ̃kↄ̃nↄnɛ: Àgↄ̃ ó dã la, óni ɛra ò su á kĩnaa. Haruna kũ Uruo nigↄ̃ kú kãáo. Tó gbɛ̃ke yãke vĩ, à gɛ́o ń kĩnaa.
15Akũ Musa dìdi kpi pìia. Túsukpɛ dà a mìsↄ̃ntɛla,
16akũ Dikiri gakuri kìpa Sinai kpi pìia. Túsukpɛ pì daala lɛ ari gↄrↄ suddo, a gↄrↄ suppladen Dikiri lɛ́ zù Musai zaa túsukpɛ pìi gũn.
17Isarailanↄ Dikiri gakuri è lán tɛ́ kũ àdi ń ble bà kpi pìi mìsↄ̃ntɛa.
18Akũ Musa gɛ̃̀ tɛ́luku pìi gũn à ɛ̀ra à dìdi kpi pìia. À kú gwe ari gↄrↄ bupla fãnantɛ̃ kũ gwãanio.
