Amos 2

1

2

3

4

5

6

7

8

9

¹Iei alon ewe Samol mi Lapalap, “Chon Moap ra chök sopwela le föri tipis, iei mine üpwe fokun apwüngüür. Ra kenala chün ewe kingen Etom tori ra wiliti falang.

²Iei mine üpwe tinala ekkei pwe epwe kenala Moap me ekewe imwen maun mi pöchökül lon Keriot. Ekewe chon Moap repwe mäla, lupwen epwe fis akürangen maun, lupwen ekewe sounfiu repwe arükak o ettiki rappwa.

³Üpwe niela ewe chon nemenem me lon Moap me nöüwisen ewe fanü meinisin.” Iei usun mine ewe Samol mi Lapalap a apasa.

⁴Iei alon ewe Samol mi Lapalap, “Chon Juta ra chök sopwela le föri tipis, iei mine üpwe fokun apwüngüür. Ra pöütala ai kewe allük, nge resap tümwünü ai kewe pwüüng. Ra tokola ren anümwäl, mine ar kewe lewo ra fen angang ngeni.

⁵Iei mine üpwe tinala ekkei pwe epwe kenala Juta me ekewe imwen maun mi pöchökül me lon Jerusalem.”

⁶Iei alon ewe Samol mi Lapalap, “Chon Israel ra chök sopwela le föri tipis, iei mine üpwe fokun apwüngüür. Ra amömöla ekewe chon pwüng ngeni moni pwe repwe amanau, ra pwal amömöla ekewe chon mwelele resap tongeni mwo nge mönätiu liwinimangen eu pea chori.

⁷Ra chök ipweri ekewe chon wöüngau usun eman a ipwetiu won pwül o atoka seni ekewe chon riaföü pwüngün ar kapwüng. Eman mwän me saman ra konopök ren eman chök chon angang fefin. Iei usun ra apiningaua pinin itei.

⁸Ra konola ünükün iteiten rongen asor lon mangaku ra angei seni chon wöüngau pwe asisilen ar liwinimang. Ra ünümi wain lon imwen ar we kot, ekewe wain ra angei seni chokewe mi liwinimang ngeniir.

⁹Nge pokitemi, ämi nei aramas, üa wesewesen arosala ekewe chon Amor, chokewe mi langatam usun ekewe irä setar o pöchökül usun ekewe irä ook.

¹⁰Üa emwenikemiiwu seni ewe fanü Isip o emwenikemi lon ewe fanüapö lon ükükün faik ier. Üa ngenikemi fanüen ekewe chon Amor pwe oupwe fanüeni.

¹¹Üa filätä ekoch me lein nöümi kewe mwän pwe repwe soufos, pwal ekoch me lein ekewe alüal pwe repwe Nasir. Ifa usun, esap iei usun, ämi chon Israel? Ngang ewe Samol mi Lapalap üa kapas.

¹²Nge ämi oua aünü ngeni ekewe Nasir wain o allük ngeni ekewe soufos pwe resap osuni.

¹³Iei mine üpwe chounikemiitiu pwe oupwe tikitik usun efoch woken a tikitik ren choun wosan wiich.

¹⁴Ätekewe mi müttir le sä resap tongeni sü, ekewe chon pöchökül epwe kisila ar pöchökül, nge ekewe sounfiu resap tongeni püsin amanaueer.

¹⁵Ekewe chon esefich repwe kuf, ekewe sounfiu mi müttir le sä resap tongeni sü, nge ekewe chon wawa oris resap pwal tongeni püsin amanaueer.

¹⁶Pwal ekewe mi fokun pwora me lein ekewe sounfiu repwe likitala pisekir o sü lon ena rän.” Iei usun mine ewe Samol mi Lapalap a apasa.