Emosi 2

1

2

3

4

5

6

7

8

9

¹Hiera gua si zama nia e Zihova: “Koari ka ṉeta sinea te Moabi meke kamo ka made, si lopu kaqu va kekere pule ia Rau sa vina kilasa, sina ele pada mo sari na dia sinea meke lopu boka beto. Koa gua sapu sulu i sa, guana sulu binu, sari susurina sa baṉara pa Edomu,

²ke kote garunu la nika si Arau koari pa Moabi sapu kote sulu i sari vasileana ta gobadi pa Kerioti. Se Moabi si kote tava gore pa keke vinaripera nomana pa vari korapadi rina iraṉa na kukili vinaripera meke na kabona sa buki.

³Kote va mate pania Rau sa nana baṉara meke va matei sari doduru nana koimata,”

⁴Hiera gua si zama nia e Zihova: “Koari ka ṉeta sinea te Ziuda meke kamo ka made, si lopu kote va kekere pule ia Rau sa vina kilasa, sina ele pada mo sari na dia sinea meke lopu boka beto. Koa gua sapu ele kilu pania rini sa tinarae te Zihova meke lopu kopuni rini sari Nana ginarunu, ke ta turaṉa va seu si arini koari na tamasa kokohadi, sari tamasa sapu luli ri tiatamadia pukerane,

⁵ke kote garunu la nika si Arau koari pa Ziuda sapu kote sulu i sari vasileana ta gobadi pa Zerusalema.”

⁶Hiera gua si zama nia e Zihova: “Koari ka ṉeta sinea tamugamu pa Izireli meke kamo ka made, si lopu kaqu va kekere pule ia Rau sa vina kilasa, sina ele pada mo sari na mia sinea meke lopu boka beto. Koa gua sapu holuholu ni siliva gamu sari tie toṉotodi, meke koari na sadolo mo holuholu ni gamu sari tie sapu loke dia.

⁷Neti gamu batudi sari tie malaṉa guana neti mia pa kavuruna sa pepeso meke lopu poni tinoṉoto gamu sarini pu ta ṉoṉovala. Tamana meke sa tuna koreo si la ia si keke vineki mo meke ṉoṉovala ia gamu sa Pozaqu Hopena.

⁸Seke tinarae si gamu totoso eko gamu pa kalidi ri doduru hope, koari na poko sapu ta tuqe vagidi pude tana gale lopu ele ta lipudi. Pa korapa vetu tanisa dia tamasa si napoi rini sari vaeni sapu tabarani ri tie malaṉa totoso tava lipulipu hoboro si arini.

⁹Seke goreni Arau sari na tie Amoraiti pa kenu dia, vea ululu guana huda sida si arini, meke vea ṉiṉira guana huda oaku si arini. Sari vuvua tanisa panaulu si huari Rau meke gua tugo sari karosona pa kauruna.

¹⁰Arau vagi vurani gamu pa Izipi, meke turaṉa gamu koari ka made ṉavulu puta vuaheni pa soloso qega pude poni gamu sa pepeso tadi na tie Amoraiti.

¹¹Va noma sage i tugo Arau sari poropita pa vari korapadi ri tumia koreo meke vizata vagi tie Naziraiti koari mia tie vaqura. Vea, lopu hinokaradi si hire, gamu na tinoni pa Izireli?”

¹²“Ba va napo ni vaeni tu gamu sari tie Naziraiti meke zamai gamu sari poropita pude tukui ṉuzudia.

¹³Ego, kamahire si kote naqoto gamu Arau gua sa totopili susuraṉana huiti sapu ta mamatani sari qaqaloto huiti ke qirato.

¹⁴Arini koa gamu pu haqala rerege si lopu kote govete, arini pu ṉiṉira si kote malohoro tu, meke sa varane si lopu boka harupu pule nia.

¹⁵Sa tie gona bokala si kote rizu togolo pule, sa tie varipera sapu reregena ba lopu kote govete, sa tie koi hose ba lopu boka harupu pule nia.

¹⁶Sari tie varane sapu bokabokadi hola ba kote dodohodi meke govete koa sa rane asa,”