Amós 2

1

2

3

4

5

6

7

8

9

¹Bab-Jehová weyob soged: “Moab-dorgan-e-isgued nue-wilub-obicha-naid. Sabsur-e-odurdaklegoedi, an ega osulogosulid. Ar Moab-dulemar, Edom-e-rey-garmar ogumaksad, burubi-guedse imaksad.

²Ani an Moab-yala, soogi ogumakoed, Queriot-neg-gandikmalad bela gummakoed. Moab-dulemar bilagi-oimaknanaid-abalagi berguoed, gar-trompeta-gornaid-abalagi burgoed.

³E-dummad-negsemaid, e-dulemar-wagab an osulogoed. E-dummagan belagwable an eba obelogoed. Ani an Bab-Jehová-guedi we-ibmar soged.”

⁴Bab-Jehová weyob soged: “Judá-dorgan-e-isgued nue-wilub-obicha naid. Sabsur-e-odurdaklegoedi, an ega osulogosulid. Ar Judá-dorgan, e-gakansamaladba Bab-Jehová-Igar-Maidgi aibatemalad, Bab-Jehová-Igar-Sogmaidba nanassurmalad. Bab-dummadyob-imaklemaladba nanasmalad, e-dadgan-nanasadba nanasmarmogad.

⁵A-ulale, ani an Judá-yargi soo barmidoed, Jerusalén-e-neg-gandikmalad bela gummakoed.”

⁶Bab-Jehová weyob soged: “Israel-dorgan-e-isgued nue-wilub-obicha naid. Sabsur-e-odurdaklegoedi, an ega osulogosulid. Ar Israel-dorgan, dule-nued manigi uksamalad, Israel-dorgan, dule-wilese-gudimalad sapat-gwagwen-muchub uksamarbalid.

⁷Dule-wilegana sabsur-ise-wilegar imaksamalad, mesagwale imaksamalad. Wileganaga igar-maidba igar nabossurmalad. Baba, galagwensuli ome-wargwengi nanadidaed, a-omegi, e-machi galagwensuli nanadidamogad. Weyob an-nug-isligwaled oichosmalad.

⁸Amarde, yogasaaledgi bab-dummaganga-ibmar-ukleged-ailamar-dikarba, mor-manigi-siid, na megega ebudamalad. Dule-mani-ganikid-ibe-vino-sulesadi, e-bab-dummaganse-goled-neggi gobdamalad.

⁹”We-dulemar-wagab, Amorreo-dulemar an obelosad, amar-ibe e-ibmar-nikumaid an osulosad, e-gandik-bukwad an ei osulosad. Ar Amorreo-dulemar urwaryobi sugu-inigwele, encina-sapimaryob dutusur-inigwele, an obelosad.

¹⁰”Egipto-yargi-noega an bemar-imaksamalad. Nega-dulesulidganba birga-dulabo (40) an bemar-idudii gusad, adi, Amorreo-dulemar-bukwamalad-e-yala bemarga ukegar.

¹¹Deginbali, be-mimmigan-imbagi, an-gayaburba-barsogmalad an nugsasad. Be-sapingan-imbagi, dulemar-anga-nugsalesad an susbalid. A-dulemarde, Nazareo-duleye bilesmalad. Israel-dulemar, ¿weyob ibmar-gusadi napirasursi? Deyobdo. Ani an Bab-Jehová-guedi we-ibmar soged.

¹²Degi-inigwele, dule-anga-nugsalesad Nazareoʼye-bileged, vino-gobega be imaksamalad. An-gayaburba-barsogedga be sogsamalad: ‘Mer Bab-Jehová-gayaburbagi sunmakoye.’

¹³”Israel-dorgan, a-ulale, an sabsur-apor bemar-imakoed, igi ur-dummad-napagined orosgwaggi-dakleged ena-danikir, ibmar-birgi-nasar ibmar gullu-gullu imake, deyob an bemar-imakoed.

¹⁴Dule-gwae-gwae-abarmaked, angi wakinnosurguoed. Dule-dutusulid, dukin e-garganguedba bendaklegosulid. Dule-gandikidbela, dukin na e-san bendakosurmogad.

¹⁵Dule-sigumied, an-abin gwisguosurguoed. Dule-gwae-gwae-nanaed, angi wakinnosurguoed, dule moligi-sii-wakinmaile, na san-onogosulid.

¹⁶A-ibagi, sorda-bila-onomalad-bur-gandikmaladi, uka-swili wakinmai guoed. Ani an Bab-Jehová-guedi we-ibmar soged.”