Amos 2

1

2

3

4

5

6

7

8

9

¹Be ga’ar SOMOL, “Girdi’ nu Moab e kar denen gad bayay nge bayay, erfan nri bay gu gechig nagrad. Ya kar dariyfan niged yilen fare pilung nu Edom ni kar urfiyed e yil rok ke ngal’ ni awat.

²Bay gu pi’ e nifiy nga daken e nam nu Moab nge urfiy e pi naun ni bay u Kerioth ni ka ni ngongliy rogon ni fan ko mael. Piyu Moab e bay ram’ad u fithik’ i lingan e mael, ni be tolul e salthaw nge lingan e yabul ni yibe thoy.

³Bay gu thang e fan rok e en be gagiyeg u Moab nge urngin e pi tayugang’ ko fare nam.”

⁴Be ga’ar SOMOL, “Girdi’ nu Judah e kar denen gad bayay nge bayay, erfan nri bay gu gechig nagrad. Ya kar darifan niged e machib rog ma darir folgad ko thin ni kugog. Ke waliyrad e pi got rorad ni go’ bogi ban’en nga wuru’ e wo’, ni bogi got ni i pigpig e pi chitamangirad ni kakrom ngorad.

⁵Ere bay gu pi’ e nifiy nga daken e nam nu Judah nge urfiy e pi naun ni bay u Jerusalem ni kan ngongliy rogon ni fan ko mael.”

⁶Be ga’ar SOMOL, “Girdi’ nu Israel e kar denen gad bayay nge bayay, ni erfan nri bay gu gechig nagrad. Ya kar pi’ed nchuway’ e girdi’ ni yul’yul’ ni daworiyag ni ngar thanged e malfith rorad, ni bogi gafgow ni mus nga ta’reb e sus ma dabyag ni ngar pi’ed puluwon.

⁷Yad be yot’ nga but’ e pi’in ni me’waer ndabiyag ni ngar ayuweged yad, ma yad be tharbeg e pi’in ni gafgow ni ngar chuwgad u kanawo’. Be’ nge chitamngin e yow be moleg ba sib ni bpin, ni aram e kar darifan niged fithingag nib thothup.

⁸Gubin e tagil’ e meybil ma girdi’ riy e yad be mol nga daken e mad ni kar feked rok e pi’in gafgow ni talpen e malfith rorad. Yad ma unum e wayin u lan e tempel ko Got rorad nra feked rok e pi’in ni bay e malfith rorad ngorad.

⁹“Ni yugu aram rogon ni gag e gu li’ e yu Amor ni bochrad, ni bogi pumo’on ni bod feni n’un’uw e gek’iy ni cedar, ma yad bod feni gel e gek’iy ni oak. Go’ gu li’rad ngarm’ad.

¹⁰I gag e gu fakmed e girdi’ rog nga wuru’ yu Egypt, mu gu pow’iymed u daken e ted i yan ni aningeg i ragag e duw, mu gu pi’ ngomed e binaw rok e piyu Amor ni ngam tafned.

¹¹Gu turguy boch e pumo’on ni pifakmed ni ngar manged profet, nge boch e pagel romed ni ngar manged e pi nazirite. Gimed piyu Israel, gur de riyul’ e pi thin ney? I Gag SOMOL e kugog e pi thin ney.

¹²Machane gimed e mu suryed e pi nazirite ngar unumed e wayin, mi gimed gelnag e thin ngak e pi profet ni nge dab kur weliyed e thin rog.

¹³Ere chiney e bay gu pirdi’iymed nga but’, mi gimed gun’gun’ ni bod e riyaka ni kan suguy ko grain.

¹⁴Mus ko pi’in yad mmachreg ko mil ma dabiyag ni ngar thay gad; ma pi’in yad ba gel e bayi m’ay gelngirad, ma pi salthaw e dabkiyag rorad ni ngar ayuweged e pogofan rorad.

¹⁵Girdi’en e gat’ing e yad ra sul nga tomur, ma pi’in yad mmachreg ko mil e dabiyag ni ngar thay gad, ma pumo’on ni bay u daken e os e dabiyag ni ngar milgad.

¹⁶Rofen nem e mus ko tin th’abi muth’an e salthaw ni yad ra pithig pa’rad ko pi talin e cham rorad ngar milgad.” I SOMOL e keyog e pi thin ney.