Amos 2

1

2

3

4

5

6

7

8

9

¹Iyan heini migkaǥi te Nengazen mehitenged te Moab: “Tenged te kedtulung kebaal te salà te menge tig-Moab, edsilutan ku sikandan. Su mibinsulan dan is menge tulan te hadì te Edom taman te neigmuk heini.

²Umbe, ebinsulan ku is Moab ragkes is melig-en he menge vahin te Keriot. Ebpematey is menge tig-Moab dutun te ebpengulahì wey ebpezaǥing te vudyung is menge kuntada zan he edsurung kandan.

³Elin ebpatey is hadì dan wey is langun he menge upisyal zin. Iyan a, is Nengazen, is migkaǥi kayi.”

⁴Iyan heini migkaǥi te Nengazen mehitenged te Juda: “Tenged te kedtulung kebaal te salà te menge tig-Juda, edsilutan ku sikandan. Su inselikwey zan is menge kesuǥuan ku wey wazè dan tumana is menge sulunuzen. Neketazin kandan is kebpenilbi zan te zuma he menge ed-ezapen he midsilbiyan daan te menge kepuun dan.

⁵Umbe, ebinsulan ku is Juda ragkes is melig-en he menge vahin te Jerusalem.”

⁶Iyan heini migkaǥi te Nengazen mehitenged te Israel: “Tenged te kedtulung kebaal te salà te menge tig-Israel, edsilutan ku sikandan. Su imbelegyè dan he menge uripen is menge etew he wazà mekesalà, tenged dà te utang dan. Mibeelan dan heini ziyà te menge pubri minsan nekeutang dà diyà te kandan te senge paris he sandalyas.

⁷Edèdaaǥen dan is menge pubri wey wazè dan beǥayi te hustu he kukuman. Neulaula ziyà te kandan, he is amey wey is anak din he maama ebpekidhilavet te sevaha zà he vahi. Tenged kayi mibpendezeisey zan is waǥas he ngazan ku.

⁸Edlipezeng dan diyà te lugar he zutun dan edsimba he bivisti te visti he insandà diyà te kandan te menge pubri. Ne ed-iinum dan diyà te valey ku te vinu he imbayad kandan te menge pubri te utang dan.

⁹Piru siak, is mibeelan ku para kandan te menge tig-Israel, iyan heini: mibpendezeetan ku is menge Amorihanen, minsan pa te memelangkew heini he menge etew he henduen be te kayu he sidru wey melig-en iring te kayu he ulayan. Mibpendezeetan ku sikandan taman te wazà nesamà kandan.

¹⁰Impeǥawas ku zaan is menge kepuun te menge tig-Israel ziyà te Ehipto, ne seled te 40 he tuig is kegiyahi ku kandan diyà te sibsivayan su wey zan maangken is tanà te menge Amorihanen.

¹¹Mibpilì ku pa ganì is duma he menge kevuwazan dan wey mehimu he menge ebpeneuven wey menge Nazareo. Kenè be tutuu heini menge tig-Israel?

¹²Piru hengkey is mibeelan niw? Impeinum niw te vinu is menge Nazareo ne mibmenduen niw is menge ebpeneuven he kenè dan keǥiya is menge lalag ku.

¹³Umbe, pemineǥa niw heini: Edhimuwen ku he meveǥati kew iring te kerumata he nepenù te sebpet.

¹⁴Umbe, minsan is mezesen he ebpelelaǥuy keniyu, ne kenà ebpekepelaǥuy, is mezesen ebmeluya, ne is menge sundaru, kenè dan egkelibri is keugelingen dan.

¹⁵Minsan is menge perepanà diyà te tebek, ne ebpekeendud. Is menge sundaru he meǥaan he ebpelelaǥuy ne kenà ebpekepelaǥuy, ne is menge pereuntud te kudà ne kenè dan egkelibri is keugelingen dan.

¹⁶Dutun te andew te kedsiluti ku keniyu, minsan is kinemevurutan he menge sundaru, ebpekepelaǥuy he egkelevasan. Iyan a, is Nengazen, is migkaǥi kayi.”