AMOS 2

1

2

3

4

5

6

7

8

9

¹Iehova ini e gwau tomamu: Moab ena kerere toi bona hani daidiai, lau ese ena dika davana ihenina basina gwaua tao; badina be ia ese Edom pavapavana turiana e gabudia, ahu ai e halaodia.

²Taunabunai lau ese lahi ta baina siaia Moab latanai, una lahi ese Kerioto ena gabu aukadia baine aradia ore; bena Moab na heloḡo-heloḡo ai baine mase, lolo bona kibi reḡedia bogaragidiai.

³Lau ese pavapava na ia bogaragina amo baina negea daure, bona ena lohia iboudiai na ia ida baina aladia mase. Iehova na e herevamu.

⁴Iehova ini e gwau tomamu: Iuda ena kerere toi bona hani daidiai, lau ese ena dika davana ihenina basina gwaua tao; badina be idia ese Iehova ena taravatu vada e dadaraia, bona ena hahedua herevadia asie badinadia; a tamadia ese e rakalaidia daladia koikoidia ese idia vada e hakaudia kerere.

⁵Taunabunai lau ese lahi ta baina siaia Iuda latanai, una lahi ese Ierusalem ena gabu aukadia baine aradia ore.

⁶Iehova ini e gwau tomamu: Israel ena kerere toi bona hani daidiai, lau ese ena dika davana ihenina basina gwaua tao; badina be idia ese kara maoromaoro tauna e hoiamu, silver davana, bona e dabumu tauna e hoiamu, tamaka rua davadia.

⁷Idia ese ogoḡami tauna kwarana na tano gahuna ai e moimoilaiamu, bona e hisihisimu tauna ena dala e laoa ahumu. Tau ta bona tamana ese hane-ulato tamona dekenai e raka vareaimu, unu amo lau ladagu helaḡana e hamiroamu.

⁸Idia ese ihaboulaina patadia iboudiai badibadidiai e hekuremu, henitao dabuadia latadiai. Edia Dirava ena dubu ai vine ranuna e inuamu, hahemaoro ai haida edia amo e abia ḡauna.

⁹Ḡau tamona, lau ese Amoro tauna na habuaia tari idia vairadiai; ena lata na sida audia edia lata heḡereḡeredia, bona ena goada na oak audia edia goada heḡereḡeredia. Ia huahuana na habuaia tari atai ai, bona ramuna danu henu ai.

¹⁰Ina danu, lau ese Aigupto tanona amo na hakaumui lasi, laḡani hari-ahui lalodiai tano ḡaḡaena ai na hakaumui lao, Amoro tauna ena tano ba ḡaunaia totona.

¹¹Natumui haida na haginidia, peroveta taudia ai baela, bona emui eregabe taudia haida na abidia, Nasiri oreana taudia ai baela. Israel taumui e, una na momokani ani? Iehova na e herevamu.

¹²A umui ese Nasiri oreana taudia na vine ranuna amo o ha-inudia, bona peroveta taudia na o haḡanidia, oto “Umui na basio peroveta”.

¹³A itaia, lau ese emui gabu ai baina taomui tari, uit iḡuidia ai e honumu reruena e hetao tarimu na heto.

¹⁴Ae-haraḡa tauna na basine heau diba, goada tauna ese ena goada basine dogoa tao, bona tuari tauna basine roho mauri.

¹⁵Peva tauna basine gini, ae-haraga tauna na sibona basine hahemauri, bona hosi-gui tauna basine roho mauri.

¹⁶Lalo-auka tauna tuari taudia bogaragidiai na ḡaḡaena ai baine heau una dina ai. Iehova na e herevamu.