Amós 9

1

2

3

4

5

6

7

8

9

¹Dule-Dummad ibmar-ogumakar-ukleged-aila-dikarba-gwichi an daksad, degi, anga sogded: “Buarmar-e-bargamalad be omukue, adi, buarmar giglimakega, dulemar-e-nonogi babatidoed. Dulemar-burgosurmaladdi es-suidgi an osulogoed. Dulemar-wargwensaar wakinnosulid, wargwensaagwar durguosulid.

²Israel-dulemar neg-uan-napa-uluba dukuye-sogele, amba an onogoed. Ar amba nibanegse nakweye-sogele, amba an amar-odegoed.

³Amba Carmelo-yar-birba dukuye-sogele, ase an aminaoed, degi, an gaoed. Demar-mata-wilasorse angi dukuye-sogele, amba naibe-demargined egi-warmakega an barmidoed.

⁴Israel-dulemar, e-isdarmaladse-galesa selenadapidgine, an igar-ukoed, es-suidgi amar-oburgwegar. Israel-dulemargi nue an nakulegoed. An egi-nakulegoedi, ibmar-nued ega imakegarsulid. Ibmar-isganaga imakegalad.”

⁵Bab-Jehová-Bur-Gandik-Maid, Bela-Gangued-Nikad-Maid napa ebugele, napa maludoed. Napa mullumakmai megoed, Egipto-diwar-Nilo-maiyob megoed, degi, bela dule-bukwamalad ise-boar gumaloed.

⁶Bab-Dummad nibaneggi na e-neg nasiksad, degi, napaneggi e-neg-sailagan nasiksabalid. Dii napaneggi-owiegala, demar-mata-obupurmakega imaked. E-nuga, Bab-Jehováʼye nugad.

⁷Israel-wagan, Bab-Jehová soged: “¿Ar bemarde anga Etiopía-dulemaryob-gusursi? ¿Ar ande Egiptoʼgi Israel-dulemar-onissursi? ¿Caftor-yargi Filistea-dulemar an onisbarsursi? Degi, ¿Kir-yargi Arameo-dulemar an onisbarsursi?

⁸”Ani an Bab-Jehová-Bur-Gandik-Maidi, we-yar-isgus-naidgi nakulemaid. Jacob-wagan napneg-naidgi an obelogoed, degi-inigwele, an bela obelogosulid.” Bab-Dummad-Jehová soged.

⁹“Igi ukub bugbugi egwalealile, napagi akwa-gwagwensaar argwansuli, deyobi, Israel-dulemar neggwebur-baigan-abargi, an egwaoed.”

¹⁰Bab-Jehová sogdebalid: “Bela an-dulamar-isgudimalad, es-suidgi burgwemaloed. Bela sogdimaladi: Bonigan anmarse gwen nonikosurye. Anmar-oakalogosurye. Dule-deyob-sogdimaladi, bela burgwemaloed.”

¹¹Bab-Jehová sogdebalid: “A-ibagi, David-meged-neg-ayarisadi, an soboed. Neg-yaa-ollogan-ambikusadi, an edioed, degi, e-neg-bibichismalad iduar-sobaledyob, gannar an sobbaloed.

¹²Adi, Israel-dulemar, degi, bela dulemar an-nug-odummodimaladi, Edom-neggwebur, degi, bela neggwebur-bamalad suegar.”

¹³Bab-Jehová sogdebalid: “Ibmar-san-bukidar-welegoed-ibagan danikid, ibmar-gwag-digleged-ibagan-naidgi, amba oros-gwaggiid-dakleged, welenai guoed. Uva-digleged-ibagan-naidgi, amba uva-egurlenai guoed. Yar-dummaganba vino-binid aryomamai guoed, bela yala-senigana-imbaganba suurmakmai guoed.

¹⁴An-Israel-dulemar-galesmalad an gannar e-yarse sedagoed. Neggweburmar-bergusad gannar na sobmarbaloed, agi na ambikumaloed. Uva-dubmar digmaloed, degi, e-vino gobdii gumaloed. Ibmar-digedgi arbamaloed, a-ibmar-sanmakoedi, gundii gumaloed.”

¹⁵Be-Bab-Dummad-Jehová soged: “Israel-dulemar e-yargi an urboed, adi, mer yar-an-ega-uksadgi, bar onilegegar.”