ማርቆሳ 11

1

2

3

4

5

6

7

8

9

10

11

12

13

14

15

16

¹ኡንቱንቱ ዬሩሳላሜ ማቲዴ፥ ዴብሬ ዛይቴ ዴሪያ ማታን ዴዒያ ቤቴፋጌኔ ቢታኒያ ጋኬዲኖ፤ ዬሱሲ ባሬና ካሊያዋንቱፔ ላዑዋ ሲንꬃው ኪቲዴ፥

²«ሂንቴንቱፔ ሲንꬃን ዴዒያ ሄራ ቢቴ፤ ያ ጌሎሳና ኦኒኔ ኡባ ቶጊቤና ቃሹዋን ዴዒያ ሃሬ ማራ ሂንቴ ዴማና፤ ኣ ቢሊ ሃ ኣኪዴ ዪቴ።

³ኦኒኔ ሂንቴንታ፥ ‹ሄዋ ኣዪሲ ኦꬂቴ?› ያጊዴ ኦቾፔ፥ ‹ጎዳው ሃዌ ኮሼ፤ ኤሌካ ዛሪ ሃ ዬዳናዋ› ያጊቴ» ያጌዳ።

⁴ኡንቱንቱ ቢዴ፥ ሃሬ ማራ ፔንጊያ ማታን ኦጊያን ቃቺ ዎꬄዳዋ ዴሚዴ ቢሌዲኖ።

⁵ሄዋን ኤቄዳ ኢቲ ኢቲ ኣሳቱ ኡንቱንታ፥ «ሃሬ ማራ ዎታናው ቢሊቴ?» ያጌዲኖ።

⁶ዬሱሳ ካሊያዋንቱ ዬሱሲ ባሬንታ ኣዛዜዳዋ ኦዲና፥ ኣሳቱ ዬዲ ኣጌዲኖ።

⁷ኡንቱንቱ ሃሬ ማራ ዬሱሳኮ ኣሂዴ፥ ባሬንቱ ማዩዋ ኣ ዞኪያን ዎꬄዲኖ፤ ዬሱሲ ሄ ሃሬ ማራ ቶጌዳ።

⁸ጮራ ኣሳይ ባሬንቱ ማዩዋ ኦጊያን ሂፄዳ፤ ቃሲ ሃራንቱ ሚꬃ ሃይꬃ ካር ካሪዴ፥ ኦጊያን ሂፄዲኖ።

⁹ዬሱሳፔ ሲንꬃና ሃሜቲያ ኣሳይኔ ኣ ጌዱዋ ካሊያ ኣሳይ ባሬንቱ ኮሻ ꬎቁ ኦꬂዴ፥ «ፆሳይ ጋላቴቶ! ጎዳ ሱንꬃን ዪያዌ ኣንጄቴዳዋ።

¹⁰ጎዳ ሱንꬃን ዪያ ኑ ኣዉዋ ዳዊቴ ካዉቴꬃይ ኣንጄቴዳዋ። ሳሉዋ ኡባፔ ቦላ ሳሉዋን ዴዒያ ፆሳይ ጋላቴቶ» ያጌዲኖ።

¹¹ዬሱሲ ዬሩሳላሜ ቢዴ፥ ጌሻ ጎሊያ ጌሌዳ፤ ቃሲ ኡባባ ዩዪ ዩዪ ፄሌዳዋፔ ጉዪያን፥ ሳዓይ ቃሚያ ዲራው፥ ታማኔ ላዑ ዬሱሳ ካሊያዋንቱና ቢታኒያ ቤዳ።

¹²ዎንቴꬃ ጋላሲ ኡንቱንቱ ቢታኒያፔ ኬሲዴ ቢሺን፥ ዬሱሲ ኮሻቴዳ።

¹³ሃኩዋን ኢቲ ባላሲያ ጊያ ሚꬃቶ ሃይꬃ ማያ ኡቴዳዉኖ ቤዒዴ፥ ኦኒ ኤሪ ኢ ቦላ ኣይፊ ቤቶፔኔ ጊዴ፥ ቤዓናው ኢዚኮ ቤዳ፤ ሺን ኢዚኮ ኢ ቢያ ዎዴ፥ ሃይꬃ ፃላላፔ ኣቲን፥ ኣይኔ ኣይፊያ ዴሚቤና፤ ኣዪሲ ጎፔ፥ ባላሲ ኣይፊያ ዎዲ ጋኪቤና።

¹⁴ዬሱሲ ሄ ባላሳቶ፥ «ኔፔ ሺሬቲዴ ሜꬊናው ኦኒኔ ኣይፊያ ሞፖ» ያጌዳ። ዬሱሳ ካሊያዋንቱ ኢ ጊያዋ ሲሴዲኖ።

¹⁵ኡንቱንቱ ዬሩሳላሜ ቤዲኖ፤ ዬሱሲ ጌሻ ጎሊያ ጌሊዴ፥ ሄዋን ዛሊዒያዋንታኔ ሻሚያዋንታ ካሬ ዬዴርሱዋ ዶሜዳ፤ ቃሲ ሚሻ ላሚያዋንቱ ፃራጴዛኔ ዶጎሙዋ ዛሊዒያዋንቱ ኦይዲያ ኣꬂ ዬጊዴ፥

¹⁶ኦኒኔ ኣዬንቶ ቶኪዴ፥ ጌሻ ጎሊያ ጊቢያ ጊዶና ኣꬋናዋ ዲጌዳ።

¹⁷ዬሱሲ ኣሳ ሃዋዳን ያጊዴ ታማሪሴዳ፡ «ፆሳ ማፃፋን፥ ‹ታ ጎሊ ኣዪሁዳ ጊዴና ኣሳይ ኡባይ ፆሳ ዎሲያ ጎሌ ጌቴታና› ያጌቲዴ ፃፌቲ ኡቴዳ፤ ሺን ሂንቴ ኣ ቦንቃንቻቱ ቆሴቲያ ጎንጎሉዋ ኬሴዲታ።»

¹⁸ቄሳቱዋ ካፓቱኔ ሙሴ ሂጊያ ታማርሲያዋንቱ ሄዋ ሲሲዴ፥ ኣ ዎꬋና ኦጊያ ኮሻ ዶሜዲኖ፤ ሺን ጮራ ኣሳይ ኢ ታማሪሲያዋን ማላሌቲያ ዲራው፥ ኣው ያዬዲኖ።

¹⁹ሳዓይ ኦማርሴዳ ዎዴ፥ ዬሱሲኔ ኣ ካሊያዋንቱ ካታማፔ ጋፃ ኬሴዲኖ።

²⁰ኡንቱንቱ ዎንቴꬃ ጋላሲ ጉራ ኦጊያና ኣꬊዴ፥ ሄ ባላሳታ ፃጱዋና ሜላዲጌዳዉኖ ቤዔዲኖ።

²¹ጴፂሮሲ ሃሳዪዴ፥ «ታማሪሲያዎ፥ ቤዓ፤ ኔን ሼቄዳ ባላሳታ ሜላዲጋዱ» ያጌዳ።

²²ዬሱሲ ዛሪዴ፥ ኡንቱንታ ሃዋዳን ያጌዳ፤ «ፆሳ ኣማኒቴ።

²³ታኒ ሂንቴንቶ ቱሙዋ ጋይ፤ ኦኒኔ ባሬ ዎዛናን ሲꬌናን ባሬ ጌዳባይ ሃናናዋ ኣማኒዴ፥ ሃ ዴሪያ፥ ‹ዴንዳዴ ኣባን ኩንዳ› ጎፔ ሃናና።

²⁴ሄዋ ዲራው፥ ፆሳ ሂንቴ ዎሲያባኔ ኦቺያባ ኡባ ኣኪዲጎዋዳን ኣማኒቴ፤ ሂንቴ ኣካና።

²⁵ፆሳ ዎሳናው ሂንቴ ኤቂያ ዎዴ፥ ሳሉዋን ዴዒያ ሂንቴ ኣዉ ሂንቴ ናጋራ ኣቶ ጋና ማላ፥ ኦኒኔ ሂንቴንታ ናቄዳባይ ዴዖፔ፥ ኣው ኣቶ ጊቴ።

²⁶ሺን ኣሳ ናጋራ ሂንቴ ኣቶ ጋና ꬋዮፔ፥ ሳሉዋን ዴዒያ ሂንቴ ኣዉካ ሂንቴ ናጋራ ሂንቴንቶ ኣቶ ጌና።»

²⁷ኡንቱንቱ ቃሲካ ዬሩሳላሜ ቤዲኖ፤ ዬሱሲ ጌሻ ጎሊያን ሃሜቲሺን፥ ቄሳቱዋ ካፓቱ፥ ሙሴ ሂጊያ ታማሪሲያዋንቱኔ ጪማቱ ዬሱሳኮ ዬዲኖ።

²⁸ኣ፥ «ኔኒ ሃዋ ኦꬃናው ኔው ኣይ ማታይ ዴዒ? ዎይ ኔው ሃ ማታ ኢሜዳዌ ኦኔ?» ያጌዲኖ።

²⁹ዬሱሲ ዛሪዴ ኡንቱንታ፥ «ታኒካ ሂንቴንታ ኢቲባ ኦቻና፤ ታው ኦዲቴ፤ ታኒ ቃሲ ሃዋ ኣይ ማታን ኦꬃይታንቶ፥ ሂንቴንቶ ኦዳና።

³⁰ዮሃኒሲ ፃማቂያ ማታ ኣኬዳዌ ፆሳፔዬ ዎይ ኣሳፔ? ታው ኦዲቴ» ያጌዳ።

³¹ኡንቱንቱ ባሬንቱ ጊዶን ፓሉማ ዶሚዴ፥ «ኑኒ፥ ‹ፆሳፔ ዬዳ› ያጎፔ፥ ኢ ኑና፥ ‹ያቲና፥ ዮሃኒሲ ኦዴዳዋ ኣዪሲ ኣማኒቤይኪቴ?› ያጋና።

³²ሺን፥ ‹ኣሳፔ ዬዳ ጋኔ?› » ያጌዲኖ፤ ቃሲ ኣሳይ ኡባይ ዮሃኒሲ ናቢያ ጊዴዳዋ ኤሪያ ዲራው፥ ኣሳው ያዬዲኖ።

³³ሄዋ ዲራው፥ ኡንቱንቱ ዬሱሳው፥ «ኑኒ ኤሮኮ» ያጊዴ ዛሬዲኖ፤ ዬሱሲ፥ «ታኒካ ሃዋ ኣይ ማታን ኦꬃይታንቶ፥ ሂንቴንቶ ኦዲኬ» ያጌዳ።