ማርቆሳ 1

1

2

3

4

5

6

7

8

9

10

11

12

13

14

15

16

¹ፆሳ ናዓ ዬሱሲ ኪሪስቶሳ ዎንጋላ ሚሺራቹዋ ዶሜꬃ።

²ናቢያ ኢሲያሲ ፃፌዳ ማፃፋን ፆሳይ፥ «ቤዓ፤ ታ ኪቲያዋ ታኒ ኔፔ ሲንꬃው ዬዳና። ኢ ኔው ኦጊያ ኬሳናዋ።

³ኢቲ ቢታኒ ቢታ ባዙዋን ባሬ ኮሻ ꬎቁ ኦꬂዴ፥ ‹ጎዳ ኦጊያ ጊጊሲቴ። ኢ ሃሜታና ሎሱዋካ ኣው ሱሪሲቴ› ጌዳዋዳን» ሃኔዳ።

⁴ፃማቂያ ዮሃኒሲ ኣሳ ፃማቂዲኔ፥ «ፆሳይ ሂንቴ ናጋራ ኣቶ ጋና ማላ፥ ሂንቴንቱ ናጋራፔ ሲሚዴ ፃማቄቲቴ» ያጊ ቃላ ኦዲዴ ቢታ ባዙዋን ኬሲ ዎꬌዳ።

⁵ዪሁዳ ጋዲያን ዴዒያ ኣሳይ ኡባይኔ ዬሩሳላሜ ካታማ ኣሳይ ኡባይ ዮሃኒሳኮ ዬዲኖ። ባሬንቱ ናጋራካ ፓፂና፥ ዮሃኒሲ ሄ ኣሳ ዮርዳኖሳ ሻፋን ፃማቄዳ።

⁶ዮሃኒሲ ጋሉዋ ኢስኪያፔ ዳዴቴዳ ማዩዋ ማዪዴ፥ ባሬ ፄሳን ዳፉዋ ዳንጬዳ፤ ቃሲ ቦሊያኔ ዎራ ኤሳ ሜዳ።

⁷ዮሃኒሲ ቃላ ኦዲዴ፥ «ታፔ ጉዬና ዳሮ ሚኒያዌ ዬ፤ ሃራይ ኣቶ፥ ኣ ጫማካ ጌዲያፔ ኬሳ ቶካናው ታኒ ቤሲኬ።

⁸ታኒ ሂንቴንታ ሃꬃን ፃማቃይ፤ ሺን ኢ ሂንቴንታ ጌሻ ኣያናን ፃማቃናዋ» ያጌዳ።

⁹ዬሱሲ ሄ ዎዴ ጋሊላ ጋዲያን ዴዒያ ናዚሬቴ ካታማፔ ዪና፥ ዮሃኒሲ ዮርዳኖሳ ሻፋን ኣ ፃማቄዳ።

¹⁰ዬሱሲ ሃꬃፔ ኬሶሳና ሳሉ ዶዬቲሺናኔ ጌሻ ኣያናይ ባሬ ቦላ ሃራጲያዳን ዎꬊሺን ቤዔዳ።

¹¹ቃሲ ሳሉዋፔ፥ «ታኒ ሲቂያ ታ ናዓይ ኔና፤ ታና ኔባይ ናሼቼ» ያጊያ ቃላይ ሲሴቴዳ።

¹²ኤሌካ ጌሻ ኣያናይ ኣሳይ ባዪና ሜላሳ ኣ ዬዴዳ።

¹³ዬሱሲ ኣሳይ ባዪናሳኒ ባሬና ሴፃናይ ፓጪሺን፥ ኦይታሙ ጋላሳ ጋꬄዳ፤ ዱዓናካ ዴዔዳ፤ ኪታንቻቱካ ዪዴ፥ ኣው ኦꬄዲኖ።

¹⁴ዮሃኒሲ ቃሼቶዋፔ ጉዪያን፥ ዬሱሲ ፆሳ ካዉቴꬃ ዎንጋላ ሚሺራቹዋ ኦዲዴ፥ ጋሊላ ጋዲያ ቢዴ፥

¹⁵«ዎዲ ጋኬዳ፤ ፆሳ ካዉቴꬃይካ ማታቴዳ። ሂንቴንቱ ናጋራፔ ሲሚዴ፥ ዎንጋላ ሚሺራቹዋ ኣማኒቴ» ያጌዳ።

¹⁶ዬሱሲ ጋሊላ ኣባ ላንቂያና ኣꬊዴ፥ ሞሊያ ኦይቂያዋንታ፥ ሲሞናኔ ኣ ኢሻ ኢንዲራሳ፥ ባሬንቱ ዳባ ኣባን ዬጊያዋንታ ቤዔዳ።

¹⁷ያቲዴ ኡንቱንታ፥ «ታና ካሊቴ፤ ታኒ ሂንቴንታ ሞሊያ ኦይቂያዋዳን ኣሳ ታኮ ኣሂያ ኦጊያ ታማሪሳና» ያጌዳ።

¹⁸ሄዋፔ ጉዪያን ኡንቱንቱ ኤሌካ ባሬንቱ ዳባ ኣጊዴ፥ ዬሱሳ ካሌዲኖ።

¹⁹ዬሱሲ ጉꬃ ሲንꬃዉኮ ቢዴ፥ ዛቢዲዮሳ ናና ላዑ ኢሻቱዋ፥ ያዪቆባኔ ዮሃኒሳ ዎንጊሪያ ጊዶን ባሬንቱ ዳባ ጊጊሲያዋንታ ቤዔዳ።

²⁰ኢ ቤዖሳንካ ኡንቱንታ ፄሲና፥ ባሬንቱ ኣዉዋ፥ ዛቢዲዮሳ፥ ኣ ኦሳንቻቱዋና ዎንጊሪያ ጊዶን ኣጊዴ፥ ዬሱሳ ካሊዴ ቤዲኖ።

²¹ኡንቱንቱ ቂፊሪናሆማ ጌቴቲያ ካታማ ዪዴ ጌሌዲኖ፤ ዬሱሲ ሳምባታ ጋላሳይ ጋኮ ዎዴ፥ ኣዪሁዳ ዎሳ ጎሌ ጌሊዴ፥ ታማሪሱዋ ዶሚ ኣጌዳ።

²²ባሬው ማታይ ዴዒያ ኣሳዳን፥ ኣሳ ኢ ታማሪሲያዋፔ ኣቲን፥ ሂጊያ ታማሪሲያዋንቱዳን ታማሪሴና ዲራው፥ ኣሳይ ኣ ቲሚርቲያን ማላሌቴዳ።

²³ሄ ዎዴ ኢታ ኣያናይ ዴዒያ ኢቲ ቢታኒ ኣዪሁዳ ዎሳ ጎሌ ጌሎሳናካ ባሬ ኮሻ ꬎቁ ኦꬂዴ፥

²⁴«ናዚሬቲያ ዬሱሳ፥ ኔኒ ኑፔ ኣያ ኮያይ? ኑና ꬋዪሳናው ያዲ? ኔኒ ኦኔንቶ ኤራይ፤ ኔኒ ፆሳፔ ኪቴቴዳ ጌሻ ጊዲኪ!» ያጌዳ።

²⁵ዬሱሲ ሄ ኢታ ኣያና፥ «ሃይዛ፤ ቢታኒያፔ ኬሳ» ያጊዴ ኣዛዜዳ።

²⁶ኢታ ኣያናይ ቢታኒያ ቡጬሬꬂ፥ ዳሪ ዋሲሲዴ፥ ኣፔ ኬሲ ኣጌዳ።

²⁷ኣሳይ ኡባይ ማላሌቲዴ፥ «ሃዌ ኣዬ? ሃ ቢታኒ ባሬ ማታኒ ሃራይ ኣቶ፥ ኢታ ኣያናቱዋካ ኣዛዜዳ፤ ኡንቱንቱካ ቃሲ ኣው ኣዛዜቲኖ፤ ሃዌ ኣይቤ ኦራꬃ ቲሚርቴ?» ያጊዴ፥ ባሬ ጊዶን ኢቱ ኢቱዋ ኦቼዳ።

²⁸ጋሊላ ጋዲያን ዴዒያ ሄራይ ኡባይ ኤሌካ ዬሱሳ ዋሪያ ሲሴዲኖ።

²⁹ዬሱሲ ኣዪሁዳ ዎሳ ጎሊያፔ ኬሶሳን፥ ያዪቆባናኔ ዮሃኒሳና ኢቲፔ ሲሞናኔ ኢንዲራሳ ሶይ ቢ ኣጌዳ።

³⁰ሲሞና ቦሎታታ ቆፁዋ ሃርጋዴ ጊሴዳዉኒባ ኢ ያ ጋኮሳናካ ኣው ኦዲ ኣጌዲኖ።

³¹ኢ ኢዚኮ ሺቂዴ፥ ኢዚ ኩሺያ ኦይቂዴ፥ ኢዞ ዴንꬂ ኤሴዳ፤ ቆፁ ኢዞ ኣጊና፥ ኢዛ ኡንቱንቶ ኦꬃዱ።

³²ሃርጌዳ ኣሳ ኡባኔ ኢታ ኣያናቱ ኦይቄዳ ኣሳ ኡባ ኦማርሲ ኣዋይ ዉሌዳዋፔ ጉዪያን፥ ኣሳይ ኣኮ ኣሄዲኖ።

³³ካታማን ዴዒያ ኣሳይ ኡባይ ሄ ካሪያ ሺቄዳ።

³⁴ዬሱሲ ዱማ ዱማ ሃርጊያን ኦይቄቴዳ ጮራ ኣሳ ፓꬂዴ፥ ጮራ ፃላሃቱዋካ ኬሴዳ። ኢ ኪሪስቶሳ ጊዲያዋ ኢታ ኣያናቱ ኤሬዳ ዲራው፥ ኡንቱንታ ሃሳዪሴናኒ ዲጌዳ።

³⁵ዬሱሲ ጉራ ዎንቱማꬃኒ ዴንዲዴ፥ ሶዪፔ ኬሲዴ፥ ኣሳይ ባይናሳ ቢዴ ያኒ ፆሳ ዎሴዳ።

³⁶ሲሞኒኔ ኣናና ዴዒያዋንቱ ኣ ኮዪዴ ቤዲኖ።

³⁷ኡንቱንቱ ኣ ዴሚዴ፥ «ኣሳይ ኡባይ ኔና ኮዬ» ያጌዲኖ።

³⁸ሄዋፔ ጉዬ ዬሱሲ ቃሲ ኡንቱንታ፥ «ሄዋ ሄራን ዴዒያ ሃራ ካታማቱዋ ቦይቴ፤ ታኒ ሄዋን ቃላ ኦዳናው ቤሴ፤ ኣዪሲ ጎፔ፥ ታኒ ዬዳዌ ሄዋሳ» ያጌዳ።

³⁹ኣዪሁዳ ዎሳ ጎሌቱዋን ቃላ ኦዲዲኔ ኢታ ኣያናቱዋ ኬሲዴ፥ ጋሊላ ጋዲያ ኡባ ዩዬዳ።

⁴⁰ኦሉ ኦይቄዳ ኢቲ ቢታኒ ዬሱሳኮ ዪዴ፥ ኣ ሲንꬃን ጉልባቲዴ፥ «ኔኒ ኮዮፔ፥ ታና ጌሻ ፓꬃናው ዳንዳያ» ያጊዴ ዎሴዳ።

⁴¹ዬሱሲ ኣው ቃሬቴዳ፤ ባሬ ኩሺያ ዬዲ፥ ኣ ቦቺዴ፥ «ታኒ ኮያይ፤ ጌያ፤ ፓፃ!» ያጌዳ።

⁴²ኤሌካ ኦሉ ቢታኒያ ዬዲ ኣጊና፥ ቢታኒ ጌዪ ፓፂ ኣጌዳ።

⁴³ዬሱሲ ዳሪ ሃንቄቲዴ፥ ኤሌካ ኣ ኬሲ ዬዴዳ።

⁴⁴ኢ ቢታኒያ፥ «ኔና ኤራ! ሃዋ ኦሲኔ ኦዶፓ፤ ሺን ባዴ ኔ ቦላ ቄሳ ቤሳ፤ ቃሲ ኔኒ ሃዒ ጌሻ ጊዴዳዋ ኣሳ ኤሪሳናው፥ ሙሴ ኣዛዜዳ ያርሹዋ ያርሻ» ያጌዳ።

⁴⁵ሺን ቢታኒ ቢዴ፥ ዬዉዋ ኡባሳን ኣሳ ኡባው ኦዱዋኔ ላሌꬃ ዶሜዳ፤ ሄዋ ዲራው፥ ዬሱሲ ቆንጪያ ኬሲዴ፥ ካታማ ጌላናው ዳንዳዪቤና፤ ሺን ኣሳይ ባዪናሳ ጋፃን ዴዔዳ፤ ቃሲ ኣሳይ ኡባሳፔ ኣኮ ዬዲኖ።