ማርቆሳ 2

1

2

3

4

5

6

7

8

9

10

11

12

13

14

15

16

¹ኣማሬዳ ጋላሳፔ ጉዪያን፥ «ዬሱሲ ቂፊሪናሆማ ጉዬ ሲሚዴ፥ ሶዪን ዴዔ» ጊያ ሃሳያይ ሲሴቴዳ።

²ጎሊ ኣኬናን ኢፂና፥ ሃራይ ኣቶ፥ ካሪካ ኡንዓና ጋካናሲ ጮራ ኣሳይ ሺቄዳ፤ ሄዋንቱሲ ዬሱሲ ቃላ ኦዴ።

³ኦይዱ ኣሳቱ ቦላይ ሲሌዳ ኢቲ ቢታኒያ ቶኪዴ፥ ኣኮ ኣሄዲኖ።

⁴ኣሳይ ጮሬዳ ዲራው፥ ቢታኒያ ዬሱሳኮ ኣፋናው ኡንቱንቶ ዳንዳዬቴናን ኢፂና፥ ዬሱሲ ዴዒያ ባጋና ጎሊያ ቃሪዴ፥ ካራ ሉኬዲኖ፤ ሄ ሉኬዳሳና ቢታኒያ ኢ ጊሴዳ ሻንቻማና ዱጌ ዎꬄዲኖ።

⁵ዬሱሲ ኡንቱንቱ ኣማኑዋ ቤዒዴ፥ ሄ ቦላይ ሲሌዳ ቢታኒያ፥ «ታ ናዓው፥ ኔ ናጋራይ ኣቶ ጌቴቴዳ» ያጌዳ።

⁶ሂጊያ ታማሪሲያዋንቱፔ ሄዋን ኡቴዳ ኢቱ ኢቱ ባሬንቱ ዎዛናኒ፥

⁷«ላ ሃ ቢታኒ ሃዋ ማላ ኢታባ ፆሳ ቦላ ኣዪሲ ሃሳዪ? ፆሳ ፃላላፔ ኣቲን፥ ሃራይ ኦኔ ናጋራ ኣቶ ጋናው ዳንዳዪያዌ?» ያጊዴ ቆፔዲኖ።

⁸ኡንቱንቱ ባሬንቱ ዎዛናን ሄዋዳን ቆፖዋ ዬሱሲ ኤሌካ ባሬ ኣያናን ኤሪዴ፥ ኡንቱንታ «ሂንቴንቱ ሂንቴ ዎዛናን ኣዪሲ ሄዋዳን ቆፒቴ?

⁹ቦላይ ሲሌዳ ቢታኒያ፥ ‹ኔ ናጋራይ ኣቶ ጌቴቴዳ› ጊያዌ ማቴዬ? ዎይ፥ ‹ዴንዳ ኤቃዴ ኔ ሻንቻማ ቶካዴ ሃሜታ› ጊያዌ ማቴ?

¹⁰ሺን ታኒ፥ ኣሳ ናዓው፥ ሳዓ ቦላን ናጋራ ኣቶ ጋናው ማታይ ዴዒያዋ ታኒ ሂንቴንታ ኤሪሳና» ያጊዴ ሄ ቦላይ ሲሌዳ ቢታኒያ፥

¹¹«ኔና ጋይ፤ ዴንዳ ኤቃ፤ ያታዴ ኔ ሻንቻማ ቶካዴ ኔ ሶይ ባ» ያጌዳ።

¹²ቢታኒ ኤሌካ ዴንዲ ኤቂዴ፥ ባሬ ሻንቻማ ቶኪዴ፥ ኣሳይ ኡባይ ፄሊሺን ቢና ኣሳይ ኡባይ ማላሌቲዴ፥ «ኑኒ ሃዋ ማላባ ኡባካ ቤዒ ኤሮኮ» ያጊዴ ፆሳ ጋላቴዲኖ።

¹³ዬሱሲ ጉጂካ ጋሊላ ኣባ ዶና ቤዳ፤ ኣሳይ ኡባይ ኣኮ ዬዳዋንታ ታማሪሴዳ።

¹⁴ሄዋና ኣꬊዴ፥ ኢልፒዮሳ ናዓ ሌዊያ፥ ጊያዌ ቃራፃ ቃንፂያሳን ኡቴዳዋ ዴሚዴ፥ «ታና ካላ» ያጌዳ። ሄዋፔ ጉዬ ሌዊ ዴንዲ ኤቂዴ፥ ኣ ካሌዳ።

¹⁵ዬሱሲ ቁማ ማናው ሌዊያ ሶዪን ኡቴዳ ዎዴ፥ ቃራፃ ኣኪያ ጮራ ኣሳይኔ ናጋራንቻቱ ኣናናኔ ኣ ካሊያዋንቱና ኢቲፔ ኡቴዲኖ። ኣ ካሊያዋንቱ ጊዶን ሄዋንቱ ማላ ኣሳቱ ዳሬዲኖ።

¹⁶ሂጊያ ታማሪሲያ ኢቲ ኢቲ ፓሪሳዋቱ ዬሱሲ ናጋራንቻቱዋናኔ ቃራፃ ኣኪያዋንቱና ቁማ ሚሺን ቤዒዴ፥ «ኢ ኣዪሲ ናጋራንቻቱዋናኔ ቃራፃ ኣኪያዋንቱና ቁማ ሚ?» ያጊዴ፥ ኣ ካሊያዋንታ ኦቼዲኖ።

¹⁷ዬሱሲ ኡንቱንቱ ጊያዋ ሲሲዴ፥ «ሃርጋንቻቱዋፔ ኣቲን፥ ፓፃ ኣሳው ኣኪሚ ኮሼና፤ ታኒ ናጋራንቻቱዋ ፄሳናው ዬዳዋፔ ኣቲን፥ ፂላቱዋ ፄሳናው ያቤይኬ» ያጊዴ ኡንቱንቶ ዛሬዳ።

¹⁸ፃማቂያ ዮሃኒሳ ካሊያዋንቱኔ ፓሪሳዋቱ ፆሚኖ፤ ኣማሬዳ ኣሳቱ ዬሱሳኮ ዪዴ፥ «ዮሃኒሳ ካሊያዋንቱኔ ፓሪሳዋቱዋ ካሊያዋንቱ ፆሚኖ፤ ሺን ኔና ካሊያዋንቱ ኣዪሲ ፆሚኪኖ?» ያጌዲኖ።

¹⁹ዬሱሲ ኡንቱንታ «ቡላቻ ዬዳ ኣሳቱ ማቻቶ ኣኪያዌ ባሬንቱና ዴዒሺን፥ ፆማናው ዳንዳዪኖ? ማቻቶ ኣኪያዌ ኡንቱንቱና ዴዒሺን፥ ፆማናው ዳንዳይኪኖ።

²⁰ሺን ማቻቶ ኣኪያዋ ኡንቱንቱ ማታፔ ኣፋና ዎዲ ያናዋ፤ ኡንቱንቱ ሄ ዎዴ ፆማናዋንታ።

²¹«ኤጫ ማዩዋ ቦላ ኦራꬃ ꬌፊያ ዎꬂ ሲኪያ ኣሳይ ባዋ፤ ኤጫ ዎꬂ ሲኮፔ፥ ኦራꬃ ꬌፊ ኤጫ ማዩዋ ፔꬌሬꬄ፤ ፔꬌꬃይካ ኮይሮዋፔ ዳራና።

²²ቃሲ ሆዖ ዎዪኒያ ኤሳ ኤጫ ኦጎሩዋን ናዒያ ኣሳይ ባዋ፤ ሺን ናዖፔ፥ ሄ ዎዪኒያ ኤሳይ ኦጎሩዋ ዳኬ፤ ባሬዉካ ዎፌቴ፤ ኦጎሩካ ባዬ፤ ሺን ሆዖ ዎዪኒያ ኤሳ ኦራꬃ ኦጎሩዋን ናዔቴ» ያጌዳ።

²³ዬሱሲ ኢቲ ሳምባታ ጋላሲ ቲሻ ባንጋ ጊዶና ኣꬊሺን፥ ኣ ካሊያዋንቱና ኣናና ቢዴ፥ ባንጋ ቲሻፔ ዱሳ ዶሜዲኖ።

²⁴ፓሪሳዋቱ ዬሱሳ፥ «ቤዓ፤ ኔና ካሊያዋንቱ ሳምባታ ጋላሲ ሂጌ ጊዴናባ ኣዪሲ ኦꬂኖ?» ያጌዲኖ።

²⁵ዬሱሲ ኡንቱንታ፥ «ዳዊቴ ኮሻቲዴ፥ ሚያባ ኮዬዳ ዎዴ፥ ባሬናና ዴዒያዋንቱና ኦꬄዳዋ ኡባካ ናባቢቤይኪቴ?

²⁶ኣቢያታሪ ቄሳቶ ኡባቶ ካፖ ጊዴዳ ዎዴ፥ ዳዊቴ ፆሳ ጎሊያ ጌሊዴ፥ ቄሳቱዋ ፃላላይ ማናፔ ኣቲን፥ ኦኒኔ ማናው ሂጌ ጊዴናዋ ጎዳ ሲንꬃን ዎꬄዳ ቁማ ሚዴ፥ ባሬናና ዴዒያዋንቶካ ኢሜዳ» ያጌዳ።

²⁷ቃሲካ ዬሱሲ ኡንቱንታ፥ «ሳምባታይ ኣሳው ሜꬌቴዳዋፔ ኣቲን፥ ኣሳይ ሳምባታው ሜꬌቲቤና።

²⁸ሄዋ ዲራው፥ ታኒ፥ ኣሳ ናዓይ፥ ሃራይ ኣቶ፥ ሳምባታዉካ ጎዳ» ያጌዳ።