ማርቆሳ 10

1

2

3

4

5

6

7

8

9

10

11

12

13

14

15

16

¹ዬሱሲ ሄዋፔ ዴንዲዴ፥ ዮርዳኖሳ ሻፋፔ ሄፊንꬃ ባጋና ዪሁዳ ጋዲያ ቤዳ። ጮራ ኣሳይ ሺሬቲዴ ኣኮ ሺቂና፥ ካሴ ኢ ኦꬂያዋዳንካ ሄ ኣሳ ታማሪሱዋ ዶሜዳ።

²ኢቲ ኢቲ ፓሪሳዋቱ ፓጫናው ዬሱሳኮ ዪዴ፥ «ኢቲ ኣሳይ ባሬ ማቻቶ ዬዳናው ኑሲ ሂጊ ኣዛዚ?» ያጊዴ ኣ ኦቼዲኖ።

³ኢ ዛሪዴ፥ «ሙሴ ሂንቴንታ ዋጊ ኣዛዜዴ?» ያጌዳ።

⁴ኡንቱንቱ፥ «ሙሴ፥ ‹ኢቲ ኣሳይ ባሬ ማቻቶ ፓራማ ኢሚዴ ዬዶ› ጌዳ» ያጌዲኖ።

⁵ዬሱሲ ዛሪዴ ኡንቱንታ፥ «ሂንቴንቱ ኦዲና ሲሴናዋንታ ጊዲያ ዲራው፥ ሙሴ ሃ ኣዛዙዋ ሂንቴንቶ ፃፌዳ።

⁶ሺን ፆሳይ ኮይሮ ሜꬊያ ዎዴ፥ ኣቱማ ኣሳኔ ማጫ ኣሳ ኦꬂዴ፥ ኡንቱንታ ሜꬌዳ።

⁷ሄዋ ዲራው፥ ኢቲ ኣሳይ ባሬ ኣባኔ ባሬ ዳዮ ኣጊዴ፥ ባሬ ማቻቲና ኢቱዋ ጊዴ፤

⁸ኡንቱንቱ ላዓቱ ኢቲ ኣሾ ጊዲኖ፤ ሄዋ ዲራው፥ ኡንቱንቱ ኢቲ ኣሳ ጊዲያዋፔ ኣቲን፥ ላዑ ኣሳ ጊዲኪኖ።

⁹ሄዋ ዲራው፥ ፆሳይ ኢቲፔ ጋꬄዳዋ ኣሳይ ሻኮፖ» ያጌዳ።

¹⁰ኡንቱንቱ ሶይ ሲሜዳ ዎዴ፥ ዬሱሳ ካሊያዋንቱ ሃ ዬዉዋባ ዬሱሳ ዛሪ ኦቼዲኖ።

¹¹ዬሱሲ ኡንቱንታ፥ «ባሬ ማቻቶ ዬዲዴ፥ ሃራሮ ኣኪያ ኡራይ ኦኒኔ ኢዚና ዎሹሜ።

¹²ቃሲ ማጫዉናካ ባሬ ኣሲናፔ ኬሳዴ ሃራ ኣሲና ጌሎፔ ዎሹማው» ያጌዳ።

¹³ዬሱሲ ጉꬃ ናና ቦቻና ማላ፥ ኢቲ ኢቲ ኣሳይ ናና ኣኮ ኣሄዳ፤ ሺን ዬሱሳ ካሊያዋንቱ ሄ ኣሳ ሴሬዲኖ።

¹⁴ዬሱሲ ሄዋ ቤዒዴ፥ ባሬና ካሊያዋንታ ሃንቄቴዳ፤ ኡንቱንታ፥ «ጉꬃ ናናይ ታኮ ዪያዋንታ ዲጎፒቴ፤ ኣዪሲ ጎፔ፥ ፆሳ ካዉቴꬃይ ሃዋንቱ ማላሳ።

¹⁵ታኒ ሂንቴንቶ ቱሙዋ ጋይ፤ ፆሳ ካዉቴꬃ ጉꬃ ናዓዳን ኣኬና ኡራይ ኦኒኔ ሄ ካዉቴꬃ ኡባካ ጌሌና» ያጌዳ።

¹⁶ጉꬃ ናና ኢዲሚዴ፥ ባሬ ኩሺያ ኡንቱንቱ ቦላ ሁጲያን ሁጲያን ዎꬂዴ፥ ኡንቱንታ ኣንጄዳ።

¹⁷ዬሱሲ ባናው ኬሴዳ ዎዴ፥ ኢቲ ቢታኒ ዎፂዴ ዪ ኣ ሲንꬃን ጉልባቲዴ፥ «ሎዖ ታማርሲያዎ፥ ሜꬊና ዴዑዋ ላታናው ታኒ ኣያ ኦꬆ?» ያጊዴ ኣ ኦቼዳ።

¹⁸ዬሱሲ፥ «ኣዪሲ ታና ሎዖ ጋይ? ፆሳ ፃላላፔ ኣቲን፥ ሃራ ሎዑ ኦኒኔ ባዋ።

¹⁹ፆሳ ኣዛዙዋ፥ ‹ዎꬎፓ፤ ዎሹሞፓ፤ ዉዖፓ፤ ዎርዱዋ ማርካቶፓ፤ ጪሞፓ፤ ኔ ኣባኔ ኔ ዳዮ ቦንቻ› ያጊያዋ ኤራሳ» ያጌዳ።

²⁰ቢታኒ ዬሱሳ፥ «ታማሪሲያዎ፥ ታኒ ሄዋ ኡባ ናዓቴꬃፔ ዶማዴ ሃዒ ጋካናዉካ ናጋይ» ያጌዳ።

²¹ዬሱሲ ቢታኒያ ዶሴዳ፤ ኣ ጫዲ ፄሊዴ፥ «ኔው ኢቲባይ ፓጬዳ፤ ባዴ ኔው ዴዒያባ ኡባ ዛልዓዴ፥ ሄ ሚሻ ሂዬሳው ኢማ፤ ኔን ሳሉዋን ዱሬታና። ያቶዋፔ ጉዪያን ያዴ ታና ካላ» ያጌዳ።

²²ሺን ቢታኒ ሄዋ ሲሲዴ፥ ኢ ዳሮ ዱሬ ጊዲያ ዲራው፥ ባሬ ሶምዒያ ꬉሚሲዴ፥ ናሼቴናን ኣጊዴ ቤዳ።

²³ዬሱሲ ባሬና ካሊያዋንታ ዩሺ ኣꬂ ፄሊዴ፥ «ዳሮ ዱሬ ኣሳይ ፆሳ ካዉቴꬃ ጌላናው ዋኒ ሜታንዴሻ!» ያጌዳ።

²⁴ኣ ካሊያዋንቱ ኣ ሃሳያ ሲሲዴ ማላሌቴዲኖ፤ ሺን ዬሱሲ ቃሲካ ኡንቱንታ፥ «ናቶ፥ ፆሳ ካዉቴꬃ ጌላናው ዎቲ ሜታንዴሻ!

²⁵ዱሬ ኣሳይ ፆሳ ካዉቴꬃ ጌላናዋፔ፥ ጋሉ ማርፒያ ፆዒያና ኣꬋናዌ ማታቴ» ያጌዳ።

²⁶ዬሱሳ ካሊያዋንቱ ማላሌቲዴ፥ «ያቲና፥ ኦኔ ኣታናው ዳንዳዪያዌ?» ያጊዴ ኢቱ ኢቱዋ ኦቼዲኖ።

²⁷ዬሱሲ ኡንቱንታ ጫዲ ፄሊዴ፥ «ሃዌ ፆሳው ዳንዳዬቲያዋፔ ኣቲን፥ ኣሳው ዳንዳዬቴና፤ ኣዪሲ ጎፔ፥ ፆሳው ኡባባይካ ዳንዳዬቴ» ያጌዳ።

²⁸ጴፂሮሲ ዬሱሳ፥ «ቤዓ፤ ኑኒ ኑባ ኡባ ኣጊዴ፥ ኔና ካሌዶ» ያጌዳ።

²⁹ዬሱሲ፥ «ታኒ ሂንቴንቶ ቱሙዋ ጋይ፤ ታ ዲራዉኔ ዎንጋላ ሚሺራቹዋ ዲራው፥ ጎሊያ ዎይ ኢሻቱዋ ዎይ ሚቻቱዋ፥ ዎይ ኣዉዋ ዎይ ኣቶ ዎይ ማቻቶ፥ ዎይ ናና ዎይ ጋዲያ ኣጌዳ ኣሳይ ኦኒኔ፥

³⁰ሃዒ ሃ ዎዲያን ፄቱ ዳኩዋፔ ዳሪያ ጎሌቱዋ፥ ኢሻቱዋ፥ ሚቻቱዋ፥ ኣቶ፥ ናና፥ ጋዲያ፥ ቃሲ ሜቱዋካ ኣካናዋ። ሲንꬃፔ ያና ዎዲያንካ ሜꬊና ዴዑዋ ኣካናዋ።

³¹ሺን ጮራቱ ሃዒ ሲንꬃን ዴዒያዋንቱ ጉዬ ኣꬋና፤ ቃሲ ጮራቱ ሃዒ ጉዬን ዴዒያዋንቱ ሲንꬃው ኣꬋና» ያጌዳ።

³²ኡንቱንቱ ዬሩሳላሜ ቢዴ፥ ኦጊያን ዴዒኖ፤ ዬሱሲ ባሬና ካሊያዋንቱፔ ሲንꬃና ሃሜቴ። ኡንቱንቱ ማላሌቴዲኖ፤ ኣ ካሊያዋንቱ ያዬዲኖ። ዛሪዴ ታማኔ ላዑ ባሬና ካሊያዋንታ ጋፃ ኬሲዴ፥ ባሬና ጋካናባ ዱማዪዴ ኡንቱንቱሲ ሃዋዳን ያጊዴ ኦዴዳ፤

³³«ቤዒቴ፤ ኑኒ ዬሩሳላሜ ሃዒ ኬሶይቴ፤ ያኒ ታና፥ ኣሳ ናዓ፥ ቄሳቱዋ ካፓቱዋሲኔ ሙሴ ሂጊያ ታማርሲያዋንቱሲ ኣꬂዴ ኢማና። ኡንቱንቱ ታ ቦላን ሃይቁዋ ፒርዳ ፒርዳና፤ ቃሲ ኣዪሁዳ ጊዴና ኣሳሲካ ታና ኣꬂዴ ኢማና።

³⁴ሄ ኣዪሁዳ ጊዴና ኣሳይ ታ ቦላ ቂሊጫናኔ ጩቻና፤ ታና ሊሱዋን ሾጫናኔ ዎꬋና፤ ታኒ ቃሲ ሄዙ ጋላሳፔ ጉዪያን፥ ሃይቁዋፔ ዴንዳና።»

³⁵ዛቢዲዮሳ ናናይ ያዪቆቢኔ ዮሃኒሲ ዬሱሳኮ ዪዴ፥ «ታማሪሲያዎ፥ ኑኒ ኔና ዎሲያባ ኡባባ ኑሲ ኦꬃሪኪ» ያጌዲኖ።

³⁶ዬሱሲ ኡንቱንታ፥ «ታኒ ሂንቴንቶ ኣያ ኦꬆ?» ያጌዳ።

³⁷ኡንቱንቱ ኣ፥ «ኔ ቦንቾ ካዉቴꬃን ኔኒ ኡቲያ ዎዴ፥ ኑፔ ኢቱዋ ኔፔ ኡሼቻ ባጋና ቃሲ ኢቱዋ ሃዲርሳ ባጋና ኡቲሳሪኪ» ያጌዲኖ።

³⁸ሺን ዬሱሲ ኡንቱንታ፥ «ሂንቴንቱ ኣያ ዎሳናው ቤሲንቶካ ኤሪኪታ፤ ታኒ ኡሻናው ቤሲያ ሜቱዋ ፁዓ ኡሻናው ዳንዳዪቴ? ቃሲ ታኒ ፃማቄታናው ቤሲያ ፂንቃታ ፃማቄታናው ዳንዳዪቴ?» ያጌዳ።

³⁹ሄዋፔ ጉዬ ኡንቱንቱ ዛሪዴ፥ «ኤ ዳንዳዬቶ» ያጌዲኖ። ዬሱሲ ቃሲ፥ «ታኒ ኡሻናው ቤሲያ ሜቱዋ ፁዓ ሂንቴ ኡሻና፤ ታኒ ፃማቄታናው ቤሲያ ፂንቃታካ ሂንቴ ፃማቄታና።

⁴⁰ሺን ታፔ ኡሼቻ ባጋናኔ ሃዲርሳ ባጋና ኡታናዋንታ ዶሪያዌ ታና ጊዲኬ፤ ሺን ሄ ሳዓይ ፆሳይ ኢማናው ጊጊሲ ዎꬄዳዋንቱሳ» ያጌዳ።

⁴¹ዮኮ ታሙ ዬሱሳ ካሊያዋንቱ ሄዋ ሲሴዳ ዎዴ፥ ያዪቆባኔ ዮሃኒሳ ሃንቄቴዲኖ።

⁴²ዬሱሲ ኡንቱንታ ኡባ ባሬኮ ፄሲዴ፥ ሃዋዳን ያጌዳ፤ « ‹ኣዪሁዳ ጊዴናዋንታ ሞዲያዋንታ› ጊዴ ቆፒያዋንቱኔ ሄዋንታ ካሌꬂያ ኣሳቱ ባሬንቱ ኣሳ ሞዲያዋ ኤሪታ።

⁴³ሺን ሂንቴ ጊዶን ሄዋ ማላ ጊዴና፤ ሂንቴ ጊዶን ዎጋታና ኮዪያ ኦኒኔ ሂንቴንቶ ቆማ ጊዳናው ቤሴ።

⁴⁴ቃሲ ሂንቴ ጊዶን ኡባፔ ቦላ ጊዳና ኮዪያ ኦኒኔ ሂንቴ ኡባው ኣዪሌ ጊዳናው ቤሴ።

⁴⁵ኣዪሲ ጎፔ፥ ሃራይ ኣቶ ታኒ፥ ኣሳ ናዓይካ፥ ኣሳው ኦꬃናዉኔ ጮራቱዋ ዎዛናው ዬዳዋፔ ኣቲን፥ ኣሳይ ታው ኦꬃና ማላ ያቤይኬ» ያጌዳ።

⁴⁶ኡንቱንቱ ኢያርኮ ጊያ ካታማ ቤዲኖ፤ ዬሱሲ ባሬና ካሊያዋንቱናኔ ጮራ ኣሳና ኢያርኮፔ ኬሲሺን፥ ፂሞሳ ናዓይ ቆቃይ፥ ባርፃሞሳ ጊያዌ፥ ኦጊያ ዶናን ዎሲዴ ኡቴዳ።

⁴⁷ባርፃሞስ ናዚሬቲያ ዬሱሳ ጊዴዳዋ ሲሲዴ፥ ባሬ ኮሻ ꬎቁ ኦꬂዴ፥ «ዳዊቴ ናዓ ዬሱሳ፥ ታና ማራሪኪ!» ያጉሳ ዶሜዳ።

⁴⁸ጮራ ኣሳይ ኣ፥ «ሃይዛ!» ጊዴ ሃንቄቴዳ። ሺን፥ ኢ ባሬ ኮሻ ካሴዋፔካ ዳሪሲ ꬎቁ ኦꬂዴ፥ «ዳዊቴ ናዓው፥ ታና ማራሪኪ!» ያጌዳ።

⁴⁹ዬሱሲ ኦጊያን ኤቂዴ፥ «ኣ ሃ ፄሲቴ» ያጌዳ። ኡንቱንቱ ቆቃ፥ «ኣይኔ ባዋ፤ ዴንዳ ኤቃ፤ ኔና ፄሴ» ያጊዴ ፄሴዲኖ።

⁵⁰ቆቃይ ባሬ ማዩዋ ኦሊ ኣጊዴ፥ ጉፒ ዴንዲ ኤቂዴ፥ ዬሱሳኮ ቤዳ።

⁵¹ዬሱሲ ኣ፥ «ታኒ ኔው ኣያ ኦꬃናው ኮያይ?» ያጌዳ። ቆቃይ፥ «ታማሪሲያዎ፥ ታኒ ፄላናዋ ኮያይ» ያጌዳ።

⁵²ዬሱሲ ኣ፥ «ባ፤ ኔ ኣማኑ ኔና ፓꬄዳ» ያጌዳ። ኤሌካ ኣ ኣይፊ ፄሊ ኣጊና፥ ኦጊያን ዬሱሳ ካሊ ኣጌዳ።