ማርቆሳ 15

1

2

3

4

5

6

7

8

9

10

11

12

13

14

15

16

¹ዎንታ ጉራን ኤሌካ ቄሳቱዋ ካፓቱ ጪማቱዋናኔ ሙሴ ሂጊያ ታማሪሲያዋንቱና ሄዋን ሺቄዳ ኣዪሁዳ ሻንጋቱዋ ኡባና ማቄቲዴ፥ ዬሱሳ ቃቺ ኣፊዴ፥ ጲላፆሳው ኣꬂዴ ኢሜዲኖ።

²ጲላፆሲ ኣ፥ «ኔኒ ኣዪሁዳቱዋ ካቴ?» ያጊዴ ኦቼዳ። ዬሱሲ ዛሪዴ ኣ፥ «ኔ ጊያዋዳና» ያጌዳ።

³ቄሳቱዋ ካፓቱ ዬሱሳ ዳሮባን ሞቴዲኖ።

⁴ጲላፆሲ ሺሬቲዴ ዬሱሳ፥ «ኔው ዛሪያባይ ባዌ? ኡንቱንቱ ኔ ቦላ ዎዪሳ ሞቱዋ ኣሂንቶ ቤዒኪ?» ያጊዴ ኦቼዳ።

⁵ሺን ዬሱሲ ሃራባ ዛሬናን ኢፂና፥ ጲላፆሲ ማላሌቴዳ።

⁶ጲላፆሳው ፓሲጋ ባላ ቦንቺያ ጋላሳን ኣሳይ ኮዪያ ኢቲ ኡራ ቃሹዋፔ ቢሊያ ዎጋይ ዴዔ።

⁷ሄ ዎዴ ኢቲ ባርባና ጊያ ቢታኒ ዋላሳ ኬሲዴ ሼምፑዋ ዎꬌዳ ኣሳቱዋና ኢቲፔ ቃሾ ጎሊያን ዴዔ።

⁸ሺቄዳ ጮራ ኣሳይ ጲላፆሲ ካሴ ኤሬቶዋዳንካ ባሬንቶ ማሮታ ኦꬃና ማላ፥ ኣ ኦቼዲኖ።

⁹ጲላፆሲ ኣሳ ዛሪዴ፥ «ታኒ ሂንቴንቶ ኣዪሁዳቱዋ ካቲያ ቢሊያዋ ኮዪቴ?» ያጊዴ ኦቼዳ።

¹⁰ኣዪሲ ጎፔ፥ ቄሳቱዋ ካፓቱ ዬሱሳ ቃናቲዴ ኣꬂ ኢሜዳዋ ጲላፆሲ ኤሬዳ።

¹¹ሺን ቄሳቱዋ ካፓቱ ዬሱሳ ኮታ ባርባና ቢላናዳን፥ ሄ ሺቄዳ ኣሳይ ጲላፆሳ ዎሳና ማላ፥ ኣሳ ማቄዲኖ።

¹²ጲላፆሲ ላዔንꬁዋ ዛሪዴ፥ «ያቲና፥ ሃ ኣዪሁዳ ካቲያ ሂንቴንቱ ጊያዋ ዎቶ?» ያጌዳ።

¹³ኣሳይ ጲላፆሳው ዛሪ ዛሪ ባሬንቱ ኮሻ ꬎቁ ኦꬂዴ፥ «ኣ ካቃ» ያጌዲኖ።

¹⁴ጲላፆሲ ኣሳ፥ «ኣዪሲ? ኢ ኣይ ኢታባ ኦꬄዴ?» ያጌዳ። ሺን ኣሳይ ካሴዋፔካ ባሬ ኮሻ ꬎቁ ኦꬂዴ፥ «ኣ ካቃ» ያጌዲኖ።

¹⁵ጲላፆሲ ኣሳ ናሼቻናው ኮዪዴ፥ ባርባና ኣሳው ቢሌዳ፤ ያቲዴ ሊሱዋን ዬሱሳ ዎታዳራቱዋን ሾጪሲዴ፥ ካቃና ማላ ኡንቱንቶ ኣꬂ ኢሜዳ።

¹⁶ሄዋፔ ጉዪያን፥ ዎታዳራቱ ዬሱሳ ጋዲያ ሞዲያዋ ጊቢያ ኣፊዴ፥ ሃራ ዎታዳራቱዋ ኡባ ኢቲፔ ፄሴዲኖ።

¹⁷ቃሲ ዞዖ ማዩዋ ኣ ማዪዜዲኖ፤ ኣጉንꬃ ኣኪሊሊያ ጊጊሲዴ፥ ኣ ሁጲያን ዎꬄዲኖ።

¹⁸ሄዋፔ ጉዪያን ኣ፥ «ኣዪሁዳቱዋ ካቴው፥ ሳሮታይ ኔው ጊዶ» ያጊ ሳሮቲዴ፥ ኣ ቂሊጩዋ ዶሜዲኖ።

¹⁹ዬሱሳ ሁጲያ ማቃ ፃምዓን ሾጬዲኖ፤ ቃሲ ኣ ቦላን ጩቼዲኖ፤ ጉልባቲዴ ኣው ጎዪኔዲኖ።

²⁰ኣ ቦላ ቂሊጬዳዋፔ ጉዪያን፥ ዞዖ ማዩዋ ኣፔ ቃሪ ኣኪዴ፥ ኣ ማዩዋ ኣ ማዪዜዲኖ፤ ያቲዴ ማስቃሊያ ቦላን ሚሲማሪያን ꬊሺዴ፥ ኣ ካቃናው ኣፌዲኖ።

²¹ኡንቱንቱ ቢዴ፥ ኢስኪንዲራኔ ሩፎሳ ዬሌዳ ኣዉዋ፥ ኢቲ ሲሞና ጊያ ቄሬና ጋዲያ ኣሳይ፥ ጋፃፔ ካታማ ዪያዋና ጋኬቲዴ፥ ዬሱሳ ማስቃሊያ ዎልቃን ቶሴዲኖ።

²²ያቲዴ ጎልጎታ ጌቴቲያሳ ዬሱሳ ኣፌዲኖ። «ጎልጎታ» ጊያዌ «ሁጲያ ጎሲያሳ» ጊያዋ።

²³ካዋራ ጊያ ꬋሊ ዋላኬቴዳ ዎዪኒያ ኤሳ ዬሱሳው ኡሻናው ኢሜዲኖ፤ ሺን ኢ ኡሼናን ኢፄዳ።

²⁴ኡንቱንቱ ኣ ካቄዲኖ፤ ቃሲ ኦና ኦና ጋካኔንቶ ኤራናው ኣ ማዩዋ ሻኪዴ፥ ሳማ ዬጌዲኖ።

²⁵ኡንቱንቱ ኣ ካቂያ ዎዴ፥ ዎንታፔ ሄዙ ሳቴ።

²⁶«ኣዪሁዳቱዋ ካቲያ» ያጊ ኣ ሞቲያ ፃፉ ፃፌቲ ኡቴዳ።

²⁷ዬሱሳና ላዑ ካዪሳቱዋ ኢቱዋ ኣፔ ኡሼቻ ባጋና፥ ቃሲ ኢቱዋ ኣፔ ሃዲርሳ ባጋና ማስቃሊያ ቦላ ሚሲማሪያን ꬊሺዴ ካቄዲኖ።

²⁸ፆሳ ማፃፋይ፥ «ኢታባ ኦꬄዳ ኣሳቱዋና ኢ ፓይዴቴዳ» ያጊያዌ ፖሌቴዳ።

²⁹ኦጊያና ኣꬊያ ኣሳይ ዬሱሳ ካꬊዴ፥ ባሬንቱ ሁጲያ ቃꬂዴ ቦሬዲኖ፤ «ሲሚ፥ ጌሻ ጎሊያ ኮላዴ ሄዙ ጋላሳ ጊዶን ኬፂያዎ፥

³⁰ኣኔ ማስቃሊያ ቦላፔ ዎꬋዴ፥ ኔ ሁጲያ ኣሻ» ያጌዲኖ።

³¹ሃዋዳንካ ቄሳቱዋ ካፓቱ ሙሴ ሂጊያ ታማሪሲያዋንቱና ኢቲፔ ዬሱሳ ቦላ፥ «ሃራ ኣሳቱዋ ኣሼዳ፤ ሺን ባሬና ኣሻናው ዳንዳዬና፤

³²ኑኒ ቤዒዴ ኣማናና ማላ፥ ኪሪስቶሲ ኢስራዔሊያ ካቲ፥ ኣኔ ማስቃሊያ ቦላፔ ሃዒ ዎꬎ» ጊዴ ቂሊጬዲኖ። ቃሲ ሃራይ ኣቶ፥ ኣናና ማስቃሊያ ቦላ ሚሲማሪያን ꬊሼቲዴ ካቄቴዳዋንቱካ ኣ ቦላ ቂሊጬዲኖ።

³³ኡሱፑን ሳቲያፔ ዶሚዴ፥ ኡዱፑ ሳቲያ ጋካናው፥ ጋዲያ ኡባይ ꬉሜዳ።

³⁴ኡዱፑ ሳቲያን ዬሱሲ ባሬ ቃላ ꬎቁ ኦꬂዴ፥ «ኤሎሄ፥ ኤሎሄ፥ ላማ ሳባቂታኒ?» ያጌዳ። ሄዋ ጊያዌ፥ «ታ ፆሳው፥ ታ ፆሳው፥ ታና ኣዪሲ ኣጋዲ?» ጊያዋ።

³⁵ሄዋን ኤቄዳ ኣሳፔ ኢቱ ኢቱ ሄዋ ሲሲዴ፥ «ቤዒቴ፤ ኤላሳ ፄሴ» ያጌዳ።

³⁶ሄ ኣሳፔ ኢቱ ዎፂ ዪዴ፥ ዛንዛ ማላቲያዋን ጫላ ዎዪኒያ ኤሳ ኩንꬄዳ፤ ሄዋ ማቃ ጋቲማ ፄራን ዎꬂዴ፥ «ዴዒሺቴ ኣኔ፤ ኤላስ ማስቃሊያፔ ኣ ዎꬃናው ያኔንቶኔ ኣኔ ቤዖይቴ» ያጊዴ ዬሱሳ ዶናኮ ኡሻናው ሺሼዳ።

³⁷ዬሱሲ ቃላ ꬎቁ ኦꬂ ዋሲዴ፥ ሃይቂ ኣጌዳ።

³⁸ጌሻ ጎሊያን ቃሼቴዳ ጋሪዱ ቆሞፔ ዱጌ ጋካናው፥ ላዑ ኬሲዴ ፖሼቲ ዎꬌዳ።

³⁹ማስቃሊያፔ ሲንꬃ ባጋና ሄዋን ኤቄዳ ኢቲ ፄቱዋ ካፑ፥ ሄዋ ኬና ዬሱሲ ዋሲዴ ሃይቄዳዋ ቤዔዳ ዎዴ፥ «ሃ ቢታኒ ቱሙ ፆሳ ናዓ» ያጌዳ።

⁴⁰ሄዋን ሃኩዋን ኤቂዴ ፄሊያ ኣማሬዳ ማጫዋንቱ ዴዒኖ፤ ኡንቱንቱ ጊዶን ማግዳላ ጊያ ካታማፔ ዬዳ ማይራማ፥ ቴፋ ያዪቆባኔ ዮሳ ዳያ ማይራማኔ ሳሎማ ዴዒኖ።

⁴¹ሄ ማጫ ኣሳቱ ዬሱሲ ጋሊላን ዴዒያ ዎዴ፥ ኣ ካሌዳዋንታኔ ኣ ማዴዳዋንታ፤ ቃሲ ዬሱሳና ኢቲፔ ዬሩሳላሜ ቤዳ ሃራ ጮራ ማጫ ኣሳቱ ሄዋን ዴዒኖ።

⁴²ሳዓይ ኦማርሴዳ ዎዴ፥ ሄዋን ሺቄዳ ኣሳን ቦንቼቴዳ ኢቲ ዮሴፋ ጊያ ቢታኒ፥ ፆሳ ካዉቴꬃይ ያናዋ ናጊ ኡቴዳዌ፥ ኣርማቲያሳ ጊያ ካታማ ኣሳይ ዬዳ፤ ሄ ጋላሳይ ዎንቴꬃ ሳምባታው ጊጌቲያ ጋላሳ ጊዴዳ ዲራው፥ ዮሴፎ ፃሊዴ ጲላፆሳኮ ቢዴ፥ ዬሱሳ ኣኃ ኣካናው ዎሴዳ።

⁴⁴ጲላፆሲ፥ ዬሱሲ ማንዒያንካ ሃይቂዲጌዳዋ ሲሴዳ ዎዴ ማላሌቴዳ፤ ፄቱዋ ካፑዋ ፄሲዴ፥ «ኢ ሃይቆዴፔ ጋሚዔዴ?» ያጊዴ ኦቼዳ።

⁴⁵ጲላፆሲ ዬሱሲ ሃይቄዳዋ ፄቱዋ ካፑዋፔ ሲሲዴ፥ ኣ ኣኃ ዮሴፎ ኣካናዳን ኡዴዳ።

⁴⁶ዮሴፎ ሞጉዋ ማዩዋ ሻሜዳ፤ ዬሱሳ ኣኃ ማስቃሊያፔ ዎꬂ ማዩዋን ፃፂዴ፥ ሹቻ ዎጬዳ ኣሳ ሞጊያ ጎንጎሉዋ ጊዶን ኣ ኣኃ ዎꬄዳ፤ ቃሲ ሄ ጎንጎሉዋ ዶናን ዎልቃማ ሹቻ ጎንዶርሲዴ ዎꬄዳ።

⁴⁷ማግዳላ ካታማፔ ዬዳ ማይራማኔ ዮሳ ዳያ ማይራማ ዬሱሳ ኣኃ ኡንቱንቱ ሃቃን ዎꬂንቶ ቤዒኖ።